8
Lefera Vazeḡa Fainiro
(Mareko 1:40-45, Luka 5:12-16)
1 Iesuꞌa maḡanonoꞌo ovairotene, vaze ḡuḡuvaḡaniꞌa ane hegote onamiro.
2 Lefera vazeḡa ꞌahoganiꞌa ani vaḡe onairo, ebu ane zamao obena hina tuḡadu niro, raenaꞌa, “Zuhiꞌa Boro, ḡa uratoꞌidene faihoꞌi!”
3 Iesuꞌa ꞌevoꞌa einadu vaze eꞌe oboniro, ebu raenaꞌa, “E urateꞌohe. Ḡae manoroꞌi!” ꞌOugadu lefara eꞌeꞌa zogone dauḡiro.
4 Ebu Iesuꞌa ninaꞌa, “Vaze ꞌahoga ago noꞌi. Rehano dibuꞌo vazeḡa vaḡe onamadu ahiꞌo ihonoꞌi! Ebu ḡaeꞌa manorateꞌe vazeꞌa ederifine, Moseꞌa reiroteꞌe gahunoḡa mae onamadu Badiꞌa dibuꞌo hanoꞌi.”
Uti Azaḡa Ḡihiꞌaniꞌa Iesu mazao Firo
(Luka 7:1-10, Ioane 4:43-54)
5 Iesuꞌa Kaperanauma neḡa boro diuḡirotene, Roma uti azaḡa ḡihiꞌa ꞌahoganiꞌa onaadu dananoga uminiro,
6 raenaꞌa, “Zuhiꞌa Boro, eḡe tuḡure vazeḡa ꞌahogaꞌe ahiꞌa haganoga mene idaḡa radu neo bazeꞌohe. Ahiꞌaniꞌa giginadu ḡaniḡanau radiuꞌohe.”
7 Iesuꞌa ninaꞌa, “Eḡeꞌa onamadu fainiꞌuma.”
8 Rehano uti azaḡa ḡihiꞌaniꞌa naenaeninaꞌa, “Zuhiꞌa Boro, eꞌe mene vaze manoḡa, eꞌanoꞌo ḡaeꞌa eḡe ne diuḡogaꞌe mene manoḡa. Rehano ḡoere daꞌo roꞌi, ꞌougine eḡe tuḡure vazeḡaꞌe manoriꞌuma.
9 Mazaḡa eꞌe zuni vaze ꞌahoga ꞌuꞌuḡano gaueꞌohe, zu eḡe uti azaḡaꞌe eḡe ꞌuꞌuḡano gaueꞌohe. Eḡeꞌa vaze ꞌahi ninaꞌa, 'Onamoꞌi' reine, aniꞌe onameꞌohe, ebu ꞌahoga omo ninaꞌa, 'Aroꞌi' reine, aniꞌe areꞌohe. Eḡeꞌa eḡe tuḡure vazeḡa ꞌahoga ninaꞌa, 'ꞌAdi haḡaoꞌi' reine, aniꞌe haḡaeꞌohe.”
10 Iesuꞌa eꞌe ḡoeꞌa igirotene zaguzagaro, ebu ani hegotiroteꞌe azaḡa ziro, raenaꞌa, “Eḡeꞌa hube hune ziꞌohe, Badiꞌa mazao ꞌahige fie gigaruꞌeteꞌe vazeḡaꞌe Isaraela azaḡa zamaḡano ize mene horoneha!
11 E ziꞌohe, Iuda mene azaḡa ḡehaḡaniꞌa madaꞌa iteꞌeteꞌe moneonoꞌo zu madaꞌa zubureꞌeteꞌe moneonoꞌo onaiꞌuma, ebu Badiꞌaꞌa ibitohauꞌeteꞌe zamaḡano Aberahamo, Isako zu Iakobo teite ehoradu ogau tiburaꞌuma.
12 Rehano Iuda azaḡa, Badiꞌaꞌa ibitoziniꞌohe rae zamarirotaꞌaꞌe, enona mae feuzadu uzabo zamaḡano radiꞌuma. Ze eꞌea niaꞌuma zu ḡononeze atitiꞌuma.”
13 Ebu Iesuꞌa uti azaḡa ḡihiꞌaḡa niro, raenaꞌa, “Onamoꞌi. Ḡaꞌe eḡe mazao fieꞌeteꞌe teige, ḡae tuḡure vazeḡaꞌe manoriꞌuma.” Aniꞌa ꞌouge reirotene madaḡano tuḡure vazeḡa eꞌe manoriro.
Vaze Ḡehaḡa Faiziro
(Mareko 1:29-34, Luka 4:38-41)
14 Ebu Iesuꞌa Petero ne diuḡirotene Petero emoḡa roḡaeḡaꞌe uginadu baze radoga horoniro. ꞌAhiꞌaꞌe gigiꞌa bagaḡa.
15 Iesuꞌa roḡae ꞌevoꞌa obonadu ahiꞌa gigiꞌa ꞌai dauḡiro. Ebu ani iḡunadu Iesu veize ogomu ḡorohe haro.
16 Ḡoravareꞌeteꞌe zamaḡano, vine sauꞌaniꞌa ragano reiroteꞌe azaḡa ḡehaḡa Iesu vaḡe tutuze onairo. Aniꞌe ḡoere hina vine sauꞌa hegoze buziro ebu ugi azaḡa niduꞌa faiziro.
17 Aꞌe peroveta vazeḡa Isaiaꞌa Badiꞌa ḡoere reiroteꞌeꞌa hudaro, raenaꞌa,
“Ani emeḡe gigiꞌa meiro ebu emeḡe ugi mae vaḡiniro.”
Iesu Hegoteꞌeteꞌe Vazeḡa
(Luka 9:57-62)
18 Iesu vaze ḡuḡuvaḡaniꞌa ane mazao nuꞌoru radoga horozirotene, ane tahiꞌatahiꞌa ziro, raenaꞌa, “Duꞌura moneafa fare onamihi.”
19 Eꞌe madaḡano Mose goro ḡoeꞌa ihozeꞌeteꞌe vazeḡa ꞌahoganiꞌa Iesu vaḡe onaadu niro, raenaꞌa, “Ihore vazeḡa, ḡaeꞌa noꞌe onamine, e ḡae hegotiꞌuma.”
20 Iesuꞌa naenaeninaꞌa, “Butu ḡuniḡaꞌe bazuni habaꞌazeta, ebu hitana niniḡaꞌe nezeta. Rehano eḡe, Vaze Ubuḡaꞌe bazunihe habaꞌaꞌe oꞌoꞌa.”
21 Iesu tahiꞌa ꞌahoganiꞌa niro, raenaꞌa, “Zuhiꞌa Boro, e geno mamahe guri onamihi.”
22 Rehano Iesuꞌa ninaꞌa, “Ḡaꞌe eḡe hegotoꞌi. Vine ruga azaḡaniꞌa rune azaḡa ḡuriꞌuma.”
Zavara ꞌUiro
(Mareko 4:35-41, Luka 8:22-25)
23 Ebu Iesuꞌa ḡasio tirirotene, ane tahiꞌatahiꞌaꞌa ani hegote tiriro.
24 Eꞌe enogano, zavara boroꞌa duꞌurao feuriro ebu saꞌuꞌa ḡasio kafere diuḡiro. Rehano Iesu baze radiro.
25 Eꞌanoꞌo zeꞌa ane vaḡe onamadu evaniro, raenaꞌa, “Zuhiꞌa Boro, emeḡe ḡabofoꞌi! Eme nariga zubureꞌohe!”
26 Ebu aniꞌa naenaezinaꞌa, “Za nougadu rihauꞌohe? Zaꞌe Badiꞌa mazao fieꞌetaꞌaꞌe komeꞌa!” Ebu ani iḡunadu zavara zu saꞌu roziro. ꞌOugirotene, zavara zu saꞌuꞌe roḡeru hauḡiro.
27 Iesu tahiꞌatahiꞌaꞌa zaguzagaro, raenaꞌa, “Vaze ꞌahiꞌe nagi vaze? Zavara zu saꞌuꞌa ane ḡoere egohuꞌohe.”
Vine Sauꞌaḡeta Vazeḡa Fainiro
(Mareko 5:1-20, Luka 8:26-39)
28 Iesuꞌa duꞌura moneafa, Gadara habaꞌano feurirotene, vine sauꞌaniꞌa ragano reiroteꞌe vazeḡa ꞌaheuꞌa idu habaꞌanonoꞌo onaadu Iesu hidiro. Zamaze ufeta ḡugiꞌeta ꞌahine, eꞌe ibiḡano vazeꞌa onamoga mene idaḡa reiro.
29 Ebu ze ḡihau bagaḡa ani ḡoreniro, raenaꞌa, “Badiꞌa ubuga! Ḡaꞌe emeḡe mazao nagini urateꞌohe? Ḡaꞌe, kota madaḡa ḡonaga ꞌizema mougano, aduga rifoga veize emeḡe vaḡe onahehe?”
30 U tahiḡa faḡano aba ḡehaḡaniꞌa ogau radiunu.
31 Ebu vine sauꞌaniꞌa Iesu uminiro, raenaꞌa, “Ḡaeꞌa eme hegofe bufoꞌidene, aba ḡuḡuvaḡa ꞌomo mazao tuḡufoꞌi.”
32 Ani vine sauꞌa zinaꞌa, “Onamoꞌi!” ꞌOuge reirotene, ze vaze ꞌaheu mazaonoꞌo buanadu aba zamaḡano diuḡiro. Ebu aba eꞌe niduꞌa maḡa gagagaꞌonoꞌo dure ovoadu duꞌurao diuḡiro ebu hunuhune rudaro.
33 ꞌOugadu aba taufeꞌeteꞌe azaḡaꞌe dure neze onamiro, ebu vine sauꞌaniꞌa ragano reiroteꞌe azaḡa mazao naginiꞌa fureraroteꞌe hariḡa niduꞌa meꞌodoziniro.
34 Ebu eꞌe neḡa azaḡa niduꞌaniꞌa buanadu Iesu hidoga veize onairo. Ze Iesu hidirotene, aniꞌe zeḡe habaꞌanonoꞌo vaḡinoga uminiro.