15
Anutunoŋ Abrambo soomoŋgo areŋ ano.
1 Kaeŋ ama Abrambaa jaaya meleeno jaameleŋ uŋa iiro Poŋnoŋ qaa kokaeŋ jeŋ asugiro, “Abram, gii toroko mende moba. Niinoŋ goo reeŋ koloojeŋ. Goo tawaga mono somata qatawo kolooŋ eŋ ubaa.”
2 Qaa kaeŋ ijoroto, Abramnoŋ kokaeŋ jero, “Oo Poŋ somatana, nii meraborana qaa laligowego tawa nona iikanoŋ mono nomaeŋ ilaaŋ nonaga? Niinoŋ komuwe Damaskas eja Eliezer iinoŋ noo esuhinanaa toya koloowaa.”
3 Kaeŋ jeŋ toroqeŋ kokaeŋ jero, “Giinoŋ gbili moŋ mende nonatiwaajoŋ gawoŋ ejana waŋa noo mirinoŋ laligoji, iinoŋ mono noo ilawoilana kuuya buŋa qeŋ aowaa.”
4 Kaeŋ jero Pombaanoŋ qaa je moŋ ii iwaanoŋ kokaeŋ asugiro moro, “Eja iikanoŋ esuhinagaa toya mende koloowaato, geeŋgaa seleganoŋga mera moŋ koloowaati, iinoŋ mono goonoŋ ilawoila kuuya buŋa qeŋ aowaa.”
5 Qaa kaeŋ asugiro Anutunoŋ Abram wama seleeŋgeŋ kemeŋ qaa kokaeŋ ijoro, “Mono sombinoŋ uuna uro seŋgelao weeŋgoŋ oŋombaatiwaa so koloowaati eeŋ, ii mono saanoŋ weeŋgoŋ oŋomba.” Kaeŋ ijoŋ kokaeŋ toroqeŋ jero, “Goo gbiliuruga yoŋoo jaŋgogianoŋ mono iikawaa so koloowaa.”
6 Kaeŋ jero Abramnoŋ Poŋ moma laariŋ muro momalaaria iiro sokono qaaya jeŋ tegoro solaŋaniro.
7 Poŋnoŋ toroqeŋ qaa kokaeŋ ijoro, “Niinoŋ Poŋ koloojeŋ. Gii Kaldia balombaa gomaŋ qata Uur kanoŋ laligona guambe koi kari. Baloŋ koi gombe buŋa qeŋ aowaatiwaajoŋ ama gii guama koi kawe.”
8 Kaeŋ jeroto, Abramnoŋ kokaeŋ ijero, “Oo Poŋ somatana, baloŋ koi kanoŋ noo buŋaga koloowaati, ii mono naa aiwesega iima moma kotomaŋa?”
9 Kaeŋ jero Poŋnoŋ iwaajoŋ kokaeŋ jero, “Gii mono kema bulmakao embia kowiŋa yambuya karooŋ, meme (noniŋ) embia yambuya karooŋ ano lama ejia yambuya karooŋ ano kewo moŋ ano kewo susu gbilia moŋ ii meŋ noonoŋ kawa.”
10 Kaeŋ jero Abramnoŋ kema ii korebore meŋ kaŋ oro ii biiwianoŋ qosoma oŋoma leegeŋ leegeŋ ii areŋgoro kana leelee arenoŋ egi. Kaeŋ anoto, kooŋ ii mende qosono.
11 Mende qosoma qamogia lee lee areŋgoŋ oŋono kooŋ kawalia yoŋonoŋ kaŋ qamo yoŋoo qagianoŋ kamaaŋ koŋgito, Abramnoŋ ii konjoma oŋono keŋgi.
12 Weeŋ jaaya tegoŋ kememambaajoŋ anoti, kambaŋ iikanoŋ Abrambaa jaayanoŋ kamaaŋ mero gaoŋ biŋawo ero. Kaeŋ ero paŋgamaŋ ziwiziwiwaa kanjaŋa kanoŋ kaŋ turuŋ muro.
13 Turuŋ muro Poŋnoŋ kokaeŋ ijoro, “Qaa hoŋa koi mono geja ama moba: Goo gbiliuruganoŋ mono baloŋgia mesaoŋ kantri moŋnoŋ kema wabaga laligoŋ ubuya. Kaeŋ laligoŋ yoŋoo weleŋqeqeurugia omaya koloogi ii yambu 400:waa so meluŋgoŋ oŋoma laligowuya.
14 Kaeŋ laligowuyato, niinoŋ kantri weleŋqeqeurugia omaya kolooŋ laligowuyati, iyoŋoo qaagia kaaŋagadeeŋ jeŋ tegoŋ iroŋa meleembe qagianoŋ ubaa. Kaeŋ uro isama oŋoŋgi kantri ii mesaoŋ esuhinagia mamaga meŋ eleema kawuya.
15-16 Niinoŋ Amor kanageso ii baloŋ kokanoŋ uulaŋawo mende oŋotaamaŋa. Wala siŋgisoŋgoya siŋgisoŋgoya ama bolidaborogi i iroŋa tororo meleema oŋomaŋatiwaa kambaŋanoŋ koloowaati, kambaŋ iikanoŋ mono ii oŋotaamaŋa. Kawaajoŋ goo esauruga yoŋoo esaurugia kolooŋ laligowuyati, kambaŋ kanoŋ goo gbiliuruganoŋ mono eleema koi kawuya. (15) Yoŋonoŋ kaeŋ kawuto, geeŋgo wala yambugaa kambaŋanoŋ waziiŋ komuro luaenoŋ maŋasauruga yoŋoonoŋ kena roŋ koma gombuya.”
17 Poŋnoŋ kaeŋ jero weeŋ jaayanoŋ tegoŋ kemero paŋgamaŋ mero iwoi kokaeŋ kolooro iiro: Monjoŋ mombaa uutanoŋ gere bolaŋanoŋ kokobilibiliawo jeŋ asariro kowa konduŋkonduŋawo pumpuŋgoro. Iwoi iikanoŋ asugiŋ oro koomuya qoosoŋa iyoŋoo batugianoŋ nama kema karo.
18 Poŋnoŋ oro leelee iikawaa batugianoŋ kema kaŋ somaŋa kanoŋ Abrambo soomoŋgo areŋ ama (kaisareyanoŋ ii meŋ kotiiŋ) qaa kokaeŋ ijoro, “Niinoŋ baloŋ koi ii goo gbiliuruga ii buŋa qeŋ oŋomaŋa. Iikawaa jawoya ii Iijiptwaa apu gowoya (Nail) iikanoŋa kanaiŋ kaŋ koi uuguŋ kema apu bereŋa somata qata Yufreitis iikanoŋ tegowaa.
19 Kambaŋ kokaamba ii kanageso koi kaaŋa yoŋoo baloŋ eja: Kin kanageso, Kenas kanageso, Kadmon kanageso,
20 Hit kanageso, Periz kanageso ano Refaim kanageso,
21 Amor kanageso, Keinan kanageso, Girgas kanageso ano Jebus kanageso. Yoŋoonoŋ baloŋ kuuya ii mono meŋ sokoma laligowu.” Kiaŋ.