14
Winaꞌam Siig Suŋ piini la yela yaꞌas
1 Keli ka noŋilim a ya bunboodim gaad siꞌel wusa, ka boomi Siig Suŋ piini la bedego. Line gaad li wusa ane nodiꞌesug piini line yi Winaꞌam saꞌan.
2 One pianꞌad pianꞌazuna o pu pianꞌadi tisid nidiba, amaa o pianꞌadne tisid Winaꞌam, ka soꞌ ku baŋ on yet siꞌel laa bozugo o pianꞌadne yelsuaꞌada la ne Siig la paŋ.
3 Ka one diꞌesid Winaꞌam pianꞌad n tisid nidib, pianꞌadne n suŋid nidib ka me kpeꞌeŋidi ba, ka belisidi ba.
4 One pianꞌad pianꞌazuna suŋidne o meŋ. Ka one diꞌesid Winaꞌam noor pianꞌad n tisid nidib suŋidne Winaꞌam nidib.
5 M bood ye ya wusa pianꞌad pianꞌazuna, ka bood ye ya diꞌesid Winaꞌam noor pianꞌad la n tisid nidib gat ala. One diꞌesid Winaꞌam noor pianꞌad la tisid nidib gat one pianꞌad pianꞌazuna. Amaa o yaꞌa tuꞌas pianꞌazuŋ la gbin ka li suŋ nidib, ba pu gat taabaa.
6 M baꞌabiise, m yaꞌa keenn ya saꞌan na n pianꞌad pianꞌazuna, m na niŋ wala suŋi yaa? M ku suŋi yaa, asee ka m paꞌali ya bun line yi Winaꞌam ni na, bee m ke ka ya baŋ siꞌel, bee m diꞌe Winaꞌam noor pianꞌad siꞌa n tisi ya, bee m paꞌali ya siꞌel.
7 Bun line kaꞌa nyovur yaꞌa maan vuud wenne wiigi piebid bura bura ka li kaꞌa gbin ne, fu ye fu niŋ wala baŋ line piebid siꞌel yela?
8 Naꞌatan yaꞌa piebid ka pu pieb tanp piebugo, anoꞌone na tiꞌebi yi tanpo?
9 Ala men ya yaꞌa pianꞌad pianꞌazuŋ ka li gbin kaꞌ nyainee, soꞌ na niŋ wala baŋ yanam yet siꞌela. Ya pianꞌad la na ane zaalim.
10 Pianꞌad buudi bedego be dunia ni, ka ba yinni kaeꞌ pu mor gbin ne.
11 M yaꞌa ziꞌ pianꞌad gbin ne, m ane saani tis one pianꞌad la. Ka one pianꞌad la me a saani tisi m.
12 Yanam sadigim bood Siig Suŋ piini la, boomi piini line na kpeꞌeŋ Winaꞌam nidib bedego.
13 Dinzugo, one pianꞌad pianꞌazuŋ, on sosim Winaꞌam ka o ke ka o nyaŋe tuꞌasi li gbin.
14 M yaꞌa puꞌus Winaꞌam ne pianꞌazuŋ, m siig puꞌusid, amaa m yaꞌam kaꞌ li nii.
15 Ka bo ka m na niŋ yuꞌuse? M na puꞌus ne m siig ka me lem puꞌus ne m yaꞌam, ka yum ne m siig ka me lem yum ne m yaꞌam.
16 Fu yaꞌa puꞌus Winaꞌam bareka ne fu siig, nid one laꞌas ne fu ka ziꞌ fun yet siꞌela, na niŋ wala siaki fu puꞌusum ye, “Ami?”
17 Hale fu Winaꞌam puꞌusum la yaꞌa a suꞌuŋa gba, li kaꞌ suŋir n tis ninkaŋa la.
18 M puꞌus Winaꞌam bareka man pianꞌad pianꞌazuna n gat yanam wusa la.
19 Amaa Winaꞌam nidib laꞌasugin m bood ye m pianꞌ pianꞌuk anu ne m yaꞌam ye m paꞌal nidib n gaad man na pianꞌ pianꞌuk tusa piiga ne pianꞌazuŋ.
20 M baꞌabiise, da wenne biise ya potenda nii. Amaa aae wuu biise ya tuumbeꞌed poogin. Kel ka ya potenda wenne kpeenmnam potenda ne.
21 Li sob Winaꞌam gbauŋin ye,
“Zugsob la yel ye,
‘M na ke ka ninsieba ne saam
pianꞌ m labaar tisi m nidib,
ka li a pianꞌazuŋ ba saꞌan.
Laꞌam ne wala wusa, ba ku kelise.’ ”
22 Dinzug, pianꞌazuna ane siꞌel line na saꞌal bane kaꞌ yadda niŋidib, ka kaꞌ bane a yadda niŋidib. Ka nodiꞌesug a line na paꞌal n tis bane a yadda niŋidib ka kaꞌ bane kaꞌ yadda niŋidiba.
23 Yadda niŋidib wusa yaꞌa laꞌas taaba, ka soꞌ wusa pinꞌili pianꞌad ne pianꞌazuna, ka yiiŋ dim kpenꞌ na, ba ku yel ye ya geemnee?
24 Amaa yadda niŋidib wusa yaꞌa laꞌas taaba ka soꞌ wusa diꞌesid Winaꞌam noor pianꞌad n tisid nidib ka yiiŋ nid kpenꞌ na, on wum siꞌel wusa la na ke ka o baŋi o tuumbeꞌed, ka kad o meŋ saria.
25 Yelsuaꞌada bane be o suunrin na nie paalo ni, ka o na igin puꞌus Winaꞌam ka peligi o poog yel ye, “Asida, Winaꞌam bee ya ni.”
Yadda niŋidib laꞌasug sueya dolim la yela
26 Dinzugo m baꞌabiise, ya yaꞌa laꞌas taaba ye ya puꞌus Winaꞌam, soꞌ more yuum, ka soꞌ me more paꞌalug, ka soꞌ more siꞌel line ka Winaꞌam nie paꞌal o, ka soꞌ more pianꞌazuŋ, ka soꞌ me more pianꞌazuŋ la gbini na tuꞌasi tis nidib. Niŋimi siꞌel wusa ka li suŋ Winaꞌam nidib.
27 Ninsieba yaꞌa ye ba pianꞌ ne pianꞌazuna, nidiba ayi bee nidiba atanꞌ gullim pianꞌam yinni yinni, ka soꞌ me tuꞌas ban yel siꞌel la gbin.
28 Amaa soꞌ yaꞌa kaeꞌ na nyaŋe tuꞌas pianꞌazuna la gbin ne, one pianꞌad pianꞌazuŋ la da pianꞌ yadda niŋidib laꞌasugin ne, ka lee pianꞌ tis o meŋ ne Winaꞌam.
29 Keli ka nodiꞌesidiba ayi bee atanꞌ pianꞌ. Ka ban kpelim la geligim gos ye li a suꞌuŋa bee.
30 Ka nid yinni yaꞌa pianꞌad ka Winaꞌam Siig Suŋ nie siꞌel paꞌal soꞌ laꞌasugin la, one deŋim pianꞌad la na bas pianꞌad.
31 Ya wusa yinni yinni na nyaŋe diꞌe Winaꞌam noor pianꞌad n tis nidib, ka ya wusa zamis ka kpeꞌeŋ.
32 Nimbane mor Winaꞌam Siig nodiꞌesug la piini la tunꞌe gbanꞌe ba meŋ ne nodiꞌesug piini la yela.
33 Bozugo Winaꞌam pu buoli ti ye ti tum yori yorii amaa ye ti be baanlim.
34 Poꞌab sini ba noya yadda niŋidib laꞌasug doogin, wenne zinꞌig wusa ka Winaꞌam nidibi n maan siꞌem la. Suer pu be ka ba pianꞌad laꞌasugin ne. Amaa ba siakimi ba sidib noya wuu Jew dim wada la yel siꞌem la.
35 Siꞌel yaꞌa be ka ba bood ye ba baŋ, ban on buꞌosimi ba sidib ba yaan. Li ane nyan ne poꞌab n na pianꞌad yadda niŋidib laꞌasugin.
36 Ya tenꞌes ye li ane yanam ni ka Winaꞌam labaar la pinꞌile? Ka ane yanam gullim ni ka li kenaa?
37 One tenꞌes ka o a Winaꞌam nodiꞌes bee o ane on ka Winaꞌam Siig Suŋ bee o ni, on siakim ye lin ka m sobidi tisidi ya nwa ane Zugsob la noyelug.
38 Amaa soꞌ yaꞌa pu kelis neꞌeŋa, yanam on da kelisi ne oo.
39 Dinzug m baꞌabiise, boomi Winaꞌam nodiꞌesug, ka da zanꞌasi pianꞌazunaa.
40 Maalimi siꞌel wusa suꞌuŋa, ka da ke ka li a yori yorii.