24
Jiwowoŋ jigonoŋ kondemondeeŋ koloowaa.
Maak 13.1-2; Luuk 21.5-6
1 Jiisasnoŋ jiwowoŋ jigo mesaoŋ kamaaro gowokourutanoŋ iwaanoŋ kaŋ jiwowoŋ jigowaa totoŋ uutanoŋ miri ragiti, ii Jiisas qendeema mugi.
2 Qendeema mugi meleema kokaeŋ iŋijoro, “Miri kuuya ii saanoŋ iŋiijuto, niinoŋ qaa hoŋa moŋ kokaeŋ iŋijowe mobu: Ii mono kondeeŋgi miriwaa jamo moŋ ii jamo mombaa qaganoŋ mende ewaato, qeqelala saoyagadeeŋ ewaa.” Kiaŋ.
Kakasililiŋ ano sisiwerowero koloowaa.
Maak 13.3-13; Luuk 21.7-19
3 Jiisasnoŋ Oil gere baaŋanoŋ kema raro gowokourutanoŋ iyaŋgia siri iwaanoŋ kaŋ kokaeŋ qisiŋ mugi, “Boi, qaa jejaŋi, iikawaa hoŋa mono naa kambanoŋ asugiwaa ano giinoŋ kana balombaa kambaŋa tegomambaajoŋ ambaati, iikawaa aiweseyanoŋ mono nomaeŋ asugiwaa? Ii saanoŋ ninijowa.”
4 Kaeŋ qisiŋ mugi meleema kokaeŋ jero: “Moŋnoŋ aŋgomokoloŋ ano jiŋjauŋ kembubotiwaajoŋ mono galeŋgia meŋ laligowu.
5 Ejemba mamaganoŋ asugiŋ noo qananoŋ kokaeŋ jewuya, ‘Niinoŋ Hamoqeqe Toya Kraist koloojeŋ.’ Kaeŋ jeŋ ejemba mamaga tiligoŋ oŋombuya.
6 Oŋo manjawaa bujuya ano otoŋa kolooŋ kema karo momakebuya. Ii moma jeneŋgia orowabotiwaajoŋ mono galeŋgia mewu. Iwoi kaaŋa ii waladeeŋ koloowaatiwaa jejetaga. Ii koloowaato, balombaa kambaŋanoŋ mono iikanondeeŋ uulaŋawo mende tegowaa.
7 “Kantri moŋnoŋ kantri moŋ uŋuwombaajoŋ waabuya. Ejemba tuuŋ moŋnoŋ tuuŋ moŋ yoŋowo aroŋ qeŋ aowombaajoŋ waabuya. Gomaŋa gomaŋa kanoŋ bodia bodia koloowaa ano naŋ somasomata ii qonjoma meŋ namo meleeno kemeŋkebaa.
8 Iwoi kuuya ii emba korowonoŋ masu kanaiŋ uŋuŋkejiwaa so. Balombaa kambaŋanoŋ mono iikawaa so kanaiŋ tegomambaajoŋ ambaa.
9 “Kaeŋ ambaato, kambaŋ kanoŋ tosianoŋ oŋo uugia meleeŋgitiwaajoŋ ama gawman yoŋoo boronoŋ oŋooŋgi siimbobolo ama oŋoma uŋugi komuwuya. Kantri kuuya yoŋonoŋ noojoŋa ama kazi ama oŋomakebu.
10 Kambaŋ kanoŋ mamaganoŋ momalaarigia mesaoŋ aŋgonaŋ meŋ kazi ama aowuya.
11 Gejatootoo ejemba takapolakaya mamaganoŋ asugiŋ ejemba mamaga kilikalu meŋ oŋoŋgi jiŋjauŋ qeŋ kemakebuya.
12 “Jeulalaŋ Toyanoŋ seiŋ ejemba galeŋ koma oŋombaatiwaajoŋ ama uumeleeŋ ejemba seiseiya yoŋoo uugianoŋ olomooro uujopagianoŋ looriŋ zololoŋgowaa.
13 Moŋnoŋ kaparaŋ koma kotiiŋ boŋ qeŋ nama laligoro balombaa kambaŋanoŋ tegowaati, iinoŋ mono oyaŋboyaŋ buŋa qeŋ aowaa.
14 Anutuwaa bentotoŋaa Oligaa Buŋa koi mono waladeeŋ namowaa kantria kantria kuuya kanoŋ jeŋ seigi kanageso so naŋgonaŋgo qaaya mogigo balombaa kambaŋanoŋ iikawaa gematanoŋ tegowaa. Kiaŋ.
Jerusalem sitiwaa kondemondeeŋ uuduuduuyawo
Maak 13.14-23; Luuk 21.20-24
15 “Gejatootoo eja Danielnoŋ kondemondeeŋ uuduuduyawo kawaa qaaya jerota eja. Qaa iikawaa so tosianoŋ kaŋ kondemondeeŋ ano iwoi aŋgonjorayawo ii jiwowoŋ jigo toroyanoŋ aŋgi nano iibuti, qaa koi weeŋgowagati, iinoŋ mono saanoŋ geja ama moma kotowa.
16 Kambaŋ iikanoŋ Judia prowinsnoŋ laligowuti, oŋonoŋ mono misiŋgoŋ horoŋ baaŋanoŋ kembu.
17 Miri kosianoŋ sombenoŋ laligowaati, iinoŋ mono kamaaŋ geso iwoiya memambaajoŋ miri uutanoŋ mende uba.
18 Gawonoŋ kema laligowaati, iinoŋ mono kaaŋagadeeŋ malekuya memambaajoŋ eleema mirinoŋ mende kemba.
19 “Yei! Emba korowo ano merabora ajunoŋ yoŋonoŋ kambaŋ iikanoŋ nomaeŋ uulaŋawo kembuya?
20 Kawaajoŋ iwoi ii koŋuru me Sabat kendombaa kambaŋanoŋ mende koloowaatiwaajoŋ mono qama kooliŋkebu.
21 “Ii kokaembaajoŋ: Kambaŋ iikanoŋ kakasililiŋ jekania booroŋgoya koloowaa. Kakasililiŋ soya kaaŋa ii wala eeŋanoŋ kambaŋ moŋgeŋ mende kolooŋ ero. Anutunoŋ iwoi kuuya mokolooroti, kambaŋ iikanondeeŋ kanaiŋ kambaŋ kokanoŋ laligoŋ kouma kambaŋ biiwianoŋ moŋ mende kolooro. Wala eeŋanoŋ mende kolooro ano kanageŋ kambaŋ moŋnoŋ mombo mende koloowaa. Kawaajoŋ mono qama kooliŋ laligowu.
22 Poŋnoŋ kokojinjiŋ kambaŋ ii mende meŋ torinagati eeŋ, ejemba kuuyanoŋ mono tiwilaadaborowuyagato, ejemba iyaŋaajoŋ meweeŋgoŋ oŋonoti, iyoŋoojoŋ ama weeŋ iikawaa jaŋgoya ii meŋ toriwaa.
23 “Kambaŋ iikanoŋ kokaeŋ jewuya, ‘Mobu! Kraistnoŋ koi laligoja,’ me ‘Iibu! Hamoqeqe Toyanoŋ endu nanja.’ Moŋnoŋ kaeŋ jewaati eeŋ, ii mono mende moma laariwu.
24 Ii kokaembaajoŋ: Hamoqeqe toya qoloŋmoloŋgoya ano gejatootoo ejemba takapolakaya asugiŋ aŋgoleto ano aiwese somasomata megi letombuya. Kaeŋ letoŋgi Anutunoŋ ejemba iyaŋaajoŋ meweeŋgoŋ oŋonoti, ii kaaŋagadeeŋ eŋkaloloŋ meŋ oŋombutiwaajoŋ aŋgobato meŋ kaparaŋ koŋgi jiŋjauŋ qewubo. Oŋo galeŋgia awaagadeeŋ meŋ aoŋ laligogi ii amamaawuya.
25 Mobu! Niinoŋ iwoi kuuya ii mende kolooro waladeeŋ iŋijowe modaboroju.
Siwe gomambaa Eja hoŋanoŋ asugiwaa.
Maak 13.24-27; Luuk 21.25-28
26 “Kawaajoŋ ‘Hamoqeqe Toyanoŋ baloŋ qararaŋkoŋkoŋanoŋ laligoja,’ kaeŋ jegi mobuti eeŋ, iikanoŋ mono mende kembu. Me ‘Mobu! Kraistnoŋ miri kawaa uutanoŋ asugiŋ raja,’ kaeŋ iŋijogi ii mende moma laariwu.
27 Ii kokaembaajoŋ: Siwe gomambaa Eja hoŋanoŋ mombo kawaati, kambaŋ ii mono oobiliwaa so kokaeŋ koloowaa: Ii weeŋ koukoutanoŋga pilitik bilisik ama leegeŋ weeŋ kemekemetanoŋ sokoma asariŋ keno iijoŋi, iinoŋ mono iikawaa so asugiwaa.
28 “Oro gisaganoŋ moŋgeŋ ewaati, mamboŋkarara yoŋonoŋ iikanoŋ horoŋ ajorooŋkejuti, mono iikawaa so koloowaa.” Kiaŋ
Siwe gomambaa Eja hoŋanoŋ asugiwaa.
Maak 13.24-27; Luuk 21.25-28
29 “Koŋajiliŋ kambaŋ iikanoŋ tegoro iikanondeeŋ
weeŋ jaayanoŋ injaŋ kono koiŋnoŋ umuŋ kombaa.
Seŋgelao yoŋonoŋ sombinoŋga tegoŋ kamaawuya ano
sombinoŋ utugoro iikawaa ilawoilaya ii raragia mesaoŋ eŋkaloloŋ aŋgi soowaa.
30 Kambaŋ iikanoŋ Siwe gomambaa Eja hoŋaa aiweseyanoŋ sombinoŋ asugiro iibuya. Kambaŋ iikanoŋ namowaa kanageso kuuya yoŋonoŋ jiŋgeŋ qama saabuya. Saama Siwe gomambaa Eja hoŋa iinoŋ sombimbaa koosu qaganoŋ karo iibuya. Ku-usuŋa somatanoŋ sakondindiŋawo asuganoŋ asugiro asamararaŋa iibuya.
31 Karo iigi romoŋ qaita moŋ uugi otoŋa kotakota mogi Siwe gajobauruta wasiŋ oŋono yoŋonoŋ ejemba Anutunoŋ iyaŋaajoŋ meweeŋgoŋ oŋonoti, ii baloŋ goraaya teetee eugeŋ emugeŋ iikanoŋa kopepereeŋ oŋoma uŋuambuya. Kiaŋ
Noroŋ gerewaa sareqaa
Maak 13.28-31; Luuk 21.29-33
32 “Oŋo noroŋ gere iima tania romoŋgoŋ sareqaa koi mobu. Borianoŋ apuyawo kolooro seŋgia loŋgogi ii iima moma kokaeŋ jeŋkeju, ‘Weeŋ kambaŋa mono dodowija.’
33 Oŋonoŋ kaaŋiadeeŋ aiwese iikawaa so asugiro iima moma asariŋ kania kokaeŋ jewu, ‘Jiisasnoŋ mono nagunoŋ dodowija.’
34 “Niinoŋ qaa hoŋa moŋ kokaeŋ iŋijowe mobu: Ejemba koi kete namonoŋ laligojuti, iyoŋonoŋ mende komugi iwoi kuuya jejeŋi, ii mono iyoŋoo laaligo kambaŋgianoŋ koloowaa.
35 Sombiŋ namonoŋ goroŋ qewaoto, noo Buŋa qaananoŋ mono kambaŋ moŋnoŋ mende aliwaa. Kiaŋ.
Jiisas kawaatiwaa kambaŋa ii moŋnoŋ mende moja.
Maak 13.32-37; Luuk 17.26-30, 34-36
36 “Siwe gomambaa Eja hoŋanoŋ kawaato, naa kambanoŋ kaŋ kuuwaati, iikawaa weeŋa me aua kambaŋa ii moŋnoŋ moŋ mende moja. Siwe gajobanoŋ ii mende moju. Anutuwaa Merianoŋ kaaŋagadeeŋ ii mende moja. Amanoŋ aŋodeeŋ ii moja.
37 Wala eeŋanoŋ Nooawaa kambaŋanoŋ ejembanoŋ laaligogia qemasologeŋ qaganoŋ laligoŋ meŋ kileegiti, iikawaa so mono Siwe gomambaa Eja hoŋanoŋ mombo kawaatiwaa kambaŋanoŋ koloowaa.
38 “Apu gboulu somatanoŋ mende karo waladeeŋ iikanoŋ ejemba nene lombaŋ ama apu kotiga neŋ embaqemba sewaŋaajoŋ aŋgi kema karo agimiŋ aoŋ laligogi. Nanamemeŋ kaeŋ ama meŋ qemasologeŋ laligogi Nooanoŋ waŋgo uutanoŋ uroti, weeŋ iikanoŋ tegoro.
39 Tegoro naa iwoi koloowaati, ii mende mogi apu gboulu somatanoŋ kaŋ jinoŋa qaa tiwilaaŋ oŋono. Kanageŋ Siwe gomambaa Eja hoŋanoŋ mombo kawaati, kambaŋ iikanoŋ ejembanoŋ kaaŋiadeeŋ qemasologeŋ ama laligoŋ tiwilaawuya.
40 “Kambaŋ iikanoŋ eja woi gawonoŋ laligori yoroonoŋga moŋ meŋ moŋ mesaowuya.
41 Kaaŋiadeeŋ emba woi taweŋ orasiŋ rabaoti, iyoroonoŋga moŋ meŋ moŋ mesaowuya.
42 “Poŋnoŋ kawaatiwaa kambaŋa me auaya mende mojutiwaajoŋ mono uugbiligbili laligowu.
43 Gbili laligowombaa qaa koi mono moma kotowu: Gomantiiŋanoŋ kikekakasililiŋ ejanoŋ naa kambanoŋ me auanoŋ kawaati, miri toyanoŋ ii monagati eeŋ, iinoŋ mono gbili rama miria awaagadeeŋ galeŋ mero qosoma umambaajoŋ amamaawaa.
44 Oŋo ‘Siwe gomambaa Eja hoŋanoŋ kambaŋ kokanoŋ mende koubaa,’ jeŋ romoŋgogi iinoŋ mono kambaŋ iikanondeeŋ koubaa. Kiaŋ.
Gawoŋ ejanoŋ silemale laligoŋ tiwilaaro.
Luuk 12.41-48
45 “Kaeŋ kolooro gawoŋ meme ejemba batugianoŋ moronoŋ tiriŋ kotoŋ tosaaŋa uŋuuguja? Tosianoŋ zololoŋgoŋ gawoŋ mesaogi moŋnoŋ momakooto awaawaa qaganoŋ kaparaŋ koma pondaŋ meŋkeji, iinoŋ mono simbawoŋawo kolooja. Miri toyanoŋ nanamemeŋa gosiŋ iima moŋgeŋ kema miriaa ilawoilaya ii borianoŋ ano galeŋa koloowaa. Galeŋa kolooŋ weleŋqeqeuruta ijorotiwaa so kalaŋ koma kambaŋ dindiŋanoŋ uŋuagiŋkebaa.
46 Kaeŋ kalaŋ koma oŋoma laligoro toyanoŋ eleema kaŋ iikaaŋ iima ‘Mono simbawoŋawo koloojaŋ!’ jewaa.
47 “Niinoŋ qaa hoŋa moŋ kokaeŋ iŋijowe mobu: Toyanoŋ ‘Mono simbawoŋawo koloojaŋ!’ jeŋ esuhinaya kuuyaa galeŋa kuuŋ mubaa.
48 Kuuŋ mubaato, gawoŋ meme bibilokoya iinoŋ uutanoŋ romoŋgoŋ kokaeŋ jewaati eeŋ, ‘Poŋnaa kaka kambaŋanoŋ mono koriga eja.’
49 Kaeŋ jeŋ kanaiŋ gawoŋ meme ejembauruta uŋuŋ ureeŋ aoŋ jejelombaŋ ama aisooŋ apu kotiga neŋ uuta sooro eŋkaloloŋ silemale kolooŋ laligowaa.
50 “Kaeŋ laligoŋ kambaŋ moŋnoŋ poŋa koubaatiwaajoŋ mende mambombaati, mono iikanondeeŋ koubaa. Kambambaajoŋ imowamo ulumbuluŋ laligoro mono aua iikanondeeŋ kouma
51 qeŋ japaleleŋ meŋ muŋ jeŋ kotoro uumeleembaa ejemba seleseleya kaaŋa gere sianoŋ kemeŋ siimbobolo mobaa. Kaeŋ moma saama gigilaaŋ gobugia kigi qaro laligowuya.” Kiaŋ.