5
Poꞌasaꞌuŋ Winaꞌam nidib soogin la yela
1 Ba sid yel asida ye poꞌasaꞌuŋ bee ya soogin hale, bun lin ka bane pu dol Yesu Kiristo kis. M wum ye nid yinni bee ya soogin n dig ne o saam poꞌa.
2 Ka ya me mor nyeesim li yela. Li pu suꞌum ka ya sunya saꞌaminee? Li suꞌum ka ya yiisin dau one maal yelbeꞌed kaŋa la ya kallin.
3 Hale man lale ya saꞌan ne niŋgbina la, m potenꞌer nam kpelim bee ya saꞌan. Man pun kad dau kane maal yelbeꞌed kaŋa nwa saria
4 ne ti Zugsob Yesu paŋ, ka li wenne m bene anina ne yanam ne. Yaname laꞌased taaba ka m potenꞌer bee ya saꞌan ka ti Zugsob Yesu be ne ya ne o paŋ la,
5 zaŋimi dau kaŋa n niŋ Sutaana nuꞌusin ka o saꞌam niŋkaŋa niŋgbina, ka ti Zugsob la ken daar na, ka o siig lee paam faangir.
6 Li pu suꞌum ka ya mor nyeesim. Ya pu baŋ ye dabin fiinn nwa n ket ka bodobodo zom ukidaa?
7 Yiisim tuumbeꞌed ban ka ya maal ka li wenne dabin kudug la ya saꞌan, ka ya na lieb nyain, ka wenne bodobodo zom kan ka dabin kaeꞌ. Sida m baŋya ye ya wenne bodobodo kane kaꞌ dabin ne. Bozugo ba daa ku Kiristo ka o wenne Winaꞌam kum malek gaadug tienr maluŋ peꞌebil ti yela.
8 Dinzugo ti yiisim potenꞌebeꞌed ne tuumbeꞌed line wenne dabin kudug la, ka tum sida ne line a nyain tuuma, ka li wenne ti maal tienr maluŋ la, ka di bodobodo kane kaꞌ dabin ne.
9 Man daa sob gbauŋ siꞌa la, m daa yeli ya ye ya da laꞌas ne bane a poꞌasaꞌamidiba.
10 Ka li ane bane a poꞌasaꞌamidib ka yel ye ba dol Winaꞌam la yela ka m daa sob, ka kaꞌane bane pu dol Winaꞌam laa, bane a poꞌaboodib bee fufum dim bee naꞌayiis bee bane maan bada la yelaa, ka li yaꞌa a ala, yanam na yi dunia kaŋa ni.
11 M daa sob n tisi ya ye ya da dol ne one yel o meŋ ye o ane Winaꞌam nid, ka a poꞌabood bee fufum daan bee maan baꞌar bee a nintuꞌud bee one nut daam koon bee one faand nidib laꞌade. Hale da zinꞌin ye fu di ne niŋkan soba.
12 M baꞌa kaeꞌ ka m kad bane pu puꞌusid Winaꞌam la saria, Winaꞌam na kadi ba saria. Li ane ya taaba bane puꞌusid Winaꞌam ka li nar ka ya kad saria.
13 Kadimi tuumbeꞌed daan la ya soogin.