☰ TUUMA 16
16
Timoti n dol Paul ne Silas la yela
1 Ka ba keŋ paae Derbe ne Listra teensin na. Ka Winaꞌam nyaꞌandol daa be Listra ka o yuꞌur buon Timoti, on daa a Jew dim poꞌa biig. Ka o ma daa a yadda niŋid. Amaa ka o saam daa a Greek nid. 2 Ka Listra ne Ikonium yadda niŋidib daa pianꞌa o tuumsuma yela. 3 Ka Paul n daa bood ye Timoti dol o la zug ka o kpenꞌes o baŋo, bozugo Jew dim wusa bane daa be zinꞌig kan la daa miꞌ ye o saam daa ane Greek nid. 4 Ka ba keŋ yi teŋ teŋ n tuꞌasidi tisid yadda niŋidib la Winaꞌam Tumtumnib ne yadda niŋidib kpeenmnam bane be Jerusalem gbanꞌe siꞌem, ka yeli ba ye ba dol gbanꞌar kaŋa. 5 Ka yadda niŋidib la yadda daa kpeꞌeŋ ka ba kal paasid daar wusa.
Paul zaansuŋ Troas ni la yela
6 Ka ba keŋ yi Frigia ne Galatia teensin, Winaꞌam Siig Suŋ la pu ke ka ba pianꞌad Winaꞌam pianꞌad Asia teŋin la zug. 7 Ka ba paae Misia teŋ ben na n kpeꞌeŋ ye ba keŋ Bitinia teŋin. Amaa ka Yesu Siig pu siaki tisi ba suere. 8 Ka ba doli gaad Misia teŋin n keŋ sig Troas teŋin. 9 Ka li wenne zaansuŋ ne n kenn Paul saꞌan yuꞌuŋ kan na, ka o nye Masedonia dim dau ka o ziꞌen belim o ye “Kem Masedonia na n suŋi ti.” 10 Ka on nye zaansuŋ la ka ti tiꞌeb toꞌoto ye ti keŋ Masedonia teŋin, tiname gbanꞌe ye Winaꞌam buoli ti ye ti tuꞌas labasuŋ la n tisi ba la zug.
Lidia tiaker Filipi ni la yela
11 Ka ti kpenꞌ aaruŋ anina n kpaꞌa tituꞌaa keŋ Samotires teŋin. Ka beog nie ka ti keŋ Niapolis teŋin. 12 Ka ti yi anina keŋ Filipi teŋin line a teŋtitaꞌar Masedonia soꞌolim ni. Ka Filipi a Room dim soꞌolim. Ka ti zinꞌini anina dabisa biꞌela.
13 Ka vuꞌusum daar ka ti yi teŋin la n keŋ kolug baba, zinꞌikan ka ti tenꞌes ye ba puꞌusid Winaꞌam. Ka ti zinꞌi anina pianꞌa tis poꞌab bane laꞌas na. 14 Yinni one wum ti pianꞌad daa ane Tiatira teŋ poꞌa ka o yuꞌur buon Lidia. O daa kuosidne fuvenla ka pun puꞌusid Winaꞌam. Ka Zugsob la yoꞌog o potenꞌer ka o kelis Paul n pianꞌad siꞌel la suꞌuŋa. 15 Ka ti daa suu on ne o yidim Winaꞌam kuꞌom. Ka Lidia yeli ti ye, “Ya yaꞌa siak ye m sid niŋ Zugsob la yadda, kemi na zinꞌini m yin.” Ka ti siaki keŋ.
Paul n be sarega ni la yela
16 Ka tiname daa waꞌae puꞌusum zinꞌigin la, ka bipuŋ one a yamug ka kikirig dol la daa tuꞌos ti. O daa ane baꞌabugud ka o bugub la ni ka o nyet kpanꞌam bedego tisid bane soꞌe o la. 17 Ka o dol Paul ne tinam n tansid ye, “Nimbama nwa ane Winaꞌam one gaad bun zanꞌasa la tumtumnib, bane mooni yeti ya faangir la suer.” 18 Ka o tum neꞌeŋa dabisa bedego. Amaa ka li zab Paul hale, ka o fendigi yel kikirig la ye, “M yet uf ne Yesu Kiristo yuꞌur zug ye fu yim ka bas bipuŋ.” Ka kikirig la yi o saꞌan saŋkan la.
19 Amaa bane soꞌe o la baŋ ye tiꞌir kan ka ba daa mor ka nyet kpanꞌam la lem kaeꞌ la, dinzug ka ba gbanꞌe Paul ne Silas n veꞌegi ba kpenꞌ daꞌan bane soꞌe teŋ la tuon. 20 Ka ba more ba n keŋ one tuꞌasid antuꞌa la saꞌan n yel ye, “Nimbama nwa ane Jew dim bane saꞌami ti teŋ. 21 Ba paꞌane malima bane pu doli ti wadaa. Tinam a Room nidib la ti ku siaki dol malimbamaa.”
22 Ka nidib bedego laꞌase giligi ba ka one tuꞌasid antuꞌa la pidig Paul ne Silas fuud ne paŋ ka bas noor ye ba fiꞌebimi ba. 23 Ka ba buꞌu ba bedego ka kpenꞌesi ba sarega ni ka yel one guri sarega doog la ye o gosimi ba suꞌuŋa. 24 Ka ban yel neꞌeŋa la ka o kpenꞌesi ba doog kane be poogin la, ka loo ba noba taꞌal ne datitada.
25 Amaa ka yuꞌuŋ tisoos saŋa ka Paul ne Silas puꞌusid ka yuum yuuma n tisid Winaꞌam ka bane laꞌam be ne ba sarega ni la kelisid. 26 Ka toꞌoto ka teŋ dam hale ka sarega doog eenbir la dam. Ka zaꞌanoya wusa yoꞌog. Ka bana la yidig nidib la wusa ni. 27 Ka sarega gur la due gbeemin ka nye zaꞌanoya la yoꞌog la, ka tenꞌes ye ba suꞌane yi, ka fue suꞌug ye o ku o meŋ. 28 Amaa ka Paul tans ne kukor kpiꞌeuŋ ye, “Da poaꞌalim fu meŋa, ka ti wusa be kpela.”
29 Ka sarega gur la buol ka ba mor fitla na. Ka o vaꞌ due kpenꞌ kirid ne dabiem ka lu Paul ne Silas tuon. 30 Ka more ba yi na ka yel ye, “Dapa, m na niŋ wala ka nye faangire?”
31 Ka ba yel o ye, “Niŋim Zugsob Yesu yadda ka fun ne fu yidim wusa na nye faangir.” 32 Ka ba tuꞌas Zugsob la pianꞌad n tis on ne bane wusa daa be yin la. 33 Ka o noki ba yuꞌuŋkan la, n piesi ba fenꞌed la. Ka ba suu on ne o yidim wusa Winaꞌam kuꞌom. 34 Ka o more ba du o yin ka tisi ba diib. Ka li niŋ on ne o yidim wusa sumalisim, ban niŋ Winaꞌam yadda la zug.
35 Ka beog nie ka one tuꞌasid antuꞌa la tum o tumtumnib ye ba yel one gur sarega la ye, “Basim ka nidib ayi la n yi.” 36 Ka sarega gur la tuꞌas labaar la n tis Paul ye, “Antuꞌa tuꞌad la tis noor ye m ke ka ya yi. Dinzugo yiim keŋ baanlim.”
37 Ka Paul yel tumtumnib la ye, “Tinam ane Room teŋ dim. Amaa ba buꞌu ti nidibin ka pu wum ti noor pianꞌade, ka kpenꞌesi ti sarega ni. Ka nannanna ba yuꞌun yiisidi ti, ka li wenne suꞌadimnee. Ayei, kel ka ba meŋ kena n yiisi ti.”
38 Ka tumtumnib la keŋ yel antuꞌa tuꞌad la neꞌeŋa. Ka dabiem kpenꞌ ba, ban wum ye Paul ne Silas ane Room teŋ dim la zug. 39 Ka ba meŋ kena nweꞌe ba nuꞌug ka yiis ba ka belimi ba ye ba yim teŋin la. 40 Ka ba yi sarega la ni n keŋ kaae Lidia ka nye yadda niŋidib la, ka pianꞌa pianꞌad line kpeꞌeŋidi ba sunya, ka nyaan keŋ.
☰