20
Vaini Meba Gau Azaḡa Hari Idaidaḡa
1 Iesuꞌa hari idaidaḡa ꞌahoga ziro, raenaꞌa, “Badiꞌaꞌa ibitoziniꞌetaꞌaꞌe hari ꞌahi heuḡa. Haba vazeḡa ꞌahoganiꞌa ane vaini meba veize gauꞌeteꞌe azaḡa vaḡihi radu oherebau uzeuze onamiro.
2 Ebu vaze nu horozirotene ziro, raenaꞌa, 'Eḡe meba onamadu gauoꞌi. Mada tiba gauḡa moniḡa ziniꞌuma.' ꞌOugadu ani ze mebaḡano tuḡuziro.
3 Oherebau mada fuꞌo ḡazaḡa fare meirotene ani bare onamiro. Ebu maketi habaꞌano mene gauꞌeteꞌe vaze nuꞌa edau radoga horoziro.
4 Aniꞌa zinaꞌa, 'Za zu eḡe vaini mebaḡa onamoꞌi, ebu gauḡa moniḡa idane ziniꞌuma.'
5 Ebu ze ane meba onamiro. Aniꞌa madai zu mada uḡidu ḡoravaḡano bare onamadu ꞌouge haḡairo.
6 Mada fuꞌo ḡoravaḡano ani onamirotene vaze nuꞌe edau ragaveꞌeteꞌe horozadu ḡadiziro, raenaꞌa, 'Za nougadu mada niduga mene gaueꞌenaꞌa edau tauḡeꞌohe?'
7 Zeꞌa naenaeninaꞌa, 'Mazaḡa vaze ꞌahoganiꞌa eme gau ꞌahoga mene refeha.' Aniꞌa zinaꞌa, 'Za zuni eḡe vaini mebaḡa onamadu gauꞌoꞌi.'
8 Madaꞌa ovorirotene vaini mebaḡa vazeḡaniꞌa meba taufeꞌeteꞌe vazeḡa niro, raenaꞌa, 'Gau azaḡa huzadu ḡonaga vazeḡanonoꞌo ibite vazeḡa gau moniḡa zenoꞌi.'
9 Mada fuꞌo ḡoravaḡano huzateꞌe azaḡaꞌe onairotene aneane mada tiba gau moniḡa meiro.
10 Ebu ibite gauiroteꞌe azaḡaniꞌa onairotene, ze moni ufeta boro meꞌuma rae zamariro. Rehano aneane mada tiba gau moniḡa idane meiro.
11 Zeꞌa eꞌe moniḡa madu haba vazeḡa mazao maḡuniro, ebu tururuꞌenaꞌa, niro, raenaꞌa,
12 'Vesu onaateꞌe azaḡaꞌe mada tahiḡa daꞌo gauꞌeha. U emeꞌa mada gigiꞌa zamaḡano mada niduga gau boro haḡaeha. Rehano ḡaꞌe zeḡe moniꞌe emeḡe teite idane zeneha!'
13 Haba vazeḡaniꞌa zeḡe boꞌaḡano ꞌahoga naenaeniro, raenaꞌa, 'Eḡe vaze, eꞌe mene nae daꞌo badareha. Ḡaꞌe gauadu mada tiba gau moniḡa meꞌuma rae ḡaha.
14 Eꞌanoꞌo moniḡo madu onamoꞌi. Eꞌe vesu onateꞌe vazeḡa gau moniꞌe ḡae moni teite idane ḡanihi raꞌohe.
15 Eḡeꞌa eḡe moni hina nagini urateꞌeteꞌe haḡaine, veꞌoḡahe? Eḡeꞌa vaze mazao ufeta manoḡa radu ḡaꞌe ahiahiheꞌehehe?'”
16 Ebu Iesuꞌa ziro, raenaꞌa, “Eꞌanoꞌo ḡonaḡa azaḡaꞌe ibitiꞌuma zu ibiteꞌeteꞌe azaḡaꞌe ḡonagano reꞌuma.”
Iesuꞌa Ane Rune Bare Reiro
(Mareko 10:32-34, Luka 18:31-34)
17 Iesuꞌa Ierusalema itiroteꞌe zamaḡano, ane tahiꞌa 12 daꞌo huzadu ibio ziro, raenaꞌa,
18 “Ḡianoꞌi, emeꞌe Ierusalema iteꞌohe. Ebu eḡe, Vaze Ubuganiꞌe, dibuꞌo vazeḡa ḡihiꞌaḡaḡihiꞌaḡa zu Mose goro ḡoeꞌa ihozeꞌeteꞌe azaḡaniꞌa obohe teadu uḡuhihi reꞌuma.
19 Ebu Badiꞌa aḡuꞌa azaḡa ꞌevoreo riꞌihadu zeḡeꞌa ḡirihohiꞌuma, masihiꞌuma zu sataurohiꞌuma. Rehano mada uḡiduḡano eḡeꞌa bare iḡuniꞌuma.”
Iakobo zu Ioane Vizeꞌa Iesu Uminiro
(Mareko 10:35-45)
20 Zebede ubuga, Iakobo zu Ioane, vizeꞌa zeḡe zamazadu Iesu vaḡe ariro, ebu obena hina tuḡadu uminiro.
21 Iesuꞌe ḡadiniro, raenaꞌa, “Ḡaꞌe nigini urateꞌohe?” Aniꞌa naenaeninaꞌa, “Ḡaꞌa ibitoziniꞌeteꞌe madaḡa moꞌidene, eḡe ubude ꞌaheu ohozadu ḡihiꞌaḡa iḡuꞌa zenoꞌi.”
22 Iesuꞌa niro, raenaꞌa, “Zaꞌe nagini umiheꞌetaꞌaꞌe aḡuꞌa. Eḡeꞌa gagiꞌuma bioḡaꞌe aduga hidiꞌeteꞌe bioḡa. Zae zuni eꞌe gagiꞌumahehe?” Zeḡeꞌa naenaeninaꞌa, “Oꞌe.”
23 Iesuꞌa ziro, raenaꞌa, “Eḡeꞌa gagiꞌuma bioḡaꞌe, zae zuni gagiꞌuma. Rehano ḡihiꞌaḡa iḡuꞌa meꞌuma azaḡaꞌe eḡeꞌa meme ohoziꞌuma. U eḡe Mamaꞌa ohoziꞌuma reiroteꞌe azaḡaniꞌa daꞌo aniꞌa ruhibiroteꞌe iḡuꞌa meꞌuma.”
24 Iesu tahiꞌa gaubananaꞌa eꞌe igirotene, Iakobo zuni Ioane mazao maḡuniro.
25 Rehano Iesuꞌa huze nuꞌozadu ziro, raenaꞌa, “Za edeḡa, Badiꞌa aḡuꞌa azaḡa habaꞌano, zuhiꞌaḡazuhiꞌaḡaniꞌa eꞌe habaꞌa azaḡa ibitoziniꞌohe, ebu zeḡe ḡihiꞌaḡa iḡuri azaḡaniꞌa inaraze hina habaꞌa azaḡa rana edauꞌohe.
26 Rehano zaꞌe ago ꞌouge haḡaoꞌi. Zae boꞌaḡano iniuꞌe ḡihiꞌa reihi reine, aniꞌe zae uꞌuḡano gauꞌeteꞌe vazeḡa rae reꞌuma.
27 Ebu iniuꞌe zae boꞌaḡano ibitone vazeḡa reihi reine, aniꞌe zae tuḡure vazeḡa rae reꞌuma.
28 Zaꞌe eḡe teige haḡaoꞌi, mazaḡa eḡe, Vaze Ubuganiꞌa vazeꞌe eḡe tuḡure azaḡa reꞌuma radu mene ariro, rehano eꞌe vaze tuḡure vazeḡa reꞌuma radu ariro. Ebu vaze ḡehaḡa sauꞌa uꞌano, eḡe ḡabone hina Badiꞌa dibuꞌo hanoga veize ariro.”
Ubuma Kuru Azaḡa Faiziro
(Mareko 10:46-52, Luka 18:35-43)
29 Iesu ani tahiꞌatahiꞌa teite Ieriko neḡa boronoꞌo iḡunirotene, vaze ḡuḡuvaḡaniꞌa ani hegotiro.
30 Ebu ubuma kuru azaḡa ꞌaheuꞌe ibi ḡenaḡano ehore radiunu. Ze Iesuꞌa vitau onameꞌeteꞌe egadu huaro, raenaꞌa, “Zuhiꞌa Boro, Davida mariḡa, eme vetuḡafoꞌi!”
31 Vaze ḡuḡuvaḡaniꞌa horozadu roziro, raenaꞌa, “Hezoa!” Rehano zeꞌe ufeta ḡihau huaro. “Zuhiꞌa Boro, Davida mariḡa, eme vetuḡafoꞌi!”
32 Ebu Iesuꞌa edanadu huziro, raenaꞌa, “Eḡeꞌa zae veize nagini haḡaiꞌuma?”
33 Zeꞌa naenaeninaꞌa, “Zuhiꞌa Boro, eme ehamatihi!”
34 Ebu Iesuꞌa vetuḡazeadu ubumaze oboniro. Obozirotene zogone ubumazeꞌa raꞌaro ebu ani heḡotiro.