7
Paul lebisa poꞌa diir la yela
1 Nannanna, yaname daa sob gbauŋ siꞌa la ka m ye m sob lebisi ya. Li suꞌum ka dau da di poꞌa.
2 Amaa poꞌasaꞌuŋ bedego bee ya teŋin la zug, dau mekama suꞌum ye o mor o meŋ poꞌa ka poꞌa me mor o meŋ sid.
3 Li suꞌum ka dau tum dau tuum tis o poꞌa, ka poꞌa me niŋ ala n tis o sid.
4 Bozugo poꞌa pu soꞌe o meŋ niŋgbinaa. Ka li ane o sidi soꞌe li. Ka dau me pu soꞌe o meŋ niŋgbinaa. Ka li ane o poꞌa soꞌe li.
5 Poꞌa ne o sid da zanꞌasi taaba. Asee ban na gbanꞌe noor n zaŋ saŋa biꞌela ye ba sos Winaꞌam, ka naam lem laꞌas ne taaba, ka Sutaana da maki ba, bozugo ba ku tunꞌe nyaŋe ba meŋa.
6 Neꞌ ane m meŋ tenꞌesug ka kaꞌane wadaa.
7 M tenꞌesug ane dau wusa naan a wuu mane a siꞌem la. Amaa ninsaal mekama mor o meŋ piini kan ka Winaꞌam tis o. Ti wusa yinni yinni mor piini gun gun.
8 M yet neꞌeŋa tisidi nidib bane kaꞌa poꞌab bee kaꞌa sidib la ne pokonya, ye li a suꞌum n tisi ba ka ba kpelim be ban gullim wuu man be siꞌem la.
9 Amaa ba yaꞌa ku nyaŋe gbanꞌe ba meŋa, dap on dim poꞌab ka poꞌab me kul sidib. Li a suꞌuŋa ka ya niŋ ala n sonꞌe yaname na ti more li yaꞌamleog ka li zabid wuu bugum.
10 M mor noyelug n na tis nidib bane mor poꞌab bee mor sidib la. Ka li ane Zugsob la din ka li kaꞌ man dine. Li ane ye poꞌa da bas o sida.
11 Amaa o yaꞌa bas o sid, on zinꞌi, ka da toom kul sida, bee on ne o sid la naalim taaba. Ka dau me da bas o poꞌa.
12 Neꞌeŋa ane man meŋ noyelug ka m yet nimbane kpelim. Li kaꞌ Zugsob la yelugo. Li ane ye one siak Winaꞌam yaꞌa mor poꞌa sa, ka poꞌa la kaꞌ yadda niŋid, ka siak ye ba laꞌam be, on da bas oo.
13 Poꞌa one siak Winaꞌam yaꞌa kul sid sa, ka dau la kaꞌ yadda niŋida, ka siak ye ba laꞌam be, on da bas oo.
14 Poꞌa kane a Winaꞌam nid la tunꞌe ke ka o sid a nyain, ka dau kane a Winaꞌam nid la tunꞌe ke ka o poꞌa a nyain. Neꞌeŋa yaꞌa kaꞌane ala, ba biis naan aan dianꞌad. Ka lin a siꞌem la, biis la me a nyain.
15 Amaa one kaꞌ yadda niŋid yaꞌa bood ye o bas one a yadda niŋid, on niŋimi ala. Li kaꞌa mugusug ye poꞌa bee dau one a yadda niŋid laꞌasem ne one kaꞌ yadda niŋida. Winaꞌam buoli ti ye ti be ne sumalisim.
16 “Poꞌa one a yadda niŋida, fu niŋ wala baŋ ye fu ku tunꞌe tiligi fu sida? Ka dau one a yadda niŋida, fu niŋ wala baŋ ye fu ku tunꞌe tiligi fu poꞌa?”
Ba dolim ba beilim kan ka Winaꞌam tisi ba la yela
17 Soꞌ mekama dol beilim kan ka Winaꞌam tis o, ne on daa a siꞌem ka Winaꞌam buol o la. Neꞌeŋa a lin ka m tis noor Winaꞌam nidib bane be zinꞌis wusa.
18 One kpenꞌ baŋo, ka Winaꞌam nyaan buol o, on da mood ye o yiis baŋo la isir n base. One me pu kpenꞌ baŋo ka Winaꞌam buol o, on da kpenꞌe.
19 Ka one kpenꞌ baŋo ne one pu kpenꞌ baŋo wusa ane zaalim. Lini pak ane Winaꞌam noyelug la siakir.
20 Soꞌ mekama kpelim be on daa a siꞌem ka Winaꞌam buol o la.
21 Fu yaꞌa daa ane yamug saŋkan ka Winaꞌam buol fu, fun da ke ka li paki fu. Amaa fu yaꞌa na nye yolisim suer fun diꞌem.
22 Ka on ka Zugsob la buol, ka o a yamug, ane Zugsob la yolisim nid. Ala men, yolisim nid on ka Kiristo buol, ane o yamug.
23 Winaꞌam daꞌa ya ne. Dinzugo, da liebi wuu yamis n tis nidiba.
24 Dinzugo m baꞌabiise, soꞌ mekama daa a siꞌem ka Winaꞌam buol o la, on be ala ne Winaꞌam noor yinni.
Paul lebisa sieba poꞌadiir la yela
25 Neꞌ bipumis bane pu kul sidib yela, m pu diꞌe noor Zugsob la saꞌane. Amaa m tuꞌasidne m potenꞌer mor siꞌel line ka m paam Zugsob la saꞌan o nimbaanlzoor la yela ye ya na siak ye mane yel siꞌel la ane yelsida.
26 Toꞌogi a siꞌem nannanna la zug, man tenꞌes ye li suꞌum ka nid na kpelim zinꞌin wuu o beilim a siꞌem la.
27 Fu yaꞌa mor poꞌa, fun da mood ye fu bas oo. Ka fu yaꞌa a dakoonr men fun da ied ye fu di poꞌa.
28 Ka fu yaꞌa liaꞌ poꞌa ka o kul uf, fu pu tum tuumbeꞌede. Ka one me pu mor sid yaꞌa kul sid, o pu tum tuumbeꞌede. Ka m bood ye ya luak yela ban ka bane mor poꞌab bee mor sidib la na nye dunia nwa ni la.
29 M baꞌabiise, lin ka m yel la gbin ane ye, saŋa kan ka Winaꞌam ziꞌel n tisi ti la pu lem zuꞌe. Nannanna waꞌae sa, li a suꞌum ka bane mor poꞌab la wenne wuu ba kaꞌ poꞌaba,
30 ka bane kaasid wenne ba sunya pu saꞌam, ka bane laꞌad wenne ba kaꞌa sumalisim, ka bane daꞌad wenne ba pu soꞌe lii,
31 ka bane mor dunia laꞌad n maan ban bood siꞌem da ke ka li yela loo ba zute. Ka dunia kaŋa a siꞌem nannanna nwa, ye li gaad ne.
32 M pu bood ye siꞌelnam daami yaa. Dakoonr gosidne on na niŋ siꞌem tum Zugsob la tuuma, ka niŋ siꞌel ka li na malis Zugsob la.
33 Ka poꞌa daan gosidne dunia laꞌad ne on na niŋ siꞌem ka li malis o poꞌa.
34 Dinzugo o yaꞌamboodim pudugne. Ka poꞌa one kaꞌ sid, gosidne Zugsob la tuuma yela, on na niŋ siꞌem ka o niŋgbina ne o siig na ti a Winaꞌam din. Ka one mor sid, gosidne dunia laꞌad ne on na niŋ siꞌem ka li malis o sid.
35 Yanam suꞌum zug ka m yel neꞌeŋa ye m suŋi ya. M pu kpeꞌeŋid ye m zuol dine kisi ya zutine. Amaa m boode ye ya tum dine a suꞌum ne dine nar, ka zaŋi ya meŋ wusa n pesig Zugsob la.
36 Nid yaꞌa more o bipuŋ ka o biꞌig n tuꞌug sid kulig, ka li mor poꞌogir, on kel ka o kul sid wenne on tenꞌes siꞌem o suunrin la. O yaꞌa zaŋ o bipuŋ la tis sid, o maal suꞌuŋa.
37 Ka niŋkane suunre kpiꞌem ne yelkaŋa, ka o tenꞌes o potenꞌerin ka gbanꞌe o yaꞌamin ye o na mor o bipuŋ la ka o da kul sida, ka mugusug kaeꞌ, o yaꞌa mor paŋ na maal nwa, o maal suꞌuŋa.
38 Ala zugo, one tisidi o bipuŋ sid maane suꞌuŋa. Ka one me pu tisidi o bipuŋ sida, maan suꞌuŋa gaad.
39 Poꞌa one kul sid, ka o nam voe, o pu soꞌe o meŋ. Ka o sid yaꞌa kpi, suer be ka o na tunꞌe kul on ka o bood, asee ka li a Zugsob la boodim.
40 Ka man tenꞌeseya ka o yaꞌa kpelim be on a siꞌem la, li na malis o gaad on na kul dau. Ka m miꞌ ye m me mor Winaꞌam Siig n paꞌani ya.