2
Ba ꞊tu 'aan dɩɔnʋ 'yie, 'kɩ 'ʋ hɩtɔɔnyʋ a ‑ta'
(Judɩ 4-13)
1 Ti ‑hi la a ti 'yri, hɩwinwlɔn‑hanyʋ, nʋ‑ nɩ la 'lɩ Nyɩsʋa a dakɔ 'nyɩ. Kɛ‑ ɛ di 'mʋ ꞊ti, ti ‑bʋ 'yri, hɩtɔɔnyʋ 'mʋ 'lɩ 'a mʋ 'nyɩ 'hrɩɩ ‑nɩ ‑wɛ, ʋ 'mʋ hɩtɔɔlɛ ‑tɔɔ ‑nɩ, ‑ɛ di nyibli a 'klɔ yɩ nyre. Hɩtɔɔnyʋ a 'mʋ, ʋ 'yɩ 'lɩ꞊ɩ 'lɩ ‑wɛ, bʋ wɛn Kʋkɔnyɔ ‑Yusu 'Klɩsʋ a ‑tɩ kɩ, ‑ɛ wa mɔ ꞊nʋ, 'kɩ 'ʋ 'waa dɛ 'kuku a ‑ta'. ‑Tɛ ʋ ni 'a nunuo lɛ, 'a ‑tɩ ɛ 'yɩ 'lɩ ti ‑hʋɔhʋɩ ꞊dʋ 'lɩ ‑hie, Nyɩsʋa a ‑bati 'mʋ ꞊nʋ klɔ, ʋ 'mʋ bʋ ‑wɛ.
2 Nyibli di kʋɛ 'waa nunu‑tɛblɩ ‑hʋɩn ꞊wien lɛ. 'Waa ‑tɩ, nyibli di hla 'ʋ Nyɩsʋa a ꞊haan'hru ‑tɩ 'yie lɛ.
3 Hɩtɔɔnyʋ a 'mʋ, ʋ ꞊tui 'waa 'bio a ‑tɛblɩ ca ‑mɔ dɩakɩ. Nɔ‑ kɔ ‑tɩ, 'ʋ ni hɩ, 'ʋ kɛɛ nɛ 'a mʋ, ‑ɛ di꞊e nu, ʋ 'mʋ 'aan ‑tɛblɩ gba. Kɛɛ, kʋɛ la 'lɩ bʋ, Nyɩsʋa ‑yra la꞊a nɩ, 'kɩ bʋ pʋʋ la ꞊nʋ ‑bati lɛ, ɛ 'mʋ ꞊nʋ bʋ ‑wɛ.
4 Ɛ mɔ ‑tɛɛ, ti ‑hi la a ti 'yri, Nyɩsʋa a lɛlenyʋ ‑bɩ ‑mʋ', ‑ʋ nu la dɛ 'kuku, Nyɩsʋa 'yɩ la 'waa nyaɩ ‑yru, 'ɛ pʋ la 'lɩ ꞊nʋ na ‑mʋ', ‑ɛ 'yɛ nɩ jre 'nyɩ. 'Kɩ ʋ nɩ 'lɩ halɔ 'nyɩ, 'ʋ ꞊tui ꞊nʋ 'yie, ɛ 'mʋ꞊ʋ gba ‑gbagba, ‑nyrɔwɔ ‑mʋ' ‑kɔ 'yri Nyɩsʋa di 'ʋ nyibli ‑bati lɛ ‑pʋʋ ‑nɩ, ɛ 'mʋ 'ʋ nyre.
5 'Ya 'ʋ 'lu de, ti ‑hi la a ti 'yri a nyibli ‑mʋ', ‑ʋ 'yɛ nɩ ꞊tuu la 'ʋ Nyɩsʋa 'ʋ, ɛ 'yɩ la 'waa nyaɩ ‑yru ‑wɛ, 'ɛ nu la꞊a, 'nie 'ɛ 'yi la, 'ɛ ‑wɛ la nyibli a 'mʋ bʋ. Ɛ 'yɩ la 'waa 'yɛɛ ꞊dʋ ‑wa. Noe nɩ ‑do, nɔ‑ ɛ ‑wa, ɛ kɔ nyibli nɩ ꞊hlon'hʋɛn ‑bɩ 'hʋɛn, ‑kɔtɩ ɛ yɩ la nyibli 'nɩ ‑lee ‑nɩ, ‑ɛ mɔ, 'waa 'yrinaabʋɩ bʋ 'sii la 'ʋ yɩ.
6 'Ya 'ʋ 'lu de, 'dɩɩ ‑mʋ', ‑ʋ mɔ Sodɔmʋ kɔ Gomɔlɩ, ‑tɛ 'a nyibli ni la yɩnyre‑tɛblɩ, Nyɩsʋa klɔ la ꞊nʋ nɩ, 'ɛ nu na, 'ɛ pʋ la ꞊nʋ 'tɔ pɛpɛ. 'Kɩ ɛ naa 'ʋ, 'ɛ tɔɔ ꞊nɛ nyibli ‑mʋ', ‑ʋ 'yɛ nɩ ꞊tuu 'ʋ꞊ʋ, ‑ɛ mɔ, kɛ‑ 'waa ‑nɛ di 'mʋ ꞊ti ‑nyrɔwɔ ꞊dʋ.
7 Ti ‑mʋ' ‑kɔ 'yri ɛ mi la 'ʋ 'dɩɩ a 'mʋ 'tɔ pʋ mɔ, ɛ 'hrɔɔ la nyiblo ‑mʋ', ‑ɛ mɔ Lɔtɩ nɩ, ‑kɔtɩ 'a 'klɔ 'sii la 'ʋ yɩ. Yɩnyre‑tɛblɩ a 'mʋ, 'dɩɩ a 'mʋ 'a nyibli ni la, ɛ 'nɩ ‑blee꞊e la Lɔtɩ a 'mʋ 'a plɔ.
8 Lɔtɩ a 'mʋ, ‑ɛ kɔ 'klɔ 'sii la 'ʋ yɩ, 'kɩ ɛ 'ti la 'lɩ nyibli a 'mʋ 'nyɩ, ‑ʋ kɔ 'klɔ ‑nyre la yɩ, 'a ‑nɛ ‑nyrɔwɔ, 'ɛ yɩ la yɩnyre‑tɛblɩ a 'mʋ 'ye, ʋ ni la, 'ɛ yɩ la 'waa pʋpʋwin ‑hʋɩn 'wɩn. Dɛ a 'mʋ, ɛ yɩ la 'a ꞊wlʋ 'nɩ di dɩakɩ, ‑kɔtɩ ɛ nɔ‑ ‑mɔ ‑bɩ, ɛ 'sii la 'ʋ yɩ.
9 ‑Tɛblɩ ‑mʋ', ‑ɛ ‑hi la, ɛ tʋɛ ꞊nɛ ‑a mɔ꞊ɔ nɩ, ‑ɛ mɔ, Nyɩsʋa yi 'hru ‑mʋ', ɛ di na nɩ, ɛ 'mʋ 'a nyibli wa, ‑ʋ nɩ 'lɩ lɛ꞊tɛɛlɛ 'kwli. ‑Tɛblɩ a 'mʋ, nɔ‑ tʋɛ ꞊nɛ ‑a mʋ ‑wɛ, ‑ɛ mɔ, ɛ yi 'hru ‑mʋ' nɩ, ɛ di na, nyibli ‑mʋ', ‑ʋ kɔ 'klɔ ‑nyre yɩ, ɛ 'mʋ ꞊nʋ bʋ ꞊tu, ‑ɛ di꞊e nu, ‑batipʋ‑nyrɔwɔ 'bʋ nyre 'ʋ, ɛ 'mʋ ꞊nʋ ꞊hɩʋɛn ꞊tu.
10 Sɛyɩ‑sɛyɩ, nyibli ‑mʋ', Nyɩsʋa di ꞊hɩʋɛn ꞊tu dɩakɩ, ɛ 'mʋ 'ʋ nyibli ‑bɩ 'ʋ ‑hi, nʋ‑ mɔ nyibli ‑mʋ', ‑ʋ 'cibi 'ʋ yɩnyre‑tɛblɩ a nunuo, 'waa ꞊wlɩ ‑hʋɛ, ɛ kɔ, ‑ʋ 'yɛ nɩ ‑hʋa ‑bʋ ꞊tuu 'ʋ Nyɩsʋa 'ʋ.
Hɩtɔɔnyʋ ‑mʋ', ‑ʋ kɔ ‑tɩ 'n lee nɛ 'a mʋ, ʋ 'yɩ ꞊dedede a hʋannʋ ‑kɔ. Ʋ 'nɩ ‑pʋ꞊ʋ nyiblo ꞊dʋ nʋa yɩ bʋ, mɔ, ʋ 'nɩ ‑pie꞊e Nyɩsʋa a lɛlenyʋ ‑wɛ, ‑ʋ kɔ ‑tɩ a 'yi'bʋbʋa, 'ʋ ‑hɛ ꞊nʋ 'yri lɛ.
11 Mɔ, Nyɩsʋa a lɛlenyʋ ‑mʋ', ‑ʋ nɩ 'klɩ kɩ, ‑ʋ ‑hi 'ʋ hɩtɔɔnyʋ a 'mʋ 'ʋ, ʋ 'nɩ ‑yɛɛ꞊ɛ lɩ hɩtɔɔnyʋ a 'mʋ ‑tɩ, 'kɩ 'ʋ Nyɩsʋa ye'.
12 Nyiblidʋ a 'mʋ, ʋ 'yɩ 'lulɛ‑hihie ‑kɔ. 'Waa nunuklɔ 'wɩ꞊ɩ 'wan bʋ a mamʋɩ a nunuklɔ yɩ. 'Wan bʋ a mamʋɩ a 'mʋ, ʋ nɩ 'ʋ bʋ, 'kɩ nyibli 'mʋ ꞊nʋ klɔ, ʋ 'mʋ ꞊nʋ 'la. ‑Tɛblɩ ‑mʋ', hɩtɔɔnyʋ a 'mʋ, ʋ 'yɛ nɩ yru' lɛ, nɔ‑ ʋ 'cɛɛ ‑nɩ. Ɛ mɔ ‑tɛɛ, Nyɩsʋa di ‑wɛ ꞊nʋ bʋ, ꞊wɩ yɩ 'wan bʋ a mamʋɩ.
13 Nyɩsʋa di pʋ ꞊nʋ ꞊hɩʋɛn', ꞊wɩ yɩ, ‑tɛ ʋ ni, 'ʋ pɩ nyibli ꞊hɩʋɛn'. 'Waa plɔ a bleelɛ nɩ ‑do, nɔ‑ mɔ bʋ nu 'a ‑nɛ yɩnyredɛ, 'waa ꞊wlɩ ‑hʋɛ. Mɔ, 'ye ꞊bɩɩ ‑nyrɛ', ʋ ni꞊e nɩ. 'Bʋ mɔ, 'ba 'kukue 'ʋ dɛdiilɛ' lɛ, 'bʋ nɩ 'lɩ 'a mʋ 'nyɩ, 'waa nunuklɔ nie nɛ 'a mʋ ‑tʋɩ, ‑kɔtɩ ʋ tʋɛ hɩtɔɔlɛ, 'ʋ kɛɛ nɛ 'a mʋ. ‑Ɛ ‑bɩ dɛ a 'mʋ, ɛ ni ꞊nʋ dɔdʋ.
14 'Waa dɛ nɩ ‑do, ʋ yɩ 'lu ‑mɔ lɛ ‑hie, nɔ‑ mɔ bʋ pɛ 'lawlunʋgbɩ ‑mɔ. 'Waa 'klɩ 'nɩ ‑wɛ꞊ɛ 'lɩ, 'kɩ bʋ nu yɩnyre‑tɛblɩ. 'Bʋ mʋ, 'bʋ 'ye nyibli, ‑ʋ kɔ ꞊wlʋ a yɩkuolɛ ꞊yɩ bʋ ‑ku, ‑ɛ ‑bɩ ʋ kɛɛ ꞊nʋ nɩ, ‑ɛ di꞊e nu, 'waa 'mumu, ʋ 'mʋ dɛ 'kuku nu ‑wɛ. 'A ‑nɛ ti, nyibli a ‑tɛblɩ, nɔ‑ ʋ ꞊tui ca ‑mɔ. Kɛɛ, Nyɩsʋa a ‑bati di ꞊nʋ 'nɩ klɔ.
15 Ʋ hie 'ʋ Nyɩsʋa a 'hru bʋ, 'ʋ yɩ 'wan. Winwlɔn‑hanyɔ ‑mʋ', ‑ɛ kɔ 'nyrɛ ‑mɔ la Balamʋ, ‑ɛ mɔ la Bɔsɔ a 'yu, yɩnyreklɔ nɩ ‑do ‑mʋ', ɛ ni la, nɔ‑ nyibli a 'mʋ, ʋ ni ‑wɛ. 'Kɩ ɛ nɛɛ la 'lɩ dɛ ‑hʋan 'nyɩ, ‑ɛ di꞊e nu, ɛ 'mʋ 'wliyɛ 'ye.
16 Bʋ bi 'lɩ 'a mʋ 'kwli, ‑ɛ mɔ, ‑nyrɔwɔ ꞊dʋ, Balamʋ a 'mʋ, ‑ɛ nu la dɛ 'kuku, ɛ nɩ la 'hru wlɔn. ‑Ɛ ‑bɩ 'kɩ Nyɩsʋa naa 'lɩ 'kasra ꞊dʋ a win 'kwli, 'ɛ nu꞊o, 'kasra a 'mʋ, ‑ɛ 'yɛ nɩ 'plɛ lɛ, 'ɛ hlee 'lɩ Balamʋ a 'mʋ ‑mɔ, 'ɛ yɩ꞊ɩ ‑mɔ 'plɛ, 'ɛ ka Balamʋ a 'mʋ 'a 'hru yɩ, ‑ɛ di꞊e nu, ɛ 'nɩ ꞊ha 'kɩ yɩnyredɛ nu mɔ mu de.
17 Hɩwinwlɔn‑hanyʋ ‑mʋ', ‑ʋ kɔ ‑tɩ 'n lee nɛ 'a mʋ, ‑ʋ kɛɛ nyibli, ʋ 'wɩ꞊ɩ 'niebuiti yɩ, ‑ʋ ma 'lɩ 'kwli lɛ. Ʋ 'wɩ꞊ɩ 'nuŋmɩ yɩ ‑wɛ, pepe yɩ ‑hie ‑nɩ, 'ɛ ni꞊e, 'nu a 'mʋ, nyibli yɩ ‑ple, 'kɩ ɛ 'yɛ nɩ di. 'Waa ‑nɛ bʋnɩɩlɛ ‑mʋ', Nyɩsʋa ‑wɛ ‑mɔ, 'kɩ 'ʋ ꞊nʋ ‑mɔ, nɔ‑ mɔ 'lɩ halɔ ŋma 'nyɩ.
18 Ʋ nʋɛ bʋ 'yaa 'lɩ win, bʋ pʋ 'waa dɩɔnʋ a ‑pli, 'ʋ pɩ windʋ ‑mʋ', ‑ɛ 'yɛ nɩ da ꞊dedede, 'ʋ ꞊mʋɛ꞊ɛ lɛ, 'kɩ bʋ kaa nyibli ‑mʋ', ‑ʋ ꞊tɩɛ ‑hɔn 'lɩ nyibli ‑mʋ' 'nyɩ, ‑ʋ 'yɩ Nyɩsʋa a 'hru ‑yi, 'ʋ ‑hʋɛ꞊ɛ, 'kɩ nyibli a 'mʋ, bʋ nu ‑tʋɩŋmlɩ nɩ ‑do ‑mʋ', 'waa ꞊wlɩ ‑hʋɛ,
19 'ʋ yɩ nyibli a 'mʋ ‑lee ‑nɩ, ‑ɛ mɔ, nyiblo ꞊dʋ 'yɩ ꞊nʋ win kɩ ‑kɔɔ ‑nɩ, 'a ‑tɩ, 'a ‑nɛ ꞊dedede 'waa ꞊wlɩ di ‑hʋa, ʋ ‑wɛ 'lɩ bʋ nu꞊o nɩ. ꞊Tagbi, hɩtɔɔnyʋ a 'mʋ, ‑ʋ ni 'pʋplɛ lɛ, dɛ 'kuku, nɔ‑ kɔɔ ꞊nʋ win kɩ. 'Bɩ a yi꞊e nɩ, ‑ɛ mɔ, dɛ ‑bʋ, ‑ɛ kɔɔ ‑tonyiblo win kɩ, nɔ‑ kɔ ꞊koyu ‑tonyiblo a 'mʋ ɛ ‑mɔ.
20 'Bʋ mɔ, nyibli 'bʋ yru ‑aan Kʋkɔnyɔ ‑Yusu 'Klɩsʋ, ‑ɛ wɛ nyibli, ɛ kɔ, 'bʋ hie 'ʋ 'klɔ ‑bʋ a yɩnyre‑tɛblɩ bʋ, ‑ɛ yɩ nyibli yrɛ nyre, kɛɛ, 'bʋ gba ti gbi, 'tɩ‑ 'bʋ ꞊tu yɩnyre‑tɛblɩ a 'mʋ a nunuo ‑wlu de, 'tɩ‑ ‑tɛblɩ a 'mʋ 'bʋ kɔɔ ꞊nʋ win kɩ, ‑ɛ ‑bɩ 'a dɛ yrayrʋ ‑mʋ', ʋ ni, ɛ di nyre yɩ dɩakɩ, ɛ 'mʋ 'ʋ 'a yɩ‑hɛdɛ 'ʋ ‑hi.
21 ‑Tɛ ɛ nɩ 'mʋ lɛ, ɛ di nu wɛn ‑tɛɛ, 'kɩ 'ʋ ꞊nʋ ‑mɔ, 'kɩ ʋ 'nɩ 'yie wɛn 'lɩ 'hru ‑bʋ, ‑ɛ 'sii 'ʋ yɩ, 'ɛ ‑hi 'ʋ bʋ yi 'hru a 'mʋ ‑tɛɛ, 'tɩ‑ bʋ hie 'ʋ꞊ʋ bʋ, bʋ 'yɛ nɩ ꞊tuu 'kɩ 'ʋ ‑tɩ ‑bʋ, Nyɩsʋa yɩ ꞊nʋ ‑lee ‑nɩ.
22 Dɛ ‑bʋ, ‑ɛ yɩ nyibli a 'mʋ kɩ yɛ, ɛ kɔ 'ledʋ, 'ɛ tʋɛ ꞊nɛ nyibli. 'Ledʋ a 'mʋ, ɛ nɔ‑ ‑bʋ: Dɛ ‑bʋ, ‑gbi ‑wlɛ, nɔ‑ ɛ yɩ di de. Ʋ wɛn 'nɩ de: Bʋɔʋ ‑bʋ, ʋ ‑wɛ ‑puple ‑mɔ ‑tɛ ti nɛ ‑bʋ, ɛ nɔ‑ mi 'lɩ 'blu 'nyɩ bʋ pɛ mɔ de.