3
Radone zamaḡano haḡai boroꞌe Keriso edereꞌeteꞌe
1 Nego nabudi, e ꞌahige bare reihi: Za Zuhiꞌa Boro teite tiburanateꞌe uꞌano matuꞌoꞌi! Eḡeꞌa ibite iraduguziroteꞌe ḡoeꞌa, bare bare to zinihi raꞌohe. Aꞌe eḡe mazao mene gau boro, zu aꞌe zaeꞌa mene veꞌoroga veize.
2 Badiꞌa aḡuꞌa zu haḡai sauꞌa haḡaeꞌeteꞌe azaḡa veize ḡianoꞌi! Zeꞌe Iuda azaḡa. Iuda azaḡaꞌe zae soꞌozeꞌenaꞌa, ahiri rana iḡuri haḡaine, Badiꞌa mone reꞌuma raꞌohe. Rehano zeꞌe foure ahiri ruꞌi tauḡeꞌohe. Aꞌe huga oꞌoꞌa.
3 U emeꞌe hube hune Badiꞌa mone raꞌeteꞌe azaḡa. Emeꞌe Badiꞌa Vine Zaḡoḡaniꞌa ibitofeadu Badiꞌa mazao kurauꞌohe. Eme Keriso Iesu niguneꞌohe, eꞌanoꞌo ahiri rana iḡuri haḡaeꞌeteꞌe. Zu Badiꞌa ubuḡa rouga radu zeḡe edeḡano gaueteꞌe azaḡa emeꞌa mene zamare borofeꞌohe. Aꞌe huga oꞌoꞌa haḡaiḡa.
4 Rehano vaze ꞌahoganiꞌa aniꞌe vaze nagiga raꞌeteꞌe moneo Badi'a'a mae ḡihini'uma raꞌeteꞌe borofe zamarine, eḡe zuni eḡe moneo borofe hune rouga idaḡa.
U vaze ꞌahogani'a ahiri gauḡa ḡehaḡa haḡae'ohe rae zamarine, a'e eḡe'a vitinoga.
5 Eꞌe fureranadu mada fuꞌo zu uḡidu fare meirotene, ahirihe rana iḡuri haḡairo. Eꞌe Isaraela vazeḡa, Beniamini iduhu vazeḡa, ebu Heberu mariga huga huga. Iuda goro ḡoeꞌa moneoꞌe Farisea vazeḡa, goro ḡoeꞌa faifaine haḡaido.
6 Badiꞌa veize inareꞌeteꞌe moneoꞌe ekalesia azaḡa eḡeꞌa zamahe niduꞌa hina sausauzido. Iuda azaḡa goro ḡoeꞌa faifairu haḡaadu, duduḡa raꞌeteꞌe moneoꞌe, mene veꞌoniro.
7 Eḡeꞌa ahi ḡaugaꞌe manoḡa tauḡi zu ḡau boro bagaḡa rae zamarinu. Rehano Kerisoꞌa eḡe veize rudaroteꞌe ederirotene, ꞌuguḡa haḡaiḡaꞌe huga oꞌoꞌa haḡaiḡa rae zamarinu, mazaḡa eꞌe Keriso ederihi reinu.
8 Ebu e ꞌize bare reihi. Ibite Badiꞌaꞌa matuꞌoga veize rae zamare haḡaidoteꞌe haḡaiꞌa niduꞌaꞌe huga oꞌoꞌa raꞌohe. U Keriso Iesu, eḡe Zuhiꞌa Boro, aniꞌe inihu edereꞌetaꞌaꞌe, manoḡa boro bagaḡa. Eꞌe, Keriso uꞌano haḡaihe amahiḡa niduꞌa modiro. Ebu ꞌuguḡa haḡaiḡaꞌe busi rae zamareꞌohe, eꞌe Keriso mone reifine,
9 zu ane teite tiburafine. Eꞌe izidi eḡe inarao goro ḡoeꞌa haḡaadu, Badiꞌa ubumao duduḡa rae, mene raꞌohe, rehano Keriso mazao fieꞌeteꞌeanoꞌo Badiꞌa ubumao duduḡa rae raꞌohe. Aꞌe Badiꞌa aneꞌa ꞌouge raꞌohe, mazaḡa eḡeꞌa Keriso mazao fieꞌeteꞌe uꞌano.
10 E uraꞌe Keriso faifairu ederihi, zu aniꞌa runeonoꞌo bare ḡabodiroteꞌe gigiꞌaḡa ederihi, zu ane zaharaniroteꞌe teige eḡe zuni zahararatihi, zu aneꞌa rudaroteꞌe teige eḡe zuni haḡai sauꞌa moneonoꞌo rudau vaḡinihi.
11 ꞌOugadu e nougihi reine zuni, eḡeꞌa Keriso teite runeonoꞌo bare ḡabode iḡunadu, eꞌe ḡaboneḡa hina onamihi raꞌohe.
Zamamone oname hohono'i
12 Eꞌe, ꞌuguḡa haḡaiḡa niduꞌa haḡae hauḡeha rae, mene raꞌohe, zu eꞌe Keriso teiḡe duduḡa hune rae mene raꞌohe. Rehano eꞌe haḡaiḡa haḡae hunihi rae ize inareꞌohe, mazaḡa, eꞌe Keriso hune teiḡoga veize, Keriso Iesuꞌa eḡe meiro.
13 Nego nabudi, eꞌe Keriso teiḡe huneha rae mene zamareꞌohe. Rehano eꞌe, ḡau tiba ꞌadi haḡae hunihi raꞌohe: Eꞌe, ḡaruni moneo haḡairoteꞌe ḡauḡa niduꞌa mene zamareꞌohe. Rehano zama mone ḡauḡa daꞌo zamareꞌohe. Aꞌe Keriso ederadu, ane teigoga veize inare gaueꞌohe.
14 Eꞌe Keriso hune teiḡoga veize inare onameꞌohe zu ḡonagano Badiꞌaꞌa naeḡa iniꞌuma. Eꞌe naeḡaꞌe Badiꞌaꞌa huheꞌeteꞌe zu adure zamahe itiꞌuma, mazaḡa Kerisoꞌa eḡe veize gau haḡairo.
15 Eꞌanoꞌo emeḡe niduꞌa Badiꞌa mazao fiadu zamarone manoḡa meiroteꞌe azaḡaꞌe, ꞌahige zamariꞌuma. Ebu haḡai nu zamaḡano zaeꞌa nufe zamarine, aꞌe zuni Badiꞌaꞌa zamazeo doḡoꞌani fureno ziniꞌuma.
16 Rehano ḡoere boroꞌe emeḡe iniuiniuꞌe Badiꞌaꞌa ihofiroteꞌe idunaḡano haḡae onamiꞌuma.
17 Nego nabudi, eḡe teiḡoꞌi zu emeḡeꞌa ihoziroteꞌe haḡaiḡano radiuꞌeteꞌe azaḡa faine ḡianeꞌenaꞌa zeḡe zuni tuhuzoꞌi.
18 Mazaḡa vaze ḡehaḡaniꞌa agire teiḡe Keriso agireniꞌohe. Eꞌe ibite ꞌuguḡa azaḡa haḡai ꞌai ḡae ḡehaḡa meꞌodo ziniro rehano izidi zeḡe haḡai zamaradu nihe vuḡaniꞌa onaeꞌenaꞌa bare raꞌohe.
19 Zeꞌe ḡonagano rudaune, irerogao diuḡiꞌuma. Zeꞌe ahirizeꞌa urateꞌeteꞌe haḡaiḡa daꞌo haḡae radiuꞌohe. Ebu mazagaro haḡaiḡa haḡaeꞌe rehano, aꞌe zeḡeꞌa bare iteꞌohe, zeḡeꞌa zamareꞌeteꞌe ḡauḡa niduꞌaꞌe raha ꞌadi ḡauḡa.
20 Rehano emeḡe radone habaꞌaꞌe adureo. Ebu Zuhia Boro Iesu Keriso eme ḡabofiꞌuma vazeḡa, eꞌanoꞌo ovaiteꞌe guhine radiuꞌeꞌuma.
21 Ani ḡau nidua'a zuhi'ani'et'e inaraḡa obone'ohe. Aniꞌa bare ovaite'e madaḡano, e'e inaraḡa hina ahirife ruhura'umate'e ani'a mae nufadu, ahi'a iziḡa manoḡa heuḡa rifi'uma.