19
Babilon kamun kinde orkwa ipre yomba heven meglkwa gun pond yeingwa
1 Taragl i plau dungo okuwo na pirka taragl ta heven suna yomba merkinde ka kande dingwa mereyegl ungwa! I yegl dingwa:
“God kangiye ake mitna
imbo endinamga! Nono
Godno no ere-yungwa, ye
kangiye kande pango ana
yombuglo pond pangwa.
2 Ye ka kaima ya mambuno
du-wakai mina yomba yumbu
sungwa, ambu kande yagl
kunogl gundungwa. God
erekinde eretongwa. Ambumo
i yagl kunogl gundungwa
mambuno i makandle yomba
ombuno ditongo mambuno
kinde ye ormere yegl erikwa,
te God kongunmo yomba
wagle sigoglkwa. Ormara ipre
God topo kinde te ikine endungwa.”
3 Ana ye aglke kordagl yegl dingwa:
“Nono Godno dembiyesi
mitna imbo endinamga! Dumo
kande i detenge orko endi
ingemo aimande aimande
ende egli pi pangwa.”
4 Ende okuna eingwa yomba 24 ya te taragl kor-meglkwa 4 ye eremogl God king boglmo mina amedi moglkwa i yange goglkuno bondugl tendre dembiye karaugl erete yegl dingwa:
“Kaima, Nono God kangiye
ake mitna imbo endinamga!”
5 Ana king boglmo mina ka ta yegl dungwa:
“God kongunmo yomba
prapra God kunduglmo
geglkwa, te yomba yoko ya
yomba kande wagle ene
prapra nono Godno dembiyesi mitna imbo endiyo!”
Sipsip Nangigle ambu ingwa pre kaiya mokna bir neingwa
6 Ana taragl ta yomba merkinde kaima ka dimere yegl digo te nigl kande sungwa mudumere yegl ya kamun gurgagla pond dumere yeglmere digo na pirka i yegl dingwa:
“God dembiyesi mitna imbo
endiyo, sraglpre, ye Yaglkande nono Godno ye
yombuglo kande pango erme king kaima moglkwa.
7 Nono wakai pir gunyei
kangiye kande tenamga!
Sraglpre, Sipsip Nangigle ye
ambu inambuka engemo
yongo te ye inambuka
ambumo i yene akekun ere kondungwa.
8 Ye gagl suna wakai kruwo
pesindre ambuglangesi tange
yongwa endinambuka pre
teingwa! Gagl suna kruwo i
God yombama mambunono
du-yene erikwa i ombuno dungwa.”
9 Ana angelo ta yegl dinarkwa, “Ka i muno boglo, ‘God digaglko yomba Sipsip Nangigle ambu ingwa kaiya mokna bir kande nemara wingwa yomba ye gun yenaglkwa.’ ” Ye ka i ama di ainungwa, “Ka i God kamo kaima.”
10 Yegl dinarko na yange goglkona bondugl dembiye karaugl ere tenagledi erika, ba ye mane dinare yegl dungwa, “Yegl erekro! Na ene angitnma wagle bogl kongun suwara ounga, ene pirngi dindre Yesus kangiye dipene endingwa. Ene God suwara dembiye karaugl ereteiyo, nono pirkan ounga, Yesus kangiye dipene endingwa yomba i Spirit akeple dungwa.”
Yomba ta bugla-hos kruwo moko bolamugl amedi moglkwa
11 Na kaninga heven audungo bugla-hos kruwo ta nongagle moglkwa, te yomba bolamugl amedi moglkwa, ye kangiye yegl, “Ka Kaima ya Mambuno Du-wakai Kongun Pamere Orkwa,” ana ye yomba yumbusi tendre te kunda orkwa i ye mambuno du-wakai pamere kuno ere orkwa.
12 Ye ongumuglo koglkoglo donga bauglo mereyegl orko te bre mina king bre gagl merkinde ye bre mina pangwa. Ye nangiye mina kangiye ta beglko pangwa i yomba ta pirkan erekrikwa, ba ye yene pirkan orkwa.
13 Ye gaglmo suna olto endungwa i bormai dangungwa, te ye kangiye “God Kamo” we dingwa.
14 Ye endongo, heven kimbirnem wagle prapra buglano bugla-hos kruwo mina bolamugl amedi mogl omara eingwa, ye gaglsuna endingwa i kruwo wakai yene te pesi yongwa.
15 Yomba bugla-hos kruwo mina mogl ende okuna ongwa yagle ye dra mina dikumba prak muglo nongwa ende menda ungwa. Dikumba prakmo i mina yomba koglkoglo makandle mogl-eingwa i sigorambuka. Te ye ain buglo ake mogltre ana ain i mina yomba sugl morambuka, te wain mongo siderwagl ere nuglo dukingwa kombuglo i mina ye wain mongo engre deruwagl erambuka. I God Giglekui dungwa dem pond kumbrukwa i ombuno dinambuka.
16 Ana gaglmo suna mina ya te bikiye mina ye kangiye yegl beglko pangwa:
King prapra ye kingno mogltre
te yomba kande prapra ye
yombano kande moglkwa.
17 Ana na kaninga angelo ta ande mina suna andigl moglkwa. Ye ka kande di kua prapra kamun mitna pigladi wanmeglkwa i tongwa, “Wiyo, God kaiya mokna bir kande tena ormara i ene umakai siyo.
18 Ene umakai sindre, king wagle ya kimbirnem yomba kande wagle ya te yomba giglekui dingwa ya bugla-hos prapra ya te bugla-hos ausingwa yomba ya te yomba prapra ya te yomba yoko wanmeglkwa ya te nigl-kongun yoko yomba ya te yomba kande wagle ya te yomba kindewond prapra nangino ne kondinaglkwa.”
19 Na kaninga kambu are ya makandle king prapra kimbirnemno wagle bogl ye yomba bugla-hos mina amedi moglkwa i kunda bogl tenapre ye kimbirmo nem wagle bogl wu makai singwa.
20 Ba ye eremogl kambu are ya propet kakimbi kane singwa, propet kakimbi diu kanekane kambu are ongumuglo mina orkwa. Ye diu ormara i mina yomba kambu are munomo indre te kuiyamo dembiye karaugl erikwa yomba i bakagl tongwa. Ye suwo-akiye kor-mogl pambriko piyasi murmaugl atne kombuglo salpa de bauglo ere moglmara endingwa.
21 Ana bugla-hos mina amedi moglkwa yagle ye dikumba prak akete akiye nongwa dra mina menda ungwa ikra mina yomba prapra sigogl kondungwa. Ana kua prapra wu ye nangino ya miyeno neingo dano orkwa.