13
Loot ano Abram yoronoŋ deeni.
1 Abramnoŋ Iijipt baloŋ mesaoŋ embia ano bao hina iwoiya kuuya meŋ uŋuama Lootwo motooŋ eleema kema Keinan balombaa leeya Saut waageŋ qata Negew kanoŋ kougi.
2 Abrambaanoŋ lama bulmakao ano goul silwa ii ambembo eŋ muro eja kindiŋbiriawo laligoro.
3 Kaeŋ laligoŋ Negew distrik uutanoŋ rama mesaoŋ tawayagadeeŋ rooŋqeqegianoŋ eŋ waama kema laligoŋ Beetel gomanoŋ kougi. Opo sel kuuŋa wala Beetel ano Ai gomaŋ iyoroo batugaranoŋ kuuŋ mero nanoti, mono iikanoŋ kougi.
4 Wala siimoloŋ alata meroti, mono iikanoŋ kouma Pombaa qata qamago qama kooliro.
5 Lootnoŋ Abrambo rama mesaoŋ laligoroti, iinoŋ kaaŋiadeeŋ lama bulmakao tuuŋa tuuŋa ano opo sel kuuŋa kuuŋa ii mamaga meŋ laligoro.
6 Kaeŋ laligoŋ oro esuhina iwoigara mamaga eŋ orono balonoŋ mende sokono. Ii motooŋ uŋuagiwaotiwaa so mende kolooro kileŋ motooŋ rama laligowotiwaajoŋ amamaari.
7 Amamaaŋ Abram ano Loot yoroonoŋ oro galeŋurugara yoŋoo batugianoŋ balombaa aŋgowowoya asugiro. Kambaŋ kanoŋ Keinan kanageso ano Periz kanageso yoŋonoŋ baloŋ iikawaa toya koloogi yoŋowo motooŋ laligogi.
8 Kaeŋ laligoŋ Abramnoŋ beeta Loot kokaeŋ ijoro: “Anara mono maŋ mera laligojo. Kawaajoŋ nii ano gii batunaranoŋ me oro galeŋurunara yoŋoo batugianoŋ andoruru mono mende ewa.
9 Kawaajoŋ saanoŋ deembo. Baloŋ kuuya mono goo jaasewaŋganoŋ asuganoŋ eŋ kenji, ii saanoŋ iijaŋ. Kaeŋ ano giinoŋ qaninaraageŋ kemaŋa jewagi eeŋ, niinoŋ saanoŋ dindinaraageŋ kemaŋa. Me giinoŋ dindinaraageŋ kemaŋa jewagati eeŋ, niinoŋ saanoŋ qaninaraageŋ kemaŋa.”
10 Kaeŋ ijoro Lootnoŋ Jordan balombaageŋ uuŋ baloŋ koria somata kuuya iiro Anutunoŋ ii awaa bedu mero Pombaanoŋ oyaŋboyaŋ urukisi kelegawo kaaŋa kolooro. Ii Iijipt yoŋoonoŋ baloŋ kaaŋa eŋ Zoar gomaŋ baageŋ keno. Wala Poŋnoŋ Sodom ano Gomora mende tiwilaaŋ orono kambaŋ kanoŋ baloŋ ii kaaŋa ero.
11 Kaeŋ ero Lootnoŋ ii iima gosiŋ Jordambaa baloŋ koria somata kuuya ii meweeŋgoŋ weeŋ koukoutanoŋ baageŋ keno. Kaeŋ ama deeni.
12 Deema Abramnoŋ Keinan balonoŋ kema laligoroto, Lootnoŋ baloŋ koria somataa taoŋa taoŋa yoŋoo batugianoŋ kema kaŋ laligoro. Kaeŋ laligoŋ opo sel kuuŋa metogoŋ meŋ kuuŋ kema nama tetegoyanoŋ Sodom kosianoŋ keuma laligoro.
13 Kanoŋ laligoroto, Sodom kanatuuru yoŋonoŋ kanageso bologa kolooŋ Poŋ qetama siŋgisoŋgo jekania booroŋgia ama meŋ laligogi.
Abramnoŋ Hebron gomanoŋ kema rama laligoro.
14 Lootnoŋ Abram ooma keno kambaŋ kanoŋ Poŋnoŋ Abram qaa kokaeŋ ijoro: “Mono jaaga hak ataama bagaageŋ uuŋ waama eleema gemagaageŋ uuŋ kaaŋagadeeŋ weeŋ koukoutanoŋ ano weeŋ kemekemetanoŋ baageŋ uuwa.
15 Baloŋ kuuya koi iijaŋi, ii mono gii ano goo gbiliuruga oŋoo buŋa qewe kambaŋ tetegoya qaa buŋagiaga eŋ ubaa.
16 Niinoŋ gbiliuruga kolooŋ seisei mamaga oŋombe jaŋgogianoŋ somariiŋ namowaa sakasiŋa kaaŋa koloowaa. Moronoŋ sakasiŋ jaŋgoya weeŋgonagati, iinoŋ saanoŋ gbiliuruga yoŋoo jaŋgogia mewaa.
17 Niinoŋ baloŋ koi mono goo buŋaga qeŋ gonjeŋ. Kawaajoŋ saanoŋ waama kema kaŋ baloŋ kuuya koi bakabaka eugeŋ emugeŋ iima kotoŋ laligowa.”
18 Kaeŋ ijoro Abramnoŋ waama opo sel kuuŋa qetegoŋ meŋ kuuŋ kema Hebron gomanoŋ kaŋ Mamre gomanoŋ jujuu gere somata nama keŋgiti, iikawaa kosogianoŋ raro. Kanoŋ rama Pombaajoŋ siimoloŋ alata moŋ mero. Kiaŋ.