25
Nogoba Ḡaubanana Hari Idaidaḡa
1 Iesuꞌa bare ziro, raenaꞌa, “Eꞌe madaḡano Badiꞌaꞌa ibitoziniꞌetaꞌaꞌe nogoba ḡaubanana teigiꞌuma. Ze ihureze meiro ebu hahu ohoze iziga hidihi radu mui habaꞌa onamiro.
2 Zeḡe boꞌaḡano fuꞌoꞌe hahizaḡa ebu fuꞌoꞌe huhuzaḡa.
3 Hahizaḡa azaḡaꞌe ihureze odohiro, rehano ihure vuḡaꞌe mene meiro.
4 U huhuzaḡa azaḡaꞌe ihurezeta ihure vuḡa biozeo abe odohiro.
5 Ebu hahu ohoze iziganiꞌa mene ḡarihe arirotene, ze ubumaze anozadu bazubazu uhiro.
6 Ohere nemanema ze ago ꞌahoḡa igiro, raenaꞌa, 'Hahu ohoze iziganiꞌa feureha! Buanadu mae zounoꞌi!'
7 ꞌOugirotene nogoba niduꞌa evatadu ihureze ruhibiro.
8 Ebu hahizaḡa azaḡaniꞌa huhuzaḡa azaḡa umiziro, raenaꞌa, 'Za ihure vuḡa nuḡo eme rifoꞌi, mazaḡa eme ihureꞌe vidauꞌohe.'
9 Ze naenaezinaꞌa, 'Mene, 'ahiꞌe za zu emeḡe niduꞌa veize mene idaḡa. Ihure vuḡa seroneꞌeteꞌe vazeḡa vaḡe onamadu zae veize hoitoꞌi.'
10 Rehano ze ihureze vuḡa hoitoḡa uꞌa onamiroteꞌe enogano, hahu ohoze izganiꞌa feuriro. Ebu ihureze zu ihureze vuḡa ruhibiroteꞌe azaḡaniꞌa ani teite mui habaꞌa diuḡiro ebu ibihetaḡaꞌe hararo.
11 Vesuꞌu hahizaḡa nogobaḡaniꞌa feuradu raenaꞌa, 'Zuhiꞌa Boro! Zuhiꞌa Boro! Ibiheta vavaofoꞌi!'
12 Rehano ani zinaꞌa, 'E hube hune ziꞌohe, e za aḡuꞌa.'
13 Eꞌanoꞌo tohutohe radoꞌi, mazaḡa eḡeꞌa bare onaiꞌuma madaḡaꞌe zaꞌe aḡuꞌa.
Tuḡure Azaḡa Uḡidu Hari Idaidaḡa
(Luka 19:11-27)
14 Badiꞌaꞌa ibitoziniꞌetaꞌaꞌe haba faḡa ragaveꞌeteꞌe vazeḡa ꞌahoga hariḡa heuḡa. Aniꞌa iḡunirotene, tuḡureḡa azaḡa huzadu ani ḡau taufoga veize ḡauḡa ziniro.
15 Zeḡe tibatiba inaraze idunaḡano, ꞌahogaꞌe moni silivaḡa fuse fuꞌo, ꞌahogaꞌe fuse ꞌaheu ebu ꞌahogaꞌe fuse tiba ziniro. Ebu aniꞌa haba faḡa ragaviro.
16 Moni silivaḡa fuseḡa fuꞌo meiroteꞌe vazeḡaꞌe zogone onamadu eꞌe moniḡa hina gauadu moni silivaḡa fuseḡa fuꞌo ragate hidiro.
17 Moni silivaḡa fuseḡa ꞌaheu meiroteꞌe vazeḡa zuni ꞌouge haḡaadu moni silivaḡa fuseḡa ꞌaheu ragate hidiro.
18 Rehano moni silivaḡa fuseḡa tiba meiroteꞌe vazeḡaꞌe onamadu rahao idu huꞌiro ebu zuhiꞌaḡa moni eꞌea ḡure tiro.
19 Mada faḡa ḡarugano tuḡure azaḡa zuhiꞌaꞌa bariro. Ebu ze ani moni hina nougenouge gauiroteꞌe ederifine huziro.
20 Moni silivaḡa fuseḡa fuꞌo meiroteꞌe vazeḡaniꞌa moni fuseḡa fuꞌo bare ragate hidirotaꞌaꞌe odohe aradu niro, raenaꞌa, 'Zuhiꞌa, ḡaꞌa moni silivaḡa fuseḡa fuꞌo iniro. Ebu eḡeꞌa moni eꞌe hina gauadu bare fuse fuꞌo raḡate hideha.'
21 Zuhiꞌaḡaniꞌa ninaꞌa, 'Manoḡa tauḡi, ḡaꞌe tuḡure vazeḡa manoḡa ebu zamaḡo niduꞌa hina faine gaueha. Ḡaꞌa ḡau tahiḡa veize zamaḡo niduꞌa faine gauateꞌe uꞌano, eḡeꞌa ḡau ḡehaḡa taufeꞌeteꞌe vazeḡano ohoꞌiꞌuma. Aroꞌi, eḡe teite matuꞌihi!'
22 Ebu moni silivaḡa fuseḡa ꞌaheu meiroteꞌe vazeḡaniꞌa aradu niro, raenaꞌa, 'Zuhiꞌa, ḡaꞌa moni silivaḡa fuseḡa ꞌaheu iniro. Ebu eḡeꞌa moni eꞌe hina gauadu bare fuse ꞌaheu raḡate hideha.'
23 Zuhiꞌaḡaniꞌa ninaꞌa, 'Manoḡa tauḡi, ḡaꞌe tuḡure vazeḡa manoḡa ebu zamaḡo niduꞌa hina faine gaueha. Ḡaꞌa moni tahiḡa hina zamaḡo niduꞌa faine gauateꞌe uꞌano, eḡeꞌa moni boro taufeꞌeteꞌe vazaḡano ohoꞌiꞌuma. Aroꞌi, eḡe teite matuꞌihi!'
24 Ebu moni siliva fuseḡa tiba meiroteꞌe vazeḡaniꞌa aradu niro, raenaꞌa, 'Zuhiꞌa, ḡaꞌe vaze riḡa. E ederiro vazeꞌa ḡoraroteꞌe ḡauḡa ḡaꞌa hiriveꞌohe ebu vazeꞌa taufiroteꞌe ḡauḡa ḡaꞌa maꞌohe.
25 Eꞌanoꞌo ḡa moniꞌa dauḡiꞌuma rae rihonadu rahao ḡure tiro. Ḡae moni ꞌahi bare moꞌi.'
26 Zuhiꞌaḡaniꞌa naenaeniro, raenaꞌa, 'Ḡaꞌe tuḡure vazeḡa sauꞌa ebu tubuḡa! Vazeꞌa ḡoraroteꞌe ḡauḡa zu vazeꞌa taufiroteꞌe ḡauḡa eḡeꞌa maꞌohe rae zamarirohe?
27 ꞌOugiritene ḡa nougadu moni tiꞌeteꞌe neḡano eḡe moni mene tiro? ꞌOugifone e bare aradu moni eꞌe ragate meifo.'
28 Hena zuhiꞌaḡaniꞌa niro, raenaꞌa, 'Moni silivaḡa fuseḡa tiba ani mazaonoꞌo bare madu ḡau banana meiroteꞌe vazeḡa hanoꞌi.
29 Iniuꞌa nagini hidiroteꞌe faine odohe gauine, ani borofe hidiꞌuma. Rehano iniuꞌa nagini hidiroteꞌe mene faine odohe gauine, ani mazao nagini komeꞌa zuni meiniꞌuma.
30 Ebu tuḡure vazeḡa sauꞌa ꞌahi enona uzabo zamaḡano mae feunoꞌi. Deꞌea ani niaꞌuma ebu ḡonoḡa atitiꞌuma.”
Mamoe zu Gouti
31 Ebu Iesuꞌa raenaꞌa, “Eḡe, Vaze Ubuganiꞌa agaḡa inaraḡaḡeta tuḡure viga niduꞌa teite onaiꞌuma madaḡano, eꞌa kini ehoro habaꞌano ehoradu vaze ibitoziniꞌuma.
32 Haba azaḡa niduꞌa eḡe zamao nuꞌozadu vaze rovoziꞌuma. Aꞌe mamoe taufeꞌeteꞌe vazeḡaniꞌa mamoe goutiꞌonoꞌo rovozeꞌeteꞌe teigiꞌuma.
33 Ebu iniu vaze mamoe heuḡaꞌe eḡe edaꞌe moneo zu iniu vaze gouti heuḡaꞌe eḡe kauri moneo ohoziꞌuma.
34 Ebu eḡe, kinizeꞌa edaꞌe mone azaḡa ziꞌuma raenaꞌa, 'Zae, eḡe Mamaꞌa manohuga ziniꞌeteꞌe azaḡa, aroꞌi, ebu eḡeꞌa ibitohauꞌeteꞌe zamaḡano radoꞌi. Aꞌe Badiꞌaꞌa raha ꞌahi haḡairoteꞌe madaḡanonoꞌo ruhiniro.
35 Mazaḡa e vinihinutene, zaꞌa ogomu inido, e irinehe moꞌohinutene, vu inido ebu e iꞌudo vazeḡa reinutene, zae neo huhe zouhido.
36 Dabuahe oꞌoꞌa reinutene, dabua inido, ugihinutene eḡe taufido ebu ḡuꞌa neḡano radiunutene, ḡiahiro.'
37 Ebu duduḡa azaḡaniꞌa naenaeniꞌuma, raenaꞌa, 'Zuhiꞌa Boro, eme naniꞌa ḡaꞌe viniꞌoga horoadu ogomu ḡanido? Naniꞌa eme ḡaꞌe irigo moꞌoꞌoga horonadu vu ḡanido?
38 Naniꞌa eme ḡaꞌe iꞌudo vazeḡa reiroteꞌe horonadu neo huḡade zouꞌido? Naniꞌa eme dabuaḡo ꞌoꞌoꞌa reiroteꞌe horonadu dabua ḡanido?
39 Naniꞌa eme ḡa ugiꞌiroteꞌe ga ḡuꞌa neḡano radiroteꞌe horonadu ḡa ḡiaꞌi amido?'
40 Ebu eḡe, kinizeꞌa naenaeziꞌuma, raenaꞌa, 'E hube hune ziꞌohe, eḡe negohe ga ezehe ꞌahi boꞌaḡano ḡonaḡa vazeḡa ꞌahoga veize ꞌouge haḡaidotaꞌaꞌe, eḡe veize haḡaido raꞌohe.'
41 Ebu eḡe, kinizeꞌa vaetadu kauri mone azaḡa ziꞌuma, raenaꞌa, 'Zae, Badiꞌaꞌa maḡunoziniꞌeteꞌe azaḡa, eḡe mazaonoꞌo vaḡinoꞌi, ebu Satani zu ane tuḡure viga veize ruhiniroteꞌe radiu tuḡutuḡu ire rogaḡa zamaḡa diuḡoꞌi.
42 Mazaḡa e vinihinutene, zaꞌa ogomu men inido, e irinehe moꞌohinutene, vu mene inido.
43 E iꞌudo vazeḡa reinutene, neo mene huhe zouhido, dabuhe oꞌoꞌa reinutene, dabua mene inido, ebu ugihinutene zu ḡuꞌa neḡano radiunutene, mene taufido.'
44 ꞌOugadu zeꞌa naenaeniꞌuma, raenaꞌa, 'Zuhiꞌa Boro, naniꞌa eme ḡaꞌe viniꞌiroteꞌe ga irigo moꞌoꞌiroteꞌe ga iꞌudo vazeḡa reiroteꞌe ga dabuaḡo ꞌoꞌoꞌa reiroteꞌe ga ugiꞌiroteꞌe ga ḡuꞌano radiroteꞌe horoꞌadu mene danaꞌido?'
45 Eḡeꞌa naenaeziꞌuma, raenaꞌa, 'E hube hune ziꞌohe, ꞌahi azaḡa boꞌaḡano ḡonaḡa vazeḡa ꞌahoga veize mene haḡairotaꞌaꞌe, eḡe veize mene haḡairoteꞌe raꞌohe.'
46 Ebu kauri mone azaḡaꞌe vaḡine ḡouradu aduga tuḡutuḡu hidiꞌuma, u duduḡa azaḡaꞌe ḡabone tuḡutuḡu hidiꞌuma.”