Mataio
Iesu Keriso Hari Manoḡa Mataioꞌa Mirihiro
Ihore Ḡoeꞌa
Buka ꞌahiꞌe Mataioꞌa mirihiro. Aniꞌe Iesu tahiꞌa gaubanana aheu fare boꞌaḡano tahiꞌa ꞌahoga. Ani ni ꞌahogaꞌe Levi. Aniꞌe ꞌizema Iesu tahiꞌa rougano takesi ufiroteꞌe vazeḡa. Aniꞌe ane nabuga Iuda azaḡa veize Iesu hari manoḡa mirihiro. Buka ꞌahi zamaḡano peroveta azaḡaniꞌa ibite Keriso moneo irina ḡoeriroteꞌe ḡoeꞌa ḡehaḡa mae fare mirihadu ze ḡoere niduꞌa hugano furerarotaꞌaꞌe ihoziro, ebu Iesuꞌe Iuda azaḡaniꞌa guhine arinuteꞌe vazeḡa, Keriso(Mesia) rae ihoziro. Aꞌe mene Iuda azaḡa veize daꞌo, rehano raha azaḡa niduꞌa veize ḡoeriro. Mataioꞌe buka ꞌada Iesu ḡabone niduꞌa, aniꞌa fureraroteꞌe madaḡanonoꞌo onamo rudanadu bare ḡabodiroteꞌe hariḡa niduꞌa mirihiro.
1
Iesu Keriso Vouḡa Nize
(Luka 3:23-38)
1 Iesu Keriso vouḡa nizeꞌe ꞌahi eꞌe. Aniꞌe Aberahamo mariga ebu Davida mariga.
2 Aberahamoꞌe Isako moga,
Isakoꞌe Iakobo moga, Iakoboꞌe Iuda zu ani negoḡa duḡuru moze.
3 Iudaꞌe Pereze zu Zera moze ebu Tamaraꞌe zeḡe vize. Perezeꞌe Hezarona moga, Hezaronaꞌe Ramo moga.
4 Ramoꞌe Aminadaba moga, Aminadabaꞌe Nasona moga, Nasonaꞌe Salamona moga.
5 Salamonaꞌe Boazi moga ebu Rahabaꞌe Boazi viꞌa. Boaziꞌe Obeda moga ebu Rutaꞌe Obeda viꞌa. Obedaꞌe Iese moga.
6 Ieseꞌe kini Davida moga.
Davidaꞌe Solomona moga ebu Basebaꞌe Solomona viꞌa. Basebaꞌe ibite Uria inuga.
7 Solomonaꞌe Rehoboama moga, Rehoboamaꞌe Abia moga, Abiaꞌe Asa moga.
8 Asaꞌe Iehosafata moga, Iehosafataꞌe Iehorama moga, Iehoramaꞌe Uzia moga.
9 Uziaꞌe Iotama moga, Iotamaꞌe Ahasi moga, Ahasiꞌe Hezekia moga.
10 Hezekiaꞌe Manase moga, Manaseꞌe Amona moga, Amonaꞌe Iosia moga.
11 Iosiaꞌe Iekonia zu ani negoḡa duḡuru moze.
Eꞌe madaḡano Babulonia azaḡaniꞌa Isaraela azaḡa teite utitadu Isaraela azaḡa Babulonia habaꞌano obozi onamiro.
12 Babulonia habaꞌano obozi onamiroteꞌe ḡarugano,
Iekoniaꞌe Sealetiele moga, Sealetieleꞌe Zerubabele moga.
13 Zerubabeleꞌe Abiuda moga, Abiudaꞌe Eliakimi moga, Eliakimiꞌe Azora moga.
14 Azoraꞌe Zadoka moga, Zadokaꞌe Akimi moga, Akimiꞌe Eliuda moga.
15 Eliudaꞌe Eleazara moga, Eleazaraꞌe Matana moga, Matanaꞌe Iakobo moga.
16 Iakoboꞌe Iosefa moga ebu Iosefa inugaꞌe Maria.
Mariaonoꞌo Keriso rae huneꞌeteꞌe vazeḡa, Iesuꞌa fureraro.
17 Eꞌanoꞌo Aberahamonoꞌo onao Davida madaḡano zeḡe ega niduꞌaꞌe 14, zu Davidaonoꞌo onao Isaraela azaḡa Babulonia habaꞌano obozi onamiroteꞌe madaḡano zeḡe ega niduꞌaꞌe 14, ebu Babulonia habaꞌano obozi onamiroteꞌe madaḡanonoꞌo onao Keriso madaḡano zeḡe ega niduꞌaꞌe 14.
Iesu Kerisoꞌa Fureraro
(Luka 2:1-7)
18 Iesu Kerisoꞌe ꞌahige fureraro. Ani viꞌa Mariaꞌe Iosefa iraꞌauḡa. Anianine ꞌizema hahurogano Mariaꞌe Vine Zaḡoḡanonoꞌo ahiꞌeta reiroteꞌe ederiro.
19 Maria iꞌa Iosefaꞌe Badiꞌa ubumao duduḡa vazeḡa, eꞌanoꞌo hunihunio Maria mene mae mazagaronifine ani sifu tuḡune modiꞌuma rae zamariro.
20 Ani ꞌouge rae zamarirotene, Zuhiꞌa Boro tuḡure viga ꞌahoganiꞌa iḡunao fureranadu ꞌahige rae niro, “Davida mariga Iosefa, Maria teite hahuroga ago rihanoꞌi. Mazaḡa Mariaꞌe Vine Zaḡoḡanonoꞌo ahiꞌeta.
21 Aniꞌe ubuga ꞌahoga furenoꞌidene, niḡaꞌe Iesu rae turahoꞌi, mazaḡa aniꞌe ane mone azaḡa haḡaize sauꞌanonoꞌo ḡaboziꞌuma.”
22 ꞌOugadu Zuhiꞌa Boroꞌa peroveta vazeḡanonoꞌo rae fureniroteꞌe ḡoeꞌaniꞌa hudaro,
23 “Ḡianoꞌi, ohoze ꞌize mene edereꞌeteꞌe nogobaḡaniꞌa ahiꞌeta reꞌuma,
ebu ubuga ꞌahoga fureniꞌuma.
Ubuga niḡaꞌe Imanuela rae huniꞌuma.”
Imanuela hugaꞌe, “Badiꞌaꞌe emeḡe teite radiuꞌohe.”
24 Iosefaꞌa bazunanoꞌo evatirotene, Zuhiꞌa Boro tuḡure viganiꞌa niroteꞌe idunaḡano haḡairo, ebu Mariaꞌe ani inuga radu zamaharo.
25 Rehano Iosefaꞌe Maria teite tibano mene baziro, onamo ubuga fureniro, ebu ubuga niḡaꞌe Iesu rae turahiro.