4
Piita ne Joon n ziꞌe kpeenmnam tuon la yela
1 Ka ban nam tuꞌasid ne nidib la, ka maalmaan kpeenmnam ne Winaꞌam puꞌusum yir gurib kpeenm, ne Sadusii dim keenn ba saꞌan na.
2 Ka ba sunya pelig ne Tumtumnib la ban paꞌan nidib ka mooni Yesu kuꞌum vuꞌugir labaar tisidi ba la, line na nie paꞌal ye kuꞌum vuꞌugir be.
3 Ka ba gbanꞌe ba n kpenꞌes sarega ni ye beog nie, lin daa a zasisobir saŋa la zug.
4 Amaa nidib bane daa wum Winaꞌam labaar la bedego sa daa niŋ o yadda. Ba dap kal daa a wuu tusa anu.
5 Ka beog nie la, ka naꞌanam ne kpeenmnam ne gbauŋmiꞌidib la laꞌas taaba Jerusalem ni.
6 Ka Annas, on a maalmaan kpeenm, ne Kaifas ne Joon ne Alekizanda ne nidib bedego bane a maalmaanib buudi la daa laꞌas taaba.
7 Ka ba more ba na n ziꞌel ba tuon ka buꞌosi ba ye, “Anoꞌon tisi ya paŋ ne noor ye ya maalim nwa?”
8 Ka Winaꞌam Siig Suŋ peꞌel Piita ka o yeli ba ye, “Yanam bane soꞌe nidib laa, ne Israel kpeenmnama,
9 li yaꞌa ane ye ya buꞌosi ti zina daar nwa n baŋ tuumsuŋ kan ka ti sa maal n tis ponꞌor la ne line ke ka o nye laafe la
10 ya wusa ne Israel dim wusa baŋim ye li ane Yesu Kiristo one yi Nazaret na la zug, ka nid nwa ziꞌe ya tuon ka mor laafe la. On ka ya daa kpaꞌ tabil dapuudir zug n ku, ka Winaꞌam daa vuꞌug o kumin la.
11 Li sob Winaꞌam gbauŋin, Yesu n tuꞌas o meŋ yela ye,
‘Kugir kan ka tanmeedib daa neꞌes la,
lieb lodigin kugir.’
12 Soꞌ lem kaeꞌ a faangire. Ka yuꞌursiꞌa lem kaꞌ dunia nwa zug yaꞌas n na tis nidib ka ba nye tiligire.”
13 Ban wum ka Piita ne Joon tuꞌas ne sukpiꞌeuŋ la, ka ba miꞌ ye ba ane tadimnam, ka pu zamis siꞌel siꞌela, li lidigi ba hale ka ba baŋ ye ba daa bene Yesu saꞌan.
14 Ban nyet dau kane sa nye laafe ka o ziꞌe ba saꞌan la, ba pu baŋ ban na tuꞌas siꞌem n tisi ba ka li a yele.
15 Amaa ba yeli ba ye, ba yim kpeŋ. Ka ba yi. Ka ba buꞌos taaba ye,
16 “Ti na niŋ wala ne nimbama nwa? Nidib bane wusa be Jerusalem nwa baŋi ba nyalima tuumtitaꞌar la yela. Ti ku tunꞌe n kiꞌisi lii.
17 Amaa tiname na niŋ siꞌem ka bane n tum siꞌel la da yadigi n keŋ tuon ane ye, ti volisi ba ye ba mit ka ba lem tuꞌas yuꞌur nwa yela n tisi nidib yaꞌas.”
18 Dinzug ba buoli ba n yeli ba ye, ba mit ka ba lem tuꞌas bee paꞌal nidib Yesu yela yaꞌas.
19 Amaa ka Piita ne Joon lebis n yeli ba ye, “Li yaꞌa a suꞌum Winaꞌam tuon ye ti siak ya noor n gaad Winaꞌam noore, yanam tuꞌasim.
20 Ka tinam ku tunꞌe n niŋ siꞌela, asee ti tuꞌas bun lin ka ti nye ka wum la.”
21 Ka ba volisi ba yaꞌas ka basi ba ye ba kem, ka pu nye yela kan na ke ka ba daami ba, nidib wusa duꞌosid Winaꞌam yuꞌur suꞌuŋa, bun lin ka ba sa maal la zug.
22 Dau kane ka ba maal nyalimkaŋa ka o nye laafe la, daa gaad yuma piisnaasi.
Yadda Niŋidib la n sos sukpiꞌeuŋ la yela
23 Ban basi ba la, ka ba keŋi ba taaba saꞌan n tuꞌasi ba maalmaan kpeenmnam ne kpeenmnam la n yeli ba siꞌel wusa.
24 Ban wum li naae la, ka duꞌosi ba kukoya n yet Winaꞌam ne yaꞌam yinni ye, “Zugsob, one kaꞌ tiraana, one maal agol ne dunia ne kuꞌotitaꞌar ne bun line be li wusa poogin.
25 One da ke ka ti yaab David, on da a on tumtum la, tuꞌas ne Siig Suŋ paŋ n yel ye,
‘Bo niŋ ka dunia buudi wusa sunya pelig,
ka nidib tuꞌasid bun yaalis yela ?
26 Ka dunia naꞌanam due n ziꞌe,
ka bane soꞌe teŋ laꞌas taaba n zanꞌas Zugsob la ne Kiristo la men.’
27 Li ane yelmeŋir ye Herod ne Pontus Pilate daa laꞌas taaba teŋ kaŋa nwa ni, ne bane kaꞌ Jew dim, ne Israel nidib n zanꞌas Yesu, fu tumtumsuŋ, on ka fu ke ka o a Kiristo la.
28 Ba maal bun line wusa ka fu pun niŋi ziꞌel ne fu paŋ ne boodim la.
29 Zugsoba, nannanna gosim ban volisid tinam bane a fu tumtumnib la siꞌem, dinzugo tisimi ti sukpiꞌeuŋ wusa ka ti mooli fu labasuŋ la.
30 Fu paŋ yela kel ka bane benꞌed paam laafe, ka Yesu one a fu tumtumsuŋ la yuꞌur zug, tuumnyalima ne zanbina na maal.”
31 Ban sos Winaꞌam naae la, ka zinꞌig kan ka ba laꞌas la n damid. Ka Winaꞌam Siig Suŋ peꞌeli ba wusa. Ka ba tuꞌas Winaꞌam pianꞌad la ne sukpiꞌeuŋ.
Yadda niŋidib n pudugid siꞌel wusa ne taaba yela
32 Ka nidib bedego bane niŋ yadda la, mor yaꞌam yinni laꞌam ne tenꞌesa yinni. Ka nid baa yinni pu yel ye on mor siꞌel la, one soꞌe lii. Li ane ba wusa din.
33 Ka Tumtumnib la pianꞌad Zugsob Yesu kuꞌum vuꞌugir la ne paŋtitaꞌar ka yelsum bedego be ba wusa zutin.
34 Ba nidib bedego ban mor pood la, kuos li n mor ligidi la na,
35 n niŋ Tumtumnib la nuꞌusin. Ka ba pudug li n tis soꞌ mekama wusa boodim a siꞌem. Ka nid baa yinni kaꞌ ba saꞌan la, ka siꞌel poꞌog o.
36 Ka Josef kane a Levite buudi n yi Saipuros teŋin na, ka Tumtumnib la pud o yuꞌur Barnabas. (Ka li gbin yel ye, “One kpeꞌeŋid.”)
37 O daa kuosi o poog ka zaŋ ligidi la na niŋ Tumtumnib la nuꞌusin.