7
Sitivin pianꞌad la yela
1 Ka maalmaan kpeenm la buꞌos Sitivin ye, “Ala bee?”
2 Ka o lebis ye, “M zuanam ne m saamnama, kelisimi. Winaꞌam one a naꞌam titaꞌar daan la, daa nie o meŋ ti yaab Abraham saꞌan on da be Mesopotamia teŋin ka nam pu keŋ n zinꞌin Haran teŋin la,
3 ka yel o ye, ‘Yiim ka bas fu teŋ ne fu buudi, ka keŋ teŋ kan ka m na paꞌal fu la.’
4 “Ka Abraham yi Kaldea teŋin la n keŋ zinꞌin Haran teŋin. Ka o saam kuꞌum nyaꞌaŋ ka Winaꞌam lem yiis o keŋ teŋ kan ka ya be nwa ni,
5 ka pu tis o paalo teŋ la ni ka li siak o nobir tienri, amaa ka len yeli ziꞌel ye, o na tis o teŋ kan. Ka o kuꞌum nyaꞌaŋ ka o yaas me na ti soꞌe li. Ka saŋkan la ka o nam pu duꞌa biiga.
6 Ka Winaꞌam da yel o neꞌeŋa ye, ‘Fu yaas la na ti keŋ teŋ siꞌa ni n lieb saam ne yamis anina, ka ba na namisi ba yuma kobus naasi.
7 Amaa m na ti namis soꞌolim kan ka ba na ti a yamis la ka li nyaꞌaŋ ka ba na yi anina na n puꞌus m kpela.’
8 Ka Winaꞌam tis Abraham noor ye, on ne o yaas wusa kpenꞌem baŋo. Ka li paꞌal ye Winaꞌam ne Abraham siak taaba noor. Ka Abraham n da duꞌa Isaak li daba anii daar la ka o kpenꞌes o baŋo. Ka Isaak duꞌa Jakob. Ka Jakob duꞌa ti Jew dim yaanam piina ayi la.
9 “Ka ba da nen Josef ka kuos o n tis Egipiti teŋ dim. Amaa ka Winaꞌam da be o saꞌan,
10 ka yiis o namisug wusa poogin n ke ka o tuuma malis Egipiti teŋ naꞌab Faaro ka tis Josef yaꞌam naꞌab la tuon. Ka naꞌab la tis o noor ka o soꞌe Egipiti teŋ ne on yir wusa.
11 “Ka koꞌomtitaꞌar lu Egipiti soꞌolim ne Keinan teŋin hale ka li a toog. Ka ti yaanam la da kaꞌ diibo.
12 Amaa Jakob n da wum ye, diib be Egipiti la, ka tumi ti yaanam.
13 Ka ba lebug line paas abuyi la ka Josef ke ka o baꞌabiis la baŋ o. Ka Faaro me baŋ Josef baꞌ yidim.
14 Ka Josef tum buol o baꞌ Jakob ne o yidim wusa. Ba kal da paae piisyopoi ne anu.
15 Ka Jakob due n keŋ Egipiti teŋin. Anina ka on ne ti yaanam da kpi.
16 Ka ba zee ba n keŋ Sekem teŋin n mumi ba yaug kan ka Abraham da daꞌ ne ligidi Hamor biis saꞌan la.
17 “Amaa Winaꞌam noor ziꞌelug ne Abraham saŋa n da liꞌel la, nidib da paasne n lebig bedego Egipiti teŋin.
18 Hale ka soꞌ ti di Egipiti naꞌam ka pu miꞌ Josef yele,
19 ka maal yaꞌambeꞌed ne ti buudi la, ka mugusi ti yaanam ka ba bas bilies ka ba kpi.
20 “Saŋkaŋa nwa ka ba da duꞌa Moses ka o a bivenliŋ ka paae Winaꞌam yaꞌam. Ka ba ugus o nwadisa atanꞌ o baꞌ yin.
21 Ka ban da bas o la, Faaro bipuŋ da nok o ugus. Ka o lieb o meŋ biig.
22 Ka Moses zamis Egipiti dim yaꞌam wusa ka da a nintitaꞌar, o pianꞌad ne o tuuma wusa ni.
23 “On da paae yuma piisnaasi la, li da kenn o suunrin na ka o bood ye o keŋ kaae o buudi bane a Israel yaas la,
24 ka nye ba nid yinni ka ba namisid o. Ka o suŋi ti nid la n ku one a Egipiti nid ka namisid o la n lebis sam,
25 ka tenꞌesid ye o buudi la na baŋ ye Winaꞌam bood ye o ke ka on yiisi ba, ba fara la ni. Amaa ka ba pu baŋi.
26 Ka beog nie ka o nye nidiba ayi ka ba zabid ne taaba. Ka o bood ye o ke ka ba naal noor la ka buꞌosi ba ye, ‘M zuanama, ya ane baꞌabiis, ka bo niŋ ka ya zabid taaba?’
27 “Ka one maal o kpiꞌe beꞌed la daꞌe o, ka buꞌos ye, ‘Anoꞌon tis uf noor ye fu soꞌe ti ka tuꞌas ti antuꞌa?
28 Fu bood ye fu ku m wenne fu sa ku Egipiti dim dau siꞌem laa?’
29 Pianꞌad kaŋa zug, ka Moses zo keŋ Midian teŋin n lieb saan. Anina ka o duꞌa biis ayi.
30 “Ka yuma piisnaasi n gaad la ka o da be moogin line kpiꞌe Sinai zuer, ka nye ka bugum pielim be tituugin ka Zugsob malek nie o meŋ anina.
31 Moses n nye li la ka li lidig o, ka o liꞌel ye o gosi li. Ka kukor yi Zugsob la saꞌan na
32 n yel ye, ‘Mane a Winaꞌam on ka fu yaanam Abraham ne Isaak ne Jakob da puꞌusid la.’ Ka Moses kirid ka pu nyaŋe gosi lii.
33 “Ka Zugsob la yel o ye, ‘Pidigimi fu taꞌada la, ka zinꞌikan ka fu ziꞌe la a zinꞌisuŋ.
34 M nye m nidib bane be Egipiti teŋin n namisid siꞌem, ka wumi ba fabulug ka sig na ye m faaenn ba. Ala zug kem na ka m tum uf Egipiti teŋin.’
35 “Moses kan ka ba da zanꞌas la, ka yel o ye, ‘Anoꞌone tis uf noor ye fu soꞌe ti ka tuꞌas ti antuꞌa?’ On la ka Winaꞌam da ke ka o malek pianꞌ tis o tituugin la. On la ka Winaꞌam tum ye o soꞌe o nidib ka yiisi ba namisug poogin la.
36 Ka o more ba yi Egipiti teŋin maal o nyalima tuuma anina, ne ateuk zenꞌugin la, hale yuma piisnaasi moogin.
37 “Moses kan la n da yel Israel dim ye, ‘Zugsob Winaꞌam na yiis o nodiꞌesid ba buudi sisoogin wenne wuu on daa yiis mam ba ni siꞌem la.’
38 One da be Winaꞌam nidib saꞌan moogin ka da bee ti yaanam saꞌan, ne malek kan da tuꞌas n tis o Sinai zuerin la, ka da diꞌe Winaꞌam pianꞌad ka li voe n tisi ti la.
39 “Amaa ti yaanam da pu bood ye ba siak o noore, ka zanꞌas o, ka tenꞌesi ba sunya ni n da bood ye ba leb Egipiti teŋin.
40 Ba da yel Aaron ye, ‘Maalim wina n tisi ti ka li bee ti tuon. Ka Moses kan more ti yi Egipiti teŋin na la, ti pu baŋ bun line niŋ o.’
41 Ka ba yaꞌab naꞌabil ka li a ba win ka maan baꞌar, ka maan sumalisim ne ba meŋ nuꞌus n maal siꞌel la.
42 Dinzug ka Winaꞌam basi ba ka ba puꞌusid bun line be agol wusa, wuu lin sob Winaꞌam nodiꞌesidib gbana poogin siꞌem ye,
‘Israel nidiba,
li kaꞌa mam ka ya ku bunkonbid n maal maana yuma piisnaasi moogin n tis laa,
43 Lin ka ya da zee keŋ la,
da ane Win Molek fudoog ne Win Refan nwadibil.
Lin la ka ya da maal n puꞌusid la.
Alazug m na yiisi ya ka ya keŋ hale n gaad Babilon teŋin.’
44 “Ti yaanam da mor fudoog moogin la ka Winaꞌam wada la da be li poogin. Ba da maali li hale Winaꞌam da pianꞌ n tis Moses n yel o ye o maalimi li wenne wuu on nye siꞌem la.
45 Ti yaanam bane diꞌe fudoog la ba saamnam saꞌan la, da zee li keŋ ne Josua ka soꞌe soꞌolim kan ka Winaꞌam da kad nidib n yiisi ba tuon la. Ka li kpelim be n paae David saŋa.
46 David da paae Winaꞌam yaꞌam ka sos o ye o kel ka o me yir n tis on kan ka o yaab Jakob da puꞌusid la.
47 Amaa li ane Solomon n da meꞌ yir n tis Winaꞌam.
48 “Amaa Winaꞌam one gaad bun zanꞌasa la pu zinꞌi ya ban ka ninsaalib n meꞌ ne nuꞌus maꞌaa nii, wuu Winaꞌam nodiꞌesidib yinni da yel ye,
49 ‘Zugsob yel ye,
“Arazana ane man naꞌam gbauŋ,
ka dunia me a mam noba kuk.
Bo yir ka ya na meꞌ n tis mane?
Ka yaani n a mam vuꞌusum zinꞌiga?
50 Li kaꞌ mam nuꞌusi maal siꞌelnam wusa bee?” ’
51 “Yanam bane zuti kpiꞌem ka ya pu dol Winaꞌam ne ya sunya, ka pu kelisid Winaꞌam labaar la, ya kpeꞌeŋid n zanꞌasid Winaꞌam Siig Suŋ daar wusa wenne ya yaanam me da niŋ siꞌem la.
52 Winaꞌam nodiꞌesid kane da be, ka ya yaanam la da pu namis o? Ba da ku sieba bane da pun mool Winaꞌam popielim tumtum daan la ken na la yela. On la men ka ya zam o ka ku o la.
53 Ya ane bane da diꞌe Winaꞌam wada ban ka Winaꞌam tisi ya maleknam saꞌan la. Amaa ya pu siaki lii.”
Ban lob Sitivin ne kuga la yela
54 Ban wum neꞌeŋa la, ba sunya pelig ka ba gaꞌadi ba nyina o yela.
55 Amaa Sitivin daa peꞌel ne Winaꞌam Siig Suŋ la, ka gorig n gosid arazana ni kii, ka nye Winaꞌam naꞌam nie nyeen pil pil ka Yesu ziꞌe Winaꞌam datiuŋ.
56 Ka o yeli ba ye, “Gosimi ya, m nye ka arazana yoꞌog ka Ninsaal Biig la ziꞌe Winaꞌam datiuŋ.”
57 Ka ba endi ba toba ka tans ne kukotitada n niŋ noor yinni laꞌas taaba n zo n gbanꞌ o,
58 ka veꞌeg o yiis teŋ poogin n lob o ne kuga. Ka kasetib zaŋi ba fuud n guꞌul dasaŋ ka o yuꞌur buon Saul.
59 Ka ban lobid Sitivin ne kuga la, ka o sos Zugsob n yel ye, “Zugsob Yesu diꞌemi m siig”
60 Ka igin teŋin n tans ne paŋ n yel ye, “Zugsoba, da niŋ nimbama nwa taale ba tuumbeꞌed kaŋa zugo.” On yel neꞌeŋa la ka bas o meŋ.