13
Winaꞌam Siig Suŋ n gaŋ Barnabas ne Saul n tum la yela
1 Winaꞌam nodiꞌesidib ne paꞌanib daa be yadda niŋidib la soogin Antiok teŋin. Ba a Barnabas, ne Simeon Niger ne Lusius on yi Sairene na la, ne Manaen on ka ba daa ugus o naꞌab Herod yin la ne Saul.
2 Ka ban daa lo noor puꞌusid Zugsob la, ka Winaꞌam Siig Suŋ yeli ba ye, “Gaŋim Barnabas ne Saul ba gunni, ka ba tum tuum kan ka m gaŋi ba ye ba tum la.”
3 Ka ban lo noor ka sos Winaꞌam la, ka zaŋ ba nuꞌus paꞌali ba zutin ka tumi ba ka ba yi keŋ.
Saul n be Saipuros teŋin la yela
4 Ka Winaꞌam Siig Suŋ la n tumi ba la, ka ba keŋ Selusia teŋin n kpenꞌ aaruŋ anina n keŋ Saipuros soꞌolimin,
5 ka ba paae Salamis teŋin n mool Winaꞌam pianꞌad la Jew dim laꞌasug doodin. Ka Joon Maak me suŋi ba ne tuuma la.
6 Ka ban daa loꞌoŋ Saipuros teŋ kane ka kuꞌom giligi li la ni n paae Pafos na la, ka nye baꞌakolug daan ka o a Jew nid ka o maꞌ ye o ane Winaꞌam nodiꞌes, ka o yuꞌur buon Bar-Yesu.
7 O daa ane teŋ kan gomena la zua. Gomena la daa mor yaꞌam hale. O yuꞌur daa buon Sergius Paulus. Ka o buol Barnabas ne Saul, on bood ye o wum Winaꞌam pianꞌad la zug.
8 Amaa baꞌakolug daan Bar-Yesu bee Elimas line a Greek yuꞌur la, daa kpeꞌeŋ o meŋ n kiꞌis Saul ne Barnabas ye o saꞌam gomena la yadda niŋir.
9 Amaa Saul on ka ba buon Paul la, daa peꞌel ne Winaꞌam Siig Suŋ ka kpaꞌ gosid baꞌakolug daan la kii,
10 ka yel ye, “Fun one a Sutaana biig ne tuumsuma wusa biꞌem ne zam daana la, wala ka fu mood ye fu saꞌam Zugsob la suesuŋ la?
11 Gosima, Zugsob na namis uf. Fu na zuꞌom ka ku tunꞌe nyet saŋa biꞌela.”
Ka o kpelim zuꞌom n due n babin n bood ye nid veꞌ o.
12 Ka gomena la niŋ Zugsob yadda on nye bun line niŋ la wusa. Ka lin ka o zamis Zugsob la yela lidig o.
Paul n be Antiok line be Pisidia soꞌolim ni la yela
13 Ka Paul ne o tumtum taaba kpenꞌ aaruŋ n yi Pafos ni keŋ Perga teŋin line be Pamfilia soꞌolim ni. Ka Joon basi ba ka leb Jerusalem.
14 Ka ba daa yi Perga n gaadi paae Antiok line be Pisidia soꞌolim la. Ka Jew dim vuꞌusum daar ka ba keŋ laꞌasug doogin n zinꞌin.
15 Ka ban karem Winaꞌam wada ne Winaꞌam nodiꞌesidib gbana naae la, ka laꞌasug doog la kpeenmnam tumi ba saꞌan n yeli ba ye, “Ti zuanama, ya yaꞌa mor saꞌalug n na saꞌali nidib la, yanam tuꞌasimi li.”
16 Alazug ka Paul due n ziꞌe ka yibisi ba ne o nuꞌug ka yeli ba ye, “Israel nidib ne bane puꞌusid Winaꞌam wenne tinam la, kelisimi.
17 Winaꞌam one ka Israel dim puꞌusid la da gaŋi ti yaanam n duꞌosi ti buudi la, ban daa nam be Egipiti teŋin n a saam la. Ka Winaꞌam da more ba ne o paŋtitaꞌar la n yiisi ba Egipiti teŋin na.
18 Ka yuma piisnaasi ka o di suguru ne ba, ban daa be moogin la.
19 Ka o da saꞌam buudi ayopoi Keinan soꞌolim ni n tisi ba teŋ la ka ba soꞌe ka li a ba faar,
20 hale wuu yuma kobusnaasi ne piisnu.
“Ka lin nyaꞌaŋ la, ka o tisi ba antuꞌa tuꞌadib n ti paae nodiꞌes Samuel saŋa.
21 Ka ba sos ye ba boodne naꞌab. Ka Winaꞌam tisi ba Kihi biig Saul, one a Benjamin yaaŋ, ka o di naꞌam yuma piisnaasi.
22 Ka Winaꞌam n da pidigi Saul naꞌam la, ka gaŋ David ka o di naꞌam. Ka Winaꞌam yel ye, ‘M nye Jese biig David one paae m yaꞌam ka na tum line wusa ka m bood.’ ”
23 Ka Paul lem ye, “Naꞌab David yaas sisoogin ka Winaꞌam daa yiis faangid la n tis Israel dim, one a Yesu, wenne on da pun yel ziꞌel siꞌem la.
24 On da nam pu kena la, ka Joon daa mool n tis Israel nidib wusa ye ba tiakemi ba sunya ka diꞌe kuꞌom suub.
25 Ka Joon daa ti bood ye o naae o tuuma la, ka buꞌosi ba ye, ‘Ya tenꞌes ka m aa anoꞌone? Mam kaꞌ on ka ya gur laa. Amaa soꞌ na ken mam nyaꞌaŋ na, ka m pu suꞌum ye m pidig o taꞌadaa.’ ”
26 Ka Paul ye, “M zuanam bane a Abraham yaas, ne bane puꞌusid Winaꞌam wenne tinam la, Winaꞌam tum faangir labaar la na n tis tinam.
27 Nimbane daa be Jerusalem la ne ba kpeenmnam wusa daa pu baŋ ye one a faangid laa. Ka me pu baŋ nodiꞌesidib pianꞌad la ka ba karem vuꞌusum daar wusa la gbin ne. Ban kadi o saria n koos beꞌed la, ke ka nodiꞌesidib n da yel siꞌel la niŋ ameŋa.
28 Hale ne ban pu nye yelbeꞌed ne lin suꞌum ye o kpi la, ba kpelim sos Pilate ye o bas suer ka ba kuu o.
29 Ka ban daa niŋ siꞌel wusa wenne lin pun sob o yela siꞌem n naae la, ka sigis o dapuudir la zug n pinꞌ o yaugin.
30 Amaa Winaꞌam daa vuꞌug o kumin.
31 Ka dabisa bedego ka o nie o meŋ n paꞌal bane yi Galilee n dol o keŋ Jerusalem na la, ka ba nye o. Ka nannanna ba tuꞌas nidib ban nye o yela siꞌem la.
32 “Ka tinam mor labasuŋ la n keenn ya saꞌan na. Lin ka Winaꞌam da pun yel n ziꞌeli ti yaanam la,
33 line nwa niŋ ameŋa n tis tinam bane aa ba yaas la, on vuꞌug Yesu kumin la. Li wenne lin sob yuuma gbauŋin yuum ayi daan poogin siꞌem la ye,
‘Fu ane man Biig.
Zina ka m lieb fu saam.’
34 Winaꞌam n daa vuꞌug Yesu kumin la paꞌal ye o niŋgbiŋ ku punꞌe, neꞌeŋa yela la ka o da pun yel o gbauŋ poogin la ye,
‘M na tis uf yelsum kan ka m da pun yel ziꞌel David la.’
35 Dinzug o lem yel o yuuma gbauŋ poogin zinꞌisiꞌa yaꞌas ye,
‘Fu ku bas fu ninsuŋ la ka o punꞌe.’
36 “David da tum line paae Winaꞌam yaꞌam, o meŋ zumaana win la, ka kpi. Ka ba mum o o yaanam saꞌan ka o niŋgbiŋ punꞌe.
37 Amaa on ka Winaꞌam vuꞌug o kumin la, o pu punꞌee.
38 “Dinzugo m zuanama, baŋim ye dau kaŋa nwa maꞌasim zug ka tuumbeꞌed yiisib yela mooni ya saꞌan.
39 On zug on mekama n niŋ o yadda Winaꞌam na yiis o tuumbeꞌed lin wusa ka Moses wada daa ku tunꞌe yiis la bas.
40 Dinzugo guꞌusim ka yela ban ka Winaꞌam nodiꞌesidib da yel la da luu ya zutin ne.
41 ‘Gosimi yanam bane a niŋkiꞌisidib la.
Ya na vol yaꞌam n kpi.
Man ya Winaꞌam na tum tuuma ya zumaana nwa ni
ka ya ku siak ye li sid niŋeya,
hale baa soꞌ yaꞌa peligi o poog paꞌali yaa.’ ”
42 Ka Paul ne Barnabas ti yit la, ka nidib la sosi ba ye ba lem vuꞌusum daar kane ken na la n tuꞌasi ba bun lin ka ba tuꞌasi ba la yaꞌas.
43 Ka laꞌasug la widig la, ka Jew dim bedego ne bane kaꞌ Jew dim buudi, ka lee dol Jew dim suer la, daa dol Paul ne Barnabas. Ka ba saꞌali ba ye ba kpelim be Winaꞌam yelsum poogin.
44 Ka vuꞌusum daar lem paae yaꞌas la, ka teŋ la dim sieba bedego n laꞌas taaba ye ba wum Winaꞌam pianꞌad la.
45 Ka Jew dim la n nye nidib bedego la ka fufum gbanꞌe ba. Ka ba kiꞌis Paul n tuꞌas siꞌel la, ka pianꞌad o pianꞌabeꞌed.
46 Amaa Paul ne Barnabas tuꞌasi ba ne sukpiꞌeuŋ n yeli ba ye, “Li suꞌum ka ti tuꞌas Winaꞌam pianꞌad la n tisi ya yiiga. Amaa yanam zanꞌas li, ka kadi ya meŋ saria ye ya pu nar ye ya diꞌe nyovur line kaꞌ naar laa. Din yela ti na fendigi keŋ bane kaꞌ Jew dim buudi la saꞌan.
47 Ka noyelug kane ka Zugsob la yel tinam la dolne lin da sob ye,
‘M gaŋ uf ka fu na ke ka bane kaꞌ Jew dim buudi la baŋ Winaꞌam yela nyain,
ka dunia dim wusa na nyet faangir fu labaar moolug la ni.’ ”
48 Ka bane kaꞌ Jew dim buudi la n wum neꞌeŋa la, li niŋi ba malisim hale. Ka ba duꞌos Winaꞌam pianꞌad suꞌuŋa. Ka ban wusa ka Winaꞌam daa gaŋ ye ba nye nyovur line kaꞌ naar la niŋ o yadda.
49 Ka Zugsob pianꞌad la daa mool soꞌolim kan wusa ni.
50 Amaa Jew dim daa ke ka poꞌab bane ka ba yuꞌur du teŋin la ka ba kaꞌ Jew dim buudi ka lee dol Jew dim suer la, ne dap bane a tuongatib teŋ la ni sunya pelig ne Paul ne Barnabas. Ka ba siꞌiŋe namisi ba n kadi ba n yiis ba soꞌolim la ni.
51 Ka Paul ne Barnabas pisigi ba nuꞌus, ka li paꞌal ye ba baꞌa kaꞌ ne baa, ka yi n keŋ Ikonium teŋin.
52 Ka nyaꞌandolib la mor sumalisim. Ka Winaꞌam Siig Suŋ bee ba ni.