5
1 'A ‑nɛ ‑cɔhlʋnpinyɔ gbagbʋ, 'kɩ 'nɛ‑ ‑a mʋ ‑Juukʋɛ* 'nyɩ, 'kɩ ʋ ‑hɛ 'lɩ꞊ɩ ‑tonyibli 'nyɩ, 'ʋ ꞊tui 'ʋ꞊ʋ bʋ, ‑ɛ di꞊e nu, ‑cɔhlʋnpinyɔ a 'mʋ, ɛ 'mʋ 'lɩ Nyɩsʋa ‑mɔ ‑hlee ‑nɩ, 'kɩ 'ʋ ‑aan ‑ta', ɛ kɔ, ɛ 'mʋ Nyɩsʋa a ‑cɔhlʋn* pi, 'kɩ 'ʋ dɛ 'kuku ‑mʋ', nyibli ‑nu a ‑ta'.
2 ‑cɔhlʋnpinyɔ a 'mʋ, ‑tɛ ɛ mɔ ‑tonyiblo a ‑tɩ, ɛ kɔ ti, lɛ꞊tɛɛlɛ 'bʋ yɛ꞊ɛ kɩ, 'kɩ ɛ 'yɛ nɩ kɔ 'klɩ, 'kɩ bʋ 'yɩ dɛ 'kuku ‑nu. Ɛ nɔ‑ nu꞊o, nyibli 'bʋ 'yɩ ꞊haan'hru ‑yi, ɛ kɔ, 'bʋ yɩ dɛ 'kuku nɩ ni, ‑cɔhlʋnpinyɔ a 'mʋ, 'ɛ ‑wɛ 'lɩ bʋ yru nyibli a 'mʋ, 'waa 'kla‑wliye'yɩya' lɛ, ɛ kɔ bʋ yru 'waa nyaɩ.
3 Dɛ a 'mʋ a ‑tɩ, ɛ 'yɩ nyibli a dɛ 'kuku nɩ ‑do a ‑tɩ 'pa‑, ɛ 'nɩ ‑pi꞊e lɩ ‑cɔhlʋn, kɛɛ, ɛ kɔ bʋ pi 'a 'mumu, 'a dɛ 'kuku a ‑cɔhlʋn.
4 Nyiblo 'bʋ mɔ ‑cɔhlʋnpinyɔ gbagbʋ, ‑ɛ ‑bɩ ɛ kɔ ‑tɩ a 'yi'bʋbʋa. Nyiblo ꞊dʋ 'yɩ ‑hʋan 'a dɩɔnʋ ‑cɔhlʋnpinyɔgbagbʋdɛ kɩ nɩ pɩ. Kɛɛ, Nyɩsʋa a ꞊gbɛtʋ, ɛ nɔ‑ dɛ nyiblo, 'kɩ bʋ ‑hɛ ‑cɔhlʋnpinyɔ, ꞊wɩ yɩ ti ‑hi la a ti 'yri, ‑tɛ Nyɩsʋa a ꞊gbɛtʋ, ɛ nu la, 'ɛ da la Ayrɔ, Ayrɔ 'ɛ ‑hɛ la ‑cɔhlʋnpinyɔ gbagbʋ.
5 Kɛ‑ nɩ ‑do ɛ ꞊ti 'mʋ, 'kɩ 'ʋ ‑Yusu 'Klɩsʋ ‑mɔ. Ɛ 'yɩ la 'a dɩɔnʋ ‑cɔhlʋnpinyɔgbagbʋdɛ kɩ bʋ ‑pʋ. Kɛɛ, Nyɩsʋa a ꞊gbɛtʋ, ɛ nɔ‑ ‑nyi꞊e ‑tɩ a 'yi'bʋbʋa, 'ɛ da꞊a, 'tɩ‑ 'ɛ lee ꞊nɛ:
«‑Mɔ 'na 'Yu ꞊nɩɔ.
Kɩkɛ ‑bʋ 'n ‑hɛ kɛ ‑na 'Baɩ.»
6 'Kɩ 'lɩ Nyɩsʋacrɩɛn a 'kʋtɩɔ ‑bɩ 'kwli, ʋ 'crɩɩ 'lɩ꞊ɩ nɩ, ‑ɛ mɔ, kɛ‑ Nyɩsʋa pɩ:
«‑Di mɔ ‑cɔhlʋnpinyɔ gbagbʋ, ‑tɛ 'klɔ tɛ yɩ bʋ,
꞊wɩ꞊ɩ nyiblo ‑mʋ',
‑ɛ kɔ 'nyrɛ mɔ Mɛkisɩdɛkɩ yɩ.»
7 ‑Tɛ ‑Yusu nɩ la 'nɛ‑ 'klɔ kɩ, ɛ yi la꞊a nɩ, ‑ɛ mɔ, Nyɩsʋa kɔ 'klɩ, 'kɩ bʋ ꞊gblɛ꞊ɛ, 'kɩ 'ʋ 'kʋkʋʋ ‑mɔ. 'Tɩ‑ ‑Yusu a 'mʋ, ɛ 'mʋ la 'kʋ mɔ mu, ɛ da la Nyɩsʋa ‑dada, 'ɛ ‑tʋa la wuwe, kɔ, ɛ 'yɛɛ la 'lɩ win, ‑ɛ nu꞊o, ɛ ‑hʋɛ bʋ ꞊tuu la 'ʋ Nyɩsʋa 'ʋ, ɛ 'mʋ꞊ʋ kɩ wɛn, 'kɩ bʋ 'kʋ, Nyɩsʋa 'ɛ wɛn 'a lɛnyaawin kɩ. Ɛ nɔ‑ nu꞊o, ‑tɛ ‑Yusu a 'mʋ, ɛ 'kʋ, Nyɩsʋa 'ɛ ‑ha 'lɩ꞊ɩ 'kʋkʋnyibli 'nyɩ, 'ɛ ‑ha꞊a 'klɔ, ‑ɛ nu꞊o, ‑Yusu a 'mʋ, ɛ ꞊tui la 'ʋ꞊ʋ nɩ dɩakɩ.
8 'Ye ꞊bɩɩ ‑Yusu bʋ mɔ Nyɩsʋa a 'Yu, ɛ kɔ bʋ 'ye ꞊hɩʋɛn dɩakɩ, ‑ɛ di꞊e nu, ɛ 'mʋ Nyɩsʋa a 'ʋ꞊tuulɛ 'nyɩ.
9 ‑Tɛ Nyɩsʋa ‑yra 'a ‑kʋan 'lu, 'kɩ 'lɩ ‑Yusu', ‑ɛ ‑bɩ ‑Yusu a 'mʋ, ɛ ‑hɛ nyiblo ‑mʋ', ‑ɛ wɛ nyibli a pɛpɛ ‑mʋ', ‑ʋ ꞊tui 'ʋ꞊ʋ 'ʋ, ‑ɛ di꞊e nu, ʋ 'mʋ 'klɔ yrayrʋ ‑mʋ', ‑ɛ 'yɛ nɩ ‑wɛ 'lɩ kɔ,
10 Nyɩsʋa 'ɛ nu꞊o, ‑Yusu 'ɛ ‑hɛ ‑cɔhlʋnpinyɔ gbagbʋ, ‑ɛ 'wɩ nyiblo ‑mʋ' yɩ, ‑ɛ kɔ 'nyrɛ mɔ Mɛkisɩdɛkɩ.
Ba ꞊tu 'aan dɩɔnʋ 'yie, ‑ɛ di꞊e nu, a 'nɩ ꞊ha 'ʋ Nyɩsʋa a 'hru bʋ hie
11 ‑A kɔ ‑tɛblɩ ‑hʋɔhʋɩ, ‑ba lee nɛ 'a mʋ, 'kɩ 'ʋ nyiblo ‑mʋ', ‑ɛ mɔ Mɛkisɩdɛkɩ a ‑ta'. Kɛɛ, ɛ 'kla 'mʋ, 'kɩ ‑ba yrue nɛ 'a mɔ꞊ɔ' lɛ, ‑ɛ nu꞊o, a 'nɩ ‑yru꞊o ‑tɩ' lɛ 'wʋwlɩ.
12 ‑Tɛ ti nɛ ‑bʋ, a blɛɛ yɩ, 'aan 'mumu, ba mɔ wɛn tɔɔnyʋ, ‑ɛ nu꞊o, see la, a ‑tʋa la 'nyɩnyɩɩ, kɛɛ, a 'yɛ꞊ɛ lɛ nɩ yrui ‑tɛɛ. Ɛ ‑hʋɛ꞊ɛ nɩ, nyibli ‑bɩ bʋ di 'lɩ 'a mʋ ‑mɔ, yɩ‑hɛ‑tɛblɩ ‑mʋ', a 'nyɩ, 'kɩ 'ʋ Nyɩsʋa a win a ‑ta', ʋ 'mʋ 'a mɔ꞊ɔ ‑tɔɔ ‑nɩ de. Ɛ ꞊hɛn 'nyrɛ, ‑ɛ mɔ, diidɛ ‑mʋ', kukunyʋ yɩ di, a 'yɛɛ 'lɩ 'a didie nɩ ‑wɛ. A 'tɩɛ mɔ 'yonʋ, ‑ʋ 'tɩɛ 'nyɛɛ.
13 'Yupanʋ ꞊tɩɛ 'nyɛɛ, ɛ nɔ‑ 'yɛ kukunyɔ a 'pʋplɛwin lɛ nɩ yrui.
14 Kɛɛ, nyiblo ‑bʋ, ‑ɛ ‑ku, ɛ nɔ‑ blɛɛ kukunyɔ a didi‑tɛblɩ yɩ. Kɛ‑ nɩ ‑do ɛ ꞊ti 'mʋ, 'kɩ 'ʋ Nyɩsʋa a win a ‑ta'. Nyiblo ‑bʋ, ‑ɛ kuu 'lɩ Nyɩsʋa a win 'nyɩ, 'tɩ‑ ‑ɛ yi ꞊haandɛ kɔ dɛ ‑hʋan a 'yilɛ‑hɩhɩalɛ, nyiblodʋ a 'mʋ, ɛ nɔ‑ ‑wɛ 'lɩ ‑bʋ yru Nyɩsʋa a win a pɛpɛ' lɛ, ɛ nɔ‑ ʋ blɛɛ yɩ bʋ ‑nyi Nyɩsʋa a win a 'mʋ.