10
Iesuꞌa Ane Tahiꞌaḡa 12 Tuḡuze Onamiro
(Mareko 6:7-13, Luka 9:1-6)
1 Iesuꞌa ane tahiꞌatahiꞌa 12 huze nuꞌoziro ebu vine sauꞌa hegoze buzeꞌeteꞌe zu ugi nunu niduꞌa faizeꞌeteꞌe gigiꞌaḡa ziniro.
2 Iesu tahiꞌa 12 nizeꞌe ahi eꞌe: Ibiꞌaꞌe Simona, niḡa ꞌahogaꞌe Petero zu ane negoḡa Aniderea, Zebedeo ubuga ꞌaheu Iakobo zu ane negoḡa Ioane,
3 Filipo, Batolomeo, Tomasi, takesi vazeḡa Mataio, Alefeo ubuga Iakobo, Tadeo,
4 Roma gavamani utitoziniꞌeteꞌe duḡuruḡa vazeḡa niḡa Simona ebu Iesu revoharotaꞌaꞌe, Isakariota vazeḡa niḡa Iuda.
5 Iesuꞌa ane tahiꞌa 12 tuḡuzeꞌenaꞌa, ꞌahige ihoziro, raenaꞌa, “Iuda mene azaḡa habaꞌa ago onamoꞌi ebu Samaria habaꞌano neḡa ꞌahogani ago diuḡoꞌi.
6 Rehano Isaraela habaꞌano dauḡiroteꞌe mamoeḡa ꞌuꞌa onamoꞌi.
7 Ebu neḡaneḡa diuḡe onamoꞌidene 'Badiꞌaꞌa ibitoziniꞌeteꞌe madaḡa ꞌai haniteha,' rae haramozenoꞌi.
8 Ugi azaḡa faizoꞌi, rune azaḡa ḡabozoꞌi, lefera azaḡa faizoꞌi ebu vine sauꞌa hegoze buzoꞌi. Zaeꞌa hidirotaꞌaꞌe naeḡa mene haḡairo, eꞌanoꞌo naeḡa ago maeꞌenaꞌa ḡahugoꞌi.
9 Moni niharazeo ago odohoꞌi.
10 Ragavo zamaḡano nihara ga dabua ꞌahoga ga tamaka ga tuḡu ago odohoꞌi, mazaḡa gau vazeḡaꞌe nagini urateꞌeteꞌe ḡauḡaꞌe hidiꞌuma.
11 Habaꞌahabaꞌa zu neḡaneḡa diuḡine, deꞌea mae ḡihiziꞌuma vazeḡa vaḡoꞌi ebu ane neo radoꞌi onamo eꞌe neḡa mode iḡunoꞌi.
12 Ani ne diuḡoꞌidene, 'Badiꞌaꞌa manohuga ziniꞌuma,' rae zenoꞌi.
13 Ebu eꞌea radiuꞌeteꞌe azaḡaꞌe manoḡa roꞌidene, zaeꞌa rateꞌe Badiꞌa manohuga zeḡe rana radiꞌuma. U mene manoḡa roꞌidene, zaeꞌa rateꞌe Badiꞌa manohugaꞌe zae bare vaḡiꞌuma.
14 Habaꞌa ga neḡa ꞌahoga azaḡaniꞌa zae mene mae ḡihizoꞌidene ga ḡoereze mene egozenoꞌidene, odaze huꞌuruḡa zauhe mode manahadu eꞌe habaꞌa ga neḡa mode iḡunoꞌi.
15 E hube hune ziꞌohe. Ibite Sodoma zu Gomora habaꞌa azaḡaꞌe sauꞌaze boro uꞌano, Badiꞌaꞌa ruiziro. Rehano Badiꞌa kota madaḡano zae mene mae ḡihiziroteꞌe neḡa azaḡaꞌe ufeta aduga boro hidiꞌuma.
Iesu Tahiꞌatahiꞌaꞌa Aduga Hidiꞌuma
(Mareko 13:9-13, Luka 21:2-17, 12:2-9)
16 Butu ḡuniḡa boꞌaḡano mamoe tuḡuzeꞌeteꞌe teige, e za agire azaḡa boꞌaḡano tuḡuzeꞌohe. Eꞌanoꞌo mohe teige edaꞌe edaꞌoꞌi zu Tubugo niniḡa teige sauꞌa ago haḡaoꞌi.
17 Rehano vaze ḡiazoꞌi, mazaḡa zeꞌa oboze teadu kotao ohoziꞌuma ebu zeḡe nuꞌonuꞌo neḡano masiziꞌuma.
18 Eḡe uꞌano gavana azaḡa zu kini mazao riꞌiziꞌuma, ebu zaeꞌa eḡe hari zeḡe zu Iuda mene azaḡa rae fureniꞌuma.
19 Rehano noꞌe madaḡano zeꞌa kotao obozetoꞌidene, zaeꞌa nagini reꞌuma ga nougenouge reꞌuma moneo ago zamare borofoꞌi. Mazaḡa eꞌe madaḡano zaꞌa reꞌuma ḡoeꞌaꞌe ihoziꞌuma.
20 Ḡoeꞌazeꞌe mene zae mazaonoꞌo, rehano Moze viganiꞌa zae mazaonoꞌo ḡoeriꞌuma.
21 Negoḡaniꞌa negoḡa revohanadu runeo tuḡuniꞌuma. Ebu moganiꞌa ubuga revohanadu runeo tuḡuniꞌuma. Ebu ubudezeꞌa vize moze agirezadu runeo tuḡuziꞌuma.
22 Eḡe uꞌano vaze niduꞌaꞌa zae heꞌeheꞌeziꞌuma. Rehano edau gigaru onamo ḡonaga meiteꞌe vazeḡaꞌe ḡabone hidiꞌuma.
23 Haba ꞌahogano za sausauzoꞌidene, feranadu haba ꞌahoga onamoꞌi. E hube hune ziꞌohe, za Isaraela habaꞌa niduꞌa izema harame oname hauḡogano, eḡe, Vaze Ubuganiꞌa onaiꞌuma.
24 Tahiꞌaꞌe ane ihore vazeḡa mene vitiniꞌuma ebu tuḡure vazeḡaꞌe ane zuhiꞌa mene vitiniꞌuma.
25 Tahiꞌaꞌe ane ihore vazeḡa teigiꞌuma reine idaḡa ebu tuḡure vazeḡaꞌe ane zuhiꞌa teigiꞌuma reine idaḡa. Vazeꞌa eḡe, zae Zuhiꞌa, Belezebulo rae huhine, zae, eḡe tahiꞌatahiꞌa, ufeta sauꞌano huziꞌuma.
26 Eꞌanoꞌo vazeꞌa sausauzoꞌidene, ago ze rihozoꞌi, mazaḡa uꞌuruḡa ḡauꞌa niduꞌa Badiꞌaꞌa furene hauḡiꞌuma.
27 Eꞌa zae daꞌo ziꞌetaꞌaꞌe zaeꞌa vaze niduꞌa zoꞌi. Ebu eḡe mazaonoꞌo zaeꞌa daꞌo igiꞌetaꞌaꞌe ne azaḡa niduꞌa ḡihau rae furenoꞌi.
28 ꞌAhiri daꞌo maꞌeteꞌe u vine manoga mene idaḡa raꞌeteꞌe azaḡaꞌe ago rihozoꞌi. Rehano Badiꞌa daꞌo rihonoꞌi, mazaḡa aniꞌe vine zu ahiriꞌe ire rogao hufi haonoga idaḡa.
29 Tiburi niniḡa ꞌaheuꞌe moni komeꞌa hina hoiteꞌohe. Zeꞌe mene ḡau boro rehano, Badiꞌaꞌa mene uratine, ze ꞌahogani rahao mene uitiꞌuma.
30 Badiꞌaꞌa zae vadini iguḡa niduꞌa nugu zuni edeḡa.
31 Eꞌanoꞌo ago rihanoꞌi, mazaḡa zaꞌe Badiꞌa ubumao Tiburi niniḡa vitine ḡihiꞌaḡa.
32 Iniuꞌa vaze ubumao eḡe moneo edaune, eḡeꞌa zuni adureo Mamahe ubumao ane moneo edaꞌuma.
33 Rehano iniuꞌa vaze ubumao e oꞌohine, eḡeꞌa zuni adureo Mamahe ubumao ani oꞌoniꞌuma.
Mene Uniho Manoḡa, Rehano Benisi
(Luka 12:51-53, 14:26-27)
34 Eꞌe uniho manoḡa rahao ꞌada mae ariro rae ago zamaroꞌi. Eꞌe uniho manoḡa mene mae ariro, rehano benisi mae ariro.
35 Eꞌa onairiotaꞌaꞌe,
ubugaꞌe moga teite agiretitoga, avoꞌaꞌe viꞌa teite agiretitoga, roḡaeꞌe ani hadoga roḡaeḡa teite agiretitoga veize raꞌohe.
36 Agire azaḡaꞌe zae ne tiba azaḡa reꞌuma.
37 Iniuꞌa moga ga viꞌa ufeta zamarine, aniꞌe mene eḡe tahiꞌa reꞌuma, ebu iniuꞌa ubuga ga aboḡa ufeta zamarine, aniꞌe mene eḡe tahiꞌa reꞌuma.
38 Iniuꞌa ane satauro odohadu eḡe ḡaruna mene hegotine, aniꞌe mene eḡe tahiꞌa rae reꞌuma.
39 Iniuꞌa ane ḡabone obone giganine, ani ḡabone tuḡutuḡu mene hidiꞌuma. Rehano iniuꞌa ane ḡabone eḡe ꞌuano modine, ḡabone tuḡutuḡu hidiꞌuma.
Naeḡa Hidiꞌeteꞌe Vazeḡa
(Mareko 9:41)
40 Iniuꞌa zae mae ḡihizine aniꞌe eḡe mae ḡihiheꞌohe, zu iniuꞌa eḡe mae ḡihihine aniꞌe eḡe tuḡuhiroteꞌe vazeḡa mae ḡihineꞌohe.
41 Iniuꞌa peroveta vazeḡaꞌe Badiꞌa ḡoere raꞌeteꞌe vazeḡa rae mae ḡihinine, aniꞌe peroveta vazeḡa hidiꞌeteꞌe naeḡa hidiꞌuma. Iniuꞌa duduḡa vazeꞌe vaze duduḡa rae mae ḡihinine, aniꞌa vaze duduḡa naeḡa hidiꞌuma.
42 Ebu iniuꞌa eḡe tahiꞌatahiꞌa, huga oꞌoꞌa azaḡa raꞌetaꞌaꞌe boꞌaḡano ꞌahoga vu nahuga bioḡa haune, e hube hune zinaꞌa, aniꞌe Badiꞌaꞌa eꞌe naeḡa haꞌuma.