4
Pʋ ‑Yusu a ꞊haantitie 'a ‑nɛ ti
1 ‑Nyrɔwɔ di 'ʋ 'nɩ nyre, ‑Yusu 'Klɩsʋ 'mʋ di de, ɛ 'mʋ nyibli a pɛpɛ win kɩ ‑kɔɔ ‑nɩ, 'kʋkʋnyibli kɔ 'klɔnɩnyibli 'hʋɛn‑, ɛ 'mʋ ꞊nʋ ‑bati lɛ ‑pʋʋ ‑nɩ. Ɛ nɔ‑ nu꞊o, 'nɩ nyɛɛ ‑mʋ lɛ, 'kɩ 'ʋ Nyɩsʋa ye', kɔ 'kɩ 'ʋ ‑Yusu 'Klɩsʋ ye',
2 pʋ nyibli ꞊haantitie. 'Nɛɛ ꞊nɛ kɩ bʋ, 'ye ꞊bɩɩ nyibli yɩ 'a 'wɩnwɩɩn nɩ ‑hʋɛ, 'ye ꞊bɩɩ ʋ 'yɛ nɩ ‑hʋa 'a 'wɩnwɩɩn. 'Bʋ mɔ, nyibli 'bʋ yɩ dɛ 'kuku nɩ ni, lee ꞊nʋ, bʋ hie 'ʋ dɛ 'kuku a 'mʋ, 'a nunuo bʋ, ‑nyi ꞊nʋ 'klɩ, 'kɩ bʋ nu ꞊haandɛ. Tɔɔ ꞊nʋ, 'kɩ 'lɩ ꞊wlʋ a 'lɩla 'kwli.
3 Ɛ di kɔ ti, ɛ 'mʋ 'ʋ nyre, ‑ɛ kɔ 'yri nyibli 'yɛ nɩ di nyibli ‑bʋ, ‑ʋ tʋɛ ꞊nʋ ‑tɩ a ‑tɛɛ nʋa yɩ bʋ nɩ pʋ. Kɛɛ, ʋ di꞊e 'nɩ ‑hʋa, 'kɩ bʋ nu ‑tɛblɩ ‑mʋ', ‑ɛ nyre yɩ. Ɛ nɔ‑ kɔ ‑tɩ, ʋ 'mʋ hɩtɔɔnyʋ lɛ 'kukue ‑nɩ. Hɩtɔɔnyʋ a 'mʋ, ʋ di 'nɩ ‑hʋ. 'Bʋ yɩ 'kɩ hɩtɔɔnyʋ a 'mʋ nʋa yɩ bʋ nɩ pɩ, ‑ɛ ‑bɩ 'waa plɔ ble nɩ.
4 Ʋ 'yɩ 'lɩ꞊ɩ 'lɩ ‑wɛ, bʋ pʋ 'kɩ ‑tɩ a ‑tɛɛ nʋa yɩ bʋ, hɩtɔɔlɛ nɩ ‑do, ɛ nɔ‑ ʋ di nʋa yɩ bʋ pʋ.
5 Kɛɛ, ‑mɔ ‑bɩ, 'cibi 'ʋ ‑na dɩɔnʋ a win a kɩkɔɔlɛ, 'ye ꞊hɩʋɛn, pʋ nyibli ‑Yusu a ꞊haantitie. ‑Kʋan ‑mʋ', Nyɩsʋa ‑nyi ‑mʋ, gba꞊a 'lu ‑mɔ, ‑bʋ ‑yra꞊a 'lu.
6 'Mɔ ‑bɩ, ti nyre 'ʋ nɩ, 'na 'kʋkʋti 'mʋɛ yrɛ. 'N 'wɩ꞊ɩ ‑cɔhlʋn*, ʋ di Nyɩsʋa ‑pie ‑nɩ yɩ.
7 'Kɩ 'lɩ 'na ꞊wlʋ a pɛpɛ kɩ, 'n nu ‑Yusu 'Klɩsʋ a ‑kʋan nɩ, ꞊wɩ yɩ ꞊gbapʋnyɔ. ‑Kʋan, Nyɩsʋa ‑nyi 'mʋ ꞊bʋ nu, 'n ‑yra꞊a 'lu nɩ, ꞊wɩ yɩ cigbɛ'gbanyɔ, ‑ɛ ‑yra 'a cigbɛ a 'gbʋgba 'lu. ‑Tɛblɩ ‑mʋ', ‑a kuo ꞊wlʋ yɩ, 'n ꞊tuu 'ʋ꞊ʋ nɩ ‑tɛɛ.
8 'N yi꞊e nɩ, ‑ɛ mɔ, Nyɩsʋa ‑wɛ 'na ꞊haandɛ gbagbʋ ‑mɔ, 'kɩ 'lɩ yakɔ 'kwli, ‑kɔtɩ ɛ 'sii 'ʋ 'mʋ yɩ, 'kɩ 'ʋ 'a dɩɔnʋ ye'. ꞊Haandɛ gbagbʋ a 'mʋ, ɛ 'wɩ꞊ɩ ‑gʋlʋklaʋn* yɩ, ʋ yɩ cigbɛ'gbanyɔ ‑mʋ', ‑ɛ ‑ha 'ʋ 'a 'bio 'hru wlɔn ‑nyi. ‑Aan Kʋkɔnyɔ ‑mʋ', ‑ɛ pɩ ‑tɛɛ a ‑bati, ‑nyrɔwɔ ‑mʋ' ‑kɔ 'yri ɛ di 'ʋ nyibli ‑bati lɛ ‑pʋʋ ‑nɩ, 'kɩ ɛ di 'ʋ 'mʋ ꞊haandɛ a 'mʋ ‑nyii ‑nɩ. Ɛ 'yɩ 'mɔ nɩ ‑do 'pa‑, ɛ 'nɩ ‑nyi꞊e 'mɔ꞊ɔ nɩ. Kɛɛ, nyibli a pɛpɛ ‑mʋ', ‑ʋ nʋɛ ꞊nɛ, 'tɩ‑ ‑ʋ yɩ꞊ɩ ‑ple, ʋ nʋ‑ ɛ di꞊e ‑nyi.
Pɔlʋ ‑hʋɛ꞊ɛ nɩ, 'kɩ Timote bʋ di 'lɩ꞊ɩ ‑mɔ
9 ꞊Tu 'ʋ 'klɩ, ꞊mʋ 'nɛ‑ 'mʋ ‑mɔ di ‑tɛ ti nɛ ‑bʋ,
10 ‑kɔtɩ Demasɩ hie 'ʋ 'mʋ bʋ, 'klɔ a ‑tɛblɩ a nʋɛlɛ a ‑tɩ, 'ɛ mu 'lɩ Tesalonikɩdɩɔ 'kwli. Klɛsasɩ ‑mɔ ‑bɩ, 'kɩ ɛ mu 'lɩ Galatɩblʋgba 'kwli, Titɩ ‑mɔ ‑bɩ, ɛ nɔ‑ mu 'lɩ Damatiblʋgba 'kwli.
11 Luku nɩ ‑do, ɛ nɔ‑ nɩ mɔ 'mʋ 'hʋɩ. 'Bʋ mɔ, ꞊nɩ yɩ nɩ di, ‑ɛ ‑bɩ ‑kɔ Makɩ 'hʋɛn‑ ba di, ‑kɔtɩ ɛ ‑wɛ 'lɩ bʋ ‑hɛɛ 'mʋ nɩ, 'kɩ 'ʋ ‑kʋan a ‑ta'.
12 Tisikɩ ‑mɔ ‑bɩ, 'kɩ 'n lee 'lɩ꞊ɩ Efɛsɩdɩɔ 'kwli.
13 'Bʋ mɔ, ꞊nɩ yɩ nɩ di, 'kɩ ‑bʋ naa 'lɩ Trʋasɩdɩɔ 'kwli, 'kɩ 'lɩ nyiblo ‑mʋ', ‑ɛ mɔ Kalʋpusɩ ‑mɔ, ꞊mʋ 'mʋ 'na cɛkʋɛtɩ ‑mʋ', 'n hie 'lɩ bʋ yɩ ya. Ya 'crɩɩn ‑mʋ' ‑wɛ, sɛyɩ‑sɛyɩ 'a dɛ ‑mʋ', ʋ nu mamʋɩkʋɛ, ʋ ‑nu.
14 ‑Tɛblɩblanyɔ ‑mʋ', ‑ɛ mɔ Alɛsadrɩ, ɛ nuu 'mʋ 'crɛ lɛ dɩakɩ. Dɛ ‑mʋ', ɛ nu 'mʋ ‑mɔ, ‑aan Kʋkɔnyɔ, nɔ‑ di꞊e 'a 'pɛɛlɛ ‑nyi.
15 ‑Na 'mumu, ꞊tu ‑na dɩɔnʋ 'yie, ɛ 'nɩ ꞊ha ‑mʋ 'crɛ lɛ ‑nuu ‑nɩ ‑wɛ, ‑kɔtɩ ɛ 'yɩ ‑aan tɔɔwin ‑nʋɛ ‑nɩ.
16 Yɩ‑hɛ‑nyrɔwɔ, ‑ɛ kɔ 'kwli ʋ gba 'lɩ 'mʋ ‑batipʋʋlɛ', ‑tɛ 'n ‑hɩhɩa ꞊nʋ klɛ, ‑ɛ mɔ, 'n 'yɩ dɛ ‑hʋan ꞊dʋ ‑nu, nyiblo ꞊dʋ 'yɩ 'ʋ ‑di, 'kɩ bʋ ‑hɛɛ 'mʋ. 'Waa pɛpɛ, ʋ hie 'ʋ 'mʋ bʋ. Dɛ ‑mʋ', ʋ nu 'mʋ ‑mɔ, Nyɩsʋa bʋ ‑hru 'a ‑tɩ ‑mɔ.
17 Kɛɛ, ‑aan Kʋkɔnyɔ, nɔ‑ 'yɩ 'ʋ 'mʋ bʋ ‑hie. Ɛ nɔ‑ ‑nyi 'mʋ 'klɩ, 'kɩ ꞊bʋ hla Nyɩsʋa a ‑tɩ, dakɔ a nyibli a pɛpɛ 'ʋ 'wɩn. Kʋkɔnyɔ a 'klɩ, nɔ‑ nu꞊o ‑wɛ, 'kɩ ‑bati 'yɩ 'mʋ ‑klɔ, 'nɩ ꞊ta 'lɩ kɔkɔ' wlɔn.
18 'N yi꞊e nɩ, ‑ɛ mɔ, ‑aan Kʋkɔnyɔ di 'mʋ 'nɩ ꞊gblɛ, 'kɩ 'ʋ 'a ‑nɛ yɩnyredɛ ꞊dʋ a ‑ta', kɔ, ɛ di ꞊tu 'mʋ 'yie, 'mʋ 'lɩ yakɔ 'kwli mu, ‑tɛ ‑mʋ', ɛ kɔɔ 'lɩ nyibli win kɩ. Ba 'de ‑ba pʋ꞊ʋ 'nyrɛ lɛ, ‑tɛ 'klɔ tɛ yɩ bʋ. Kɛ‑ bʋ nɩ 'mʋ.
'Bɛtilɛ
19 'N 'bɛti Plisilɩ kɔ Akilasɩ 'hʋɛn‑, kɔ, 'n 'bɛti Onesifɔlɩ kɔ 'a 'kayubʋkʋɛ 'hʋɛn‑.
20 'Kɩ Elasɩtɩ hie 'lɩ Kolɛtɩdɩɔ 'kwli. Trofimʋ ‑mɔ ‑bɩ, 'a 'hʋɩ a hinhren a ‑tɩ, 'kɩ 'n hie 'lɩ꞊ɩ Milɛtɩdɩɔ 'kwli bʋ.
21 ꞊Tu 'ʋ 'klɩ, ‑bʋ di 'lɩ, 'tɩ‑ cɛ a ti 'mʋ 'ʋ nyre.
Ebulusɩ, kɔ Pudasɩ, kɔ Linusɩ, kɔ nʋgba ‑mʋ', ‑ɛ mɔ Klodia, kɔ Nyɩsʋa a nyibli a pɛpɛ ‑bɩ ‑mʋ' 'hʋɛn‑, ʋ 'bɛti ‑mʋ.
22 ‑Aan Kʋkɔnyɔ bʋ nɩ 'ʋ ‑mʋ ‑mɔ, kɔ, bʋ nu 'aan pɛpɛ ꞊haandɛ ‑mɔ.