6
Nyibli ‑mʋ', ‑ʋ 'yɩ Nyɩsʋa ‑yi, Nyɩsʋa a nyibli 'yɩ yɩ ‑blɛɛ ‑nɩ, bʋ pʋ ꞊nʋ ‑hawi
1 'Kɩ 'lɩ 'a mʋ Nyɩsʋa a nyibli 'nyɩ, nyiblo 'bʋ nu 'a 'bɩhɩan dɛ ‑hʋan ‑mɔ, a 'yɩ yɩ ‑blɛɛ ‑nɩ, ba pʋ nyibli ‑mʋ' ‑ʋ 'yɩ Nyɩsʋa ‑yi ‑hawi. Kɛɛ, a kɔ ba pʋ 'aan 'bio Nyɩsʋa a nyibli ‑hawi.
2 ꞊Bɩ a 'yɩ꞊ɩ ‑yi, ‑ɛ mɔ, Nyɩsʋa a nyibli, nʋ‑ di 'klɔ ‑bʋ a nyibli ‑bati lɛ ‑pʋʋ ‑nɩ? 'A ‑tɩ, ‑tɛ a di 'klɔ ‑bʋ a nyibli a pɛpɛ ‑bati lɛ ‑pʋʋ ‑nɩ, ɛ nɔɔ 'ʋ lɛ, 'kɩ ba pʋ ‑bati, 'kɩ 'ʋ ‑tɩ ‑gbatɩ a ‑ta'.
3 ꞊Bɩ a 'yɩ꞊ɩ ‑yi ‑wɛ, ‑ɛ mɔ, ‑a mʋ di Nyɩsʋa a lɛlenyʋ ‑bati lɛ ‑pʋʋ ‑nɩ? ‑Tɛ ‑a di Nyɩsʋa a lɛlenyʋ ‑bati lɛ ‑pʋʋ ‑nɩ, 'a ‑tɩ, ɛ nɔɔ 'ʋ lɛ, 'kɩ ‑ba pʋ ‑bati, 'kɩ 'ʋ 'klɔ ‑bʋ a ‑tɛblɩ a ‑ta'.
4 'A ‑tɩ, ‑tɩ 'bʋ bi 'lɩ 'a mʋ 'nyɩ, dɛ‑ kɔ ‑tɩ nyibli ‑mʋ', ‑ʋ 'yɩ Nyɩsʋa ‑yi, 'a pɩ ꞊nʋ ‑hawi, 'ʋ pɩɩ nɛ 'a mʋ ‑bati lɛ 'lɩ?
5 ꞊Bɩ dɛ a 'mʋ, ɛ 'nɩ ‑nuo꞊o lɩ 'a mʋ ‑tʋɩ? ꞊Bɩ 'kɩ 'lɩ 'a mʋ 'nyɩ, ꞊tɔkɔnyɔ ꞊dʋ 'yɩ 'lɩ ‑nɩ, ‑bʋ kʋkʋa 'aan ‑tɩ a 'mʋ yrɛ.
6 Nyibli ‑mʋ', ‑ʋ 'yɩ ‑Yusu ꞊wlʋ yɩ ‑kuo ‑nɩ, ɛ 'yɩ ‑tɛɛ ‑nu, 'kɩ ba pʋ ꞊nʋ 'aan 'bio ‑Yusu a nyibli a ‑hawi.
7 Hɩhla‑tɩ 'bʋ nɩ 'lɩ 'a mʋ 'nyɩ, ɛ ꞊hɛn 'nyrɛ, a 'nɩ ‑na꞊a lɩ Nyɩsʋa a 'hru ‑mʋ' ‑tɛɛ. 'Bʋ mɔ, nyiblo 'bʋ nu 'a mʋ dɛ ‑hʋan ‑mɔ, 'bʋ 'yri 'aan dɛ, ɛ nɔɔ 'ʋ lɛ, 'kɩ ba kɔ ꞊wlʋ a 'lɩla, 'ɛ ‑hi 'ʋ ba yɛɛ ꞊nɛ ‑tɩ, 'kɩ 'ʋ nyiblo ‑bɩ yɩ.
8 Kɛɛ, a 'yɩ ꞊wlʋ a 'lɩla ‑kɔ. Dɛ a ni, ɛ nɔ‑ ‑mɔ, a ni ‑ʋ ‑bɩ ‑tɛblɩ ‑hʋɩn ‑mɔ, 'a yɩ 'waa ‑tɛblɩ 'yri, 'ye ꞊bɩɩ ʋ mɔ 'aan 'bio Nyɩsʋa a nyibli.
9 A yi꞊e nɩ, ‑ɛ mɔ, nyibli ‑mʋ', ‑ʋ ni ‑tɛblɩ ‑hʋɩn lɛ, ʋ 'yɩ 'lɩ꞊ɩ 'lɩ ‑wɛ, bʋ pa 'lɩ Nyɩsʋa a 'klɔ yrayrʋ ‑mʋ', ɛ di nu 'kwli. A 'nɩ 'kaa 'lɩ 'aan dɩɔnʋ, ba kɔ 'a yiyie, ‑ɛ mɔ, nyibli ‑mʋ', ‑ʋ ni 'lawlu, kɔ nyibli ‑mʋ', ‑ʋ kwlɛ ‑cɩ, ɛ kɔ nyibli ‑mʋ', ‑ʋ ni ‑wlawlɩ, kɔ, nyɩbɛpʋ ‑mʋ', ‑ʋ ni 'waa 'bio nyɩbɛpʋ nʋgbɩ ‑mɔ, nyibli a 'mʋ, ʋ 'yɩ 'lɩ꞊ɩ 'lɩ ‑wɛ, bʋ pa 'lɩ Nyɩsʋa a 'klɔ yrayrʋ 'kwli,
10 kɔ, nyibli ‑mʋ', ‑ʋ yɩ 'yri, ʋ bi 'lɩ yɩ, nyibli ‑mʋ', ‑ʋ kɔ ca, 'kɩ 'ʋ 'waa 'bio a kʋkɔ‑tɛblɩ a ‑ta', kɔ nyibli ‑mʋ', ‑ʋ yɩ 'waa dɩɔnʋ nɔ wlɔn ‑hie ‑nɩ, kɔ, nyibli ‑mʋ', ‑ʋ 'yɩ 'waa 'bio a 'nyrɛ yɩ nyre, ʋ kɔ ‑balʋnyibli 'hʋɛn‑, nyiblidʋ a 'mʋ, ʋ 'yɩ 'lɩ꞊ɩ 'lɩ ‑wɛ, bʋ pa 'lɩ Nyɩsʋa a 'klɔ yrayrʋ 'kwli.
11 Ti ‑hi la a ti 'yri, nyibli ‑bɩ, 'kɩ 'lɩ 'a mʋ 'nyɩ, ʋ 'cibi la 'ʋ yɩnyre‑tɛblɩ a 'mʋ, 'a nunuo. Kɛɛ, ‑tɛ ti nɛ ‑bʋ, Nyɩsʋa ‑bʋ, ‑a dɛ, 'a ‑Hihiu* ꞊gblɛ 'a mʋ nɩ, 'kɩ 'ʋ yɩnyre‑tɛblɩ a 'mʋ a ‑ta', 'ɛ pʋ 'a mʋ 'kɩbɩa kɩ, ‑ɛ di꞊e nu, a 'mʋ Nyɩsʋa a nyibli' pa, 'ɛ nu꞊o, 'a 'sii 'ʋ yɩ, 'kɩ 'ʋ 'a dɩɔnʋ ye'. Kɛ‑ ɛ nu 'a nunuo, ‑ɛ nu꞊o, a kuo nɛ ‑aan Kʋkɔnyɔ ‑Yusu 'Klɩsʋ ꞊wlʋ yɩ.
Ba ‑ha 'aan 'hʋɩ, 'kɩ 'ʋ Nyɩsʋa a ‑tɩ a 'yi'bʋalɛ a ‑ta'
12 'Kɩ 'lɩ 'a mʋ 'nyɩ, ‑ʋ ‑bɩ nɩ 'lɩ, ʋ wɛn, ʋ kɔ 'hru, 'kɩ bʋ nu 'a ‑nɛ ꞊dedede 'waa ꞊wlʋ ‑hʋɛ. Iin, ɛ mɔ ꞊han‑tɩ ꞊nɩɔ, kɛɛ, ɛ kɔ nunu‑tɛblɩ ‑bɩ, ‑ɛ 'yɛ nɩ ‑hɛɛ ꞊nʋ. 'N ‑wɛ 'lɩ ꞊bʋ pʋ wɛn lɛ nɩ, ‑ɛ mɔ, 'n kɔ 'hru, 'kɩ ꞊bʋ nu 'a ‑nɛ ꞊dedede, kɛɛ, 'nɩ ‑hʋa꞊a lɩ ꞊bʋ ‑hɛ 'a ‑nɛ ꞊dedede a ꞊koyu.
13 Kɛ‑ a pɩ de, ‑ɛ mɔ, diidɛ nɩ 'ʋ nɩ, 'kɩ 'ʋ 'kwli ‑mɔ, 'kwli ‑mɔ ‑bɩ, 'ɛ nɩ 'ʋ, 'kɩ 'ʋ diidɛ a ‑ta'. Iin, ɛ mɔ ꞊han‑tɩ ꞊nɩɔ, kɛɛ, ‑nyrɔwɔ di 'ʋ 'nɩ nyre, Nyɩsʋa 'mʋ didi‑tɛblɩ kɔ 'kwli 'hʋɛn‑ bʋ ‑wɛ, kɛɛ, ɛ 'yɩ 'nyrɛ ꞊hɛn, ‑ɛ mɔ, ‑aan 'hʋɩ nɩ 'ʋ nɩ, 'kɩ 'ʋ 'lawludɛ a ‑ta'. Ɛ nɩ 'ʋ nɩ, 'kɩ 'ʋ Kʋkɔnyɔ ‑Yusu ‑mɔ. Kʋkɔnyɔ ‑Yusu a 'mʋ, ɛ nɔ‑ kɔɔ ꞊nɛ win kɩ.
14 ‑Tɛ ‑aan Kʋkɔnyɔ 'kʋ la, ‑ɛ ‑bɩ Nyɩsʋa ‑ha la 'lɩ꞊ɩ 'kʋkʋnyibli 'nyɩ, 'ɛ ‑ha la꞊a 'klɔ. ‑A mʋ ‑mɔ ‑bɩ, ꞊ba 'kʋ ‑hʋan, ɛ kɔ bʋ ‑ha ‑hʋan 'lɩ ‑a mʋ 'kʋkʋnyibli 'nyɩ, ɛ 'mʋ ‑hʋan ‑a mʋ 'klɔ ‑ha, 'kɩ 'lɩ 'a 'klɩ 'kwli.
15 Ba kɔ 'a yiyie, ‑ɛ mɔ, 'cʋɛ 'wɩ‑ ‑Yusu a 'hʋɩ yɩ. 'A ‑tɩ, 'aan 'hʋɩ mɔ ‑Yusu 'Klɩsʋ a 'hʋɩ a 'kabɩ ꞊nɩɔ. Ɛ nɔ‑ kɔ ‑tɩ, 'n 'yɩ yɩ ‑blɛɛ ‑nɩ, ꞊bʋ gba ‑Yusu 'Klɩsʋ a 'hʋɩ a 'kɩbɩa, ꞊bʋ nu꞊o 'lawlunʋgba a 'hʋɩ a 'kɩbɩa ‑mɔ.
16 Ba kɔ 'a yiyie, ‑ɛ mɔ, nyiblo kɔ 'lawlunʋgba 'hʋɛn‑, 'bʋ pɛ bʋ, ‑ɛ ‑bɩ ɛ kɔ꞊ɔ 'hʋɛn‑, ʋ ‑hɛ ‑tonyiblo nɩ ‑do, ‑ɛ nu꞊o, Nyɩsʋa a win wɛn 'nɩ: «Nyɩbɛyugbe kɔ nʋgba 'hʋɛn‑, ʋ di ‑hɛ ‑tonyiblo nɩ ‑do.»
17 Kɛɛ, nyiblo 'bʋ nɩ 'ʋ, 'bʋ ‑nyi 'a dɩɔnʋ Kʋkɔnyɔ ‑Yusu, ‑ɛ ‑bɩ ɛ kɔ꞊ɔ 'hʋɛn‑, ʋ ‑hɛ ‑tonyiblo nɩ ‑do, 'kɩ 'lɩ 'a ‑Hihiu* a 'klɩ 'kwli.
18 Ɛ nɔ‑ nu꞊o, 'nɩ yɩ 'a mʋ ‑lee ‑nɩ: Ba yraa 'lawlu. Nyiblo 'bʋ yɩ dɛ 'kuku ‑bɩ nɩ ni, ɛ 'yɩ 'a ‑plahʋɩ 'pa‑, ɛ 'nɩ ‑nu꞊o lɩ꞊ɩ ‑mɔ. Kɛɛ, nyiblo 'bʋ yɩ 'lawludɛ nɩ ni, ‑ɛ ‑bɩ ɛ ni dɛ 'kuku, 'kɩ 'ʋ 'a dɩɔnʋ a ‑plahʋɩ ‑mɔ.
19 Ba kɔ 'a yiyie, ‑ɛ mɔ, 'aan ‑plahʋɩ, ɛ nɔ‑ mɔ Nyɩsʋa a ‑Hihiu a bʋnɩɩlɛ. Nyɩsʋa, nɔ‑ ‑nyi 'a mʋ 'a ‑Hihiu a 'mʋ, ‑ɛ di꞊e nu, ɛ 'mʋ 'lɩ 'aan ꞊wlɩ kɩ nɩ. Ɛ 'yɩ 'aan 'mumu 'pa‑, a 'yɩ 'aan dɩɔnʋ win kɩ ‑kɔɔ ‑nɩ, Nyɩsʋa, nɔ‑ kɔɔ nɛ 'a mʋ win kɩ,
20 ‑ɛ nu꞊o, ɛ ‑ha 'a 'Yu nɩ, 'kɩ bʋ ꞊gblɛ 'a mʋ, 'kɩ 'ʋ 'aan dɛ 'kuku a ‑ta'. 'A ‑tɩ, ba ‑ha 'aan 'hʋɩ, 'kɩ 'ʋ Nyɩsʋa a ‑tɩ a 'yi'bʋalɛ a ‑ta'.