3
Zoaniz ñetiv mañoohat ev
Matiu 3:1-12; Mak 1:1-8; Zon 1:19-28
1 Met Sekaraiaz rop Zoan ham betez nonair nai bon heharah sat hehan, Godihö piin ñetiv mañooh. Met mañooh-porah Roma aban zei maposikaroz korav ahop ravat heh-popuz abatao Sisa Taiberias, met pi poek map ahop ravat hehan krismasañ 14 bon hatahan modavoz ñon nari bon tah. Met Sisa popuz irih Zudaholoz zeisik aban ahö ravat heh-popuz abatao Pontias Pailat, met modap Erod pop amun pi Galili zei mod posikaz ahop ravat hehan, pim nanep Pilip pop amun Ituria ma Trakonitis zei posikaroz ahop ravat heh, met Lisanias pi Abilene zei posiz ahop ravat heh.
2 Met Zudia zeisik aban Anasir Kaiapas parup anumaihol bareñ elat mañaroohariz aban ahoñariv ravat heh. Met ev menoh-ahö eperi heh-porah God Zoanin pim tohopanezat ñetiv bar mañahan hateveteh.
3 Tahapuh pi ham betez porah hehaek betet Zodan iveriz nakoe zei posizañ sohot ñetï epov añarabon mañovai sooh, “Met arim horiñ map betet loporizaro borourepeken ivoh emeehoman, God arim horï tovai emameg-poñ ol betehopan.” Pot Zoan añarabon mañovai sooh.
4 Met batam propet aban Aisaia pim tepatak epat menahan hez,
Met ham betez narah aban nap het ñeo ñarah epat hahopan, “Arim Amip emapaneg, pimaz homet ari ñai bizat pim nonor ba oñ batohozei.”
5 Tat pi tin emohopanez nonair nai ur elat gupoñ ked mezat dañeñ menat nonor pekü hezaek ba oñ batat nonoroh heleñ hezaek tiz betet batin batohopeken tin opep ravohop.
6 Tapanen dari añarab mapori God maot pimeri ba avatapanez hahan hez-popun etet hodad ravook. Aisaia 40:3-5
Pot Aisaia menahan hezaek Zoan emat menahan hez-taput toohan rotapuv ou ravooh.
7 Met Zoan propet aban Aisaiaz menahan hez-taput tat Godiz ñetiv añarabon mañovai soohan, añarab ahovokaro piuhö ivoh memeehopanez hat emat topourah. Tahan pi parun epat mañah, “Ae, ari hamal ñaro eperi, tokat God arim horï tamegiñiz hañiv etapanez ñetiv tairapuhö hahan ari hatevetet ivoh emeeman pov bazei manepek hat nehaz emeg?
8 Met, ‘Deim horiñ betet loporizaro boroureg,’ pot hapek, povoz tin tovai sohopeken arim tohopekezavon dei etet, ‘Rotap parum horiñ betet hodad tinao maot bah,’ pot arimaz haok. Met arimam tovai, ‘Abraam deim iz mim tinap ok, povoz dei pim zut Godiz ñarohol ravat hez,’ pot hamegi? Evo, pot ari haotunei. Met rotap ne arin epat añom, God rekot hel upai epeñ bat Abraamizari matut tapanen ou ravat pim ñarohol ravat hepan.
9 Met God zi kapoñik enarinañ menapanez baval hat kip tat ñai bizat etet hez. Tat zi tairañ uloñ tin navad hepanez poñin etet pi menat itiñadek betepanen map ñadapan.”
10 Pot mañahan añarab hatevetet ñaihet tat piin epat at mañah, “Ui erom, povoz dei tair tak?”
11 Pot at mañahan pi ñetï hañiv parun epat mañah, “Met aban tairap dim houloñariv oraepanezap pimau nap bat aban mod dimip bon hepanezap manap. Ma aban gipiz ahö oraepanezap pi zu taput gipiz bon hepanezari natü manap.”
12 Pot parun mañovai aban takes monis booh-nari piuhö ivoh memeepanez hat honeo emat hehaek paru piin epat at mañah, “Añairameñip ae, met dei amun tair tak?”
13 Pot at mañahan pi hañiv parun epat mañah, “Met ari takes monisiz Roma gavman aban ahoriz hamahat tat monï pos tinam bohozei, oñ monï modas revah bizapanen arim bepekez añarabon mañotunei.”
14 Pot mañahan ñai aban nari honeo emat hehaek piin epat at mañah, “Erom, dei amun tair tak?” Pot hahan pi parun epat mañah, “Met ari tovai kez tat añarab arim modariz monis givogï botunei, ma moreg hat paru nari ñevok basat bizotunei, ma arim gogovoz monis anohopanezarah revah modas bizat anohopanez homet, ‘Darim monï mod nas revah bizat anapan nak,’ pot haotunei.”
15 Met añarab Zoaniz mañoohat hatevetet parumam biñ ravat nae nap epat mañooh, “Met okop God meepanen erat eñizapanez haohap Kristo tapupu? Ma tairapuhö ok hamah?” Pot pimaz home houloñ homet haoh.
16 Tahan Zoan hatevetet parun epat mañah, “Evo, met aban arim hameg-okop nem tokat emapanepuh pim kezavohö nem kezao ritou metat hepan. Met pop pi aban abat ahovonañap ok, oñ ne aban goe abatao bon betezap ev, povoz ne pi aban ahop hahö-popunañ toutat deip ñetiv hakaz rekot bon. Met ne iv et pei upaivonañ emeamoh, oñ popuhoh Godiz Pul tinap ari añarab anapan. Tapanen dari itiñadek nai beteamegin ñadat bon tamahavoz zut arim horiñ bavon batapan.
17 Met aban hamoh-pop pim savoris bat hez. Tamahaek aban nari uitikapiz gogot tovai uit kosiñ bamain batamahapuh, kos poñ savorisinañ holat itiñadek beteamahan ñadamahan uit tinakap parum zeiñik bat em biamahavoz zut pi ari añarab pot etohopan.”
18 Met Zoan parun pot mañat Godiz baiñetinao añarab tin hatevetehopanez hat ñetï nañir nañitï bavatat parun mañooh.
Zoan kakam zeimakeh memerizah
Matiu 14:3-4; Mak 6:17-18
19 Met Erod Galili zeisiz aban ahö ravat heh-pop pim nanepuz añap Erodias batep tat bat hehapuh horï modañ amun tovai sooh, povoz Zoan aban popun ñe kezao epat mañah, “Ni horï ahoñ tameñip ok.”
20 Pot mañahan Erod kaev ravat horï ahö modao tat Zoan memeriipanez mañahan paru pi bat kakam zeimakeh memerizah.
Zoan Iesu ivoh memeeh-ñetiv
Matiu 3:13-17; Mak 1:9-11
21 Met Zoan garos kakam zeimakeh bat namemeriz heharah pi añarab modari ivoh memeohanam, Iesu amun piitï sahan ivoh memeeh. Tahan Iesu mañ haohan Zoan etet hehan abar elat okat epat tahan,
22 Godiz Pul Tinap id pururuapuz zut Iesuz gagaih erah. Tahan abarahanañ ñe nao epat hah, “Ni nem rop, ne loporï nihar nanat nim tameñivon etet nimaz ahoam biñ ravamoh,” pot hah.
Iesuz iz mimiholoz abatañ ev
Matiu 1:1-17
23 Met Iesuz krismasañ 30 ravahan pi pim gogot kapot tat tovai emooh. Met pi popuz papap Zosep, pot añarab homet heh.
24 Met Zosepez papapuz abatao Ilai,
met Ilai popuz papapuz abatao Matat,
met Matat popuz papapuz abatao Livai,
met Livai popuz papapuz abatao Melkai,
met Melkai popuz papapuz abatao Zanai,
met Zanai popuz papapuz abatao Zosep.
25 Met Zosepez papapuz abatao Matataias,
met Matataias popuz papapuz abatao Emos,
met Emos popuz papapuz abatao Neam,
met Neam popuz papapuz abatao Eslai,
met Eslai popuz papapuz abatao Nagai.
26 Met Nagai popuz papapuz abatao Meat,
met Meat popuz papapuz abatao Matataias,
met Matataias popuz papapuz abatao Semen,
met Semeniz papapuz abatao Zosek.
27 Met Zosekez papapuz abatao Zoda,
met Zodaz papapuz abatao Zoanan,
met Zoananaz papapuz abatao Resa,
met Resaz papapuz abatao Serubabel,
met Serubabel popuz papapuz abatao Sialtiel,
met Sialtieliz papapuz abatao Nerai.
28 Met Nerai popuz papapuz abatao Melkai,
met Melkaiz papapuz abatao Edai,
met Edai popuz papapuz abatao Kosam,
met Kosamaz papapuz abatao Elmadam,
met Elmadam popuz papapuz abatao Er.
29 Met Era popuz papapuz abatao Zosua,
met Zosua popuz papapuz abatao Eliese,
met Eliesez papapuz abatao Zorim,
met Zorim popuz papapuz abatao Matat,
met Matat popuz papapuz abatao Livai.
30 Met Livaiz papapuz abatao Simion,
met Simion popuz papapuz abatao Zuda,
met Zuda popuz papapuz abatao Zosep,
met Zosepez papapuz abatao Zonam,
met Zonam popuz papapuz abatao Elaiakim.
31 Met Elaiakimiz papapuz abatao Melia,
met Meliaz papapuz abatao Mena,
met Mena popuz papapuz abatao Matata,
met Matataz papapuz abatao Netan,
met Netan popuz papapuz abatao Devid.
32 Met Devid popuz papapuz abatao Zesi,
met Zesiz papapuz abatao Obet,
met Obet popuz papapuz abatao Boas,
met Boas popuz papapuz abatao Salmon,
met Salmoniz papapuz abatao Nason.
33 Met Nason popuz papapuz abatao Aminadap,
met Aminadapiz papapuz abatao Atmin,
met Atmin popuz papapuz abatao Anai,
met Anaiz papapuz abatao Esron,
met Esron popuz papapuz abatao Peres,
met Peresiz papapuz abatao Zuda.
34 Met Zudaz papapuz abatao Zekop,
met Zekop popuz papapuz abatao Aisak,
met Aisak popuz papapuz abatao Abraam,
met Abraamiz papapuz abatao Tera,
met Teraz papapuz abatao Neo.
35 Met Neoz papapuz abatao Serak,
met Serak popuz papapuz abatao Reu,
met Reuz papapuz abatao Pelek,
met Pelek popuz papapuz abatao Ebe,
met Ebez papapuz abatao Sela.
36 Met Selaz papapuz abatao Kainan,
met Kainan popuz papapuz abatao Apaksat,
met Apak-sat popuz papapuz abatao Siem,
met Siem popuz papapuz abatao Noa,
met Noaz papapuz abatao Lamek.
37 Met Lamek popuz papapuz abatao Metusela,
met Metuselaz papapuz abatao Inok,
met Inok popuz papapuz abatao Zaret,
met Zaret popuz papapuz abatao Maalalel,
met Maalalel popuz papapuz abatao Kenan.
38 Met Kenaniz papapuz abatao Inos,
met Inosiz papapuz abatao Set,
met Set popuz papapuz abatao Adam,
met Adam God kapot tat matut tahan hehap ok.