3
Ioaneꞌa Iesu Ibi Ruhiniro
(Mataio 3:1-12; Mareko 1:1-8; Ioane 1:19-28)
1 Roma kiniḡa Tiberioꞌe Roma habaꞌa niduꞌa kiniḡa radu muri 15 zuhiꞌazinu. Eꞌe madaḡano Pontio Pilato'e Iudea habaꞌa gavanaḡa, Heroda'e Galilea habaꞌa kiniḡa negoḡa Filipi'e Iturea zu Tarakonito habaꞌa kiniḡa, ebu Rusaniaꞌe Abilene habaꞌa kiniḡa reiro.
2 U Anasi zu Kaiafaꞌe dibuꞌo vazeḡa ḡihi'aḡaḡihiꞌaḡa reiro. E'e madaḡano Zekaria ubuga Ioane'a haba boha'ano radiunu, ebu Badiꞌa ḡoere'a ane mazao buaro.
3 Ani'e Ioridana vuḡa uhiḡano haba'ahaba'a nidu'a onamadu ꞌahige rae haramiro, “Haḡaize sauꞌanonoꞌo ḡihuradu babatiso moꞌi! ꞌOugine, Badi'a'a haḡaize sau'a rae modiꞌuma!”
4 Peroveta vazeḡa Isaiaꞌa rae fureniroteꞌe ḡoeꞌa mirihiroteꞌe bukaḡano ꞌahige rae reiro,
“Vaze ꞌahoganiꞌa haba boha'ano ḡihau ḡoere'ohe, raenaꞌa,
'Zuhiꞌa Boro veize ibi ruhiboꞌi,
ani veize ibi mae dudunoꞌi.
5 Do'oḡa nidu'a tuniꞌuma,
ebu maḡa boro zu maḡa zuhu'a nidu'a mae sebaniꞌuma.
Ibi beꞌoḡabeꞌoḡa duduniꞌuma,
ebu ibi sauꞌasauꞌa fainiꞌuma.
6 Ebu vaze nidu'a Badiꞌa'a zeḡe ḡaboze'ete'e horoni'uma.'”
7 Vaze ḡuḡuvaḡaniꞌa Ioane mazaonoꞌo babatiso mouga radu Ioane vaḡe arirotene, aniꞌa ziro, “Zaꞌe Zarama ubugaubuga! Iniuꞌa zae mazao, 'Badiꞌa zama ḡugiꞌanonoꞌo ferau muhinoꞌi,' rae reiro? Aꞌe mene idaḡa!
8 Rehano ibite haḡaize sau'anono'o ḡihuniroteꞌe haḡaiḡa izidi furenoꞌi. Ebu ꞌahige ago zamaroꞌi, 'Emeꞌe Aberahamo mariga, eꞌanoꞌo Badiꞌaꞌa emeḡe mazao mene maḡuniꞌuma.' Eḡeꞌa ziꞌohe, Badi'a'a hadi ꞌadi hina Aberahamo mariga haḡaoga zuni idaḡa.
9 Ḡiro 'ai ire taigano amahi tiro. Eꞌanoꞌo huga manoḡa mene iniꞌeteꞌe ireḡa niduꞌa'e udi higonadu ire rogao feuniꞌuma.”
10 Vaze ḡuḡuvaḡani'a Ioane ḡadiniro, “Eme nougine manoḡa?”
11 Aniꞌa naenaeziro, “Iniu dabuaḡa aheu ro'idene tibaꞌe dabuaḡa o'o'a vazeḡa hano'i. Ebu iniu ogomuḡeta roꞌidene vinineꞌeteꞌe vazeḡa teite ḡahugotito'i.”
12 Takesi azaḡa zuni babatiso mouga veize aradu Ioane ḡadiniro, “Ihore vazeḡa, eme nougine manoḡa?”
13 Aniꞌa naenaeziro, “Takesi ufoꞌidene, gavamaniꞌa reiroteꞌe idunaḡano daꞌo ufo'i. Ago vitau ufoꞌi.”
14 Ebu uti azaḡani'a zuni ḡadiniro, “Eme nougine manoḡa?” Ani'a naenaeziro, “Vaze hadi ago meize tauḡo'i, ebu veꞌoḡa oꞌoꞌa vazeḡa kotao ago ohonoꞌi. Zae gau hadiḡa daꞌo madu matu'o'i.”
15 Vaze ḡehaḡaꞌe Kerisoꞌa ariteꞌe guhininu, eꞌanoꞌo zeꞌe, “Ioaneꞌe Keriso gaogi,” rae zamariro.
16 Eꞌanoꞌo Ioane'a zeḡe nidu'a naenaeziro, “E'e vu hina babatisoziꞌohe. Rehano ariteꞌe vazeḡa'e gigi'aḡa boro hune. Aniꞌe eḡe vitihoga, zu eḡe'a ani tamaka miniḡa fuhiꞌeꞌeteꞌe tuḡureḡa vazeḡa rae rouga zuni mene idaḡa. Ani'e Vine Zaḡoḡa zu ire roga hina babatisozi'uma.
17 Maho hiriveꞌeteꞌe madaḡano vazeꞌa kari hina rouḡa tenadu maho huꞌiꞌohe. Ebu iguḡa manoneꞌohe ebu meba hare deheneꞌohe. Ebu hugaꞌe nuꞌonadu suaba zamaḡano tiꞌohe, rehano iguḡaꞌe mene vidauꞌeteꞌe ire rogao hufi haoneꞌohe.”
18 Ebu Ioane'a ḡoere ḡehaḡa nunu hina iraduguzeꞌenaꞌa, hari manoḡa haramoziro.
19 Rehano Ioane'a Galilea habaꞌa kiniḡa Heroda roniro, mazaḡa Herodaꞌe negoḡa inuga Herodia meiro zu haḡai sau'a nunu haḡairo.
20 Ebu Heroda'e haḡaiḡa sauꞌa eꞌe nidu'a ranao ꞌahoga ragatiro, mazaḡa Ioane ḡu'a neḡano mae ohoniro.
Iesuꞌa Babatiso Meiro
(Mataio 3:13-17; Mareko 1:9-11)
21 Ioaneꞌe ꞌizema ḡuꞌa neḡano mae ohonogano, ani vaze nidu'a babatisoziro ebu Iesu zuni babatisoniro. Ebu Iesuꞌa kurau'eteꞌe zamaḡano adure'a bohataro,
22 ebu Vine Zaḡoḡani'a Tubugo niniḡa teige ane rana kami ovairo. Ebu ago ꞌahoganiꞌa adureonoꞌo ꞌahige rae reiro, “Ḡa'e eḡe zamarone ubude. Eḡeꞌa ḡae mazao matu'e rudau'ohe.”
Iesu Mariga Duḡuru
(Mataio 1:1-17)
23 Iesu muriꞌe 30 reirotene, ani gauḡa ḡadaheniro. Vazeꞌa ani'e Iosefa ubuga rae zamariro.
Iosefa'e Heli ubuga,
24 Heli'e Matata ubuga,
Matata'e Levi ubuga, Levi'e Meleki ubuga,
Meleki'e Ianai ubuga, Ianai'e Iosefa ubuga,
25 Iosefa'e Matataia ubuga, Matataiaꞌe Amosa ubuga,
Amosaꞌe Nahumu ubuga, Nahumuꞌe Eseli ubuga,
Eseliꞌe Nagai ubuga,
26 Nagaiꞌe Mahata ubuga,
Mahataꞌe Matataia ubuga, Matataiaꞌe Semeina ubuga,
Semeinaꞌe Ioseka ubuga, Iosekaꞌe Ioda ubuga,
27 Iodaꞌe Ioanana ubuga, Ioananaꞌe Resa ubuga,
Resaꞌe Zerubabele ubuga, Zerubabeleꞌe Sealetiele ubuga,
Sealetieleꞌe Neri ubuga,
28 Neriꞌe Meleki ubuga,
Melekiꞌe Adi ubuga, Adiꞌe Kosama ubuga,
Kosamaꞌe Elamadama ubuga, Elamadamaꞌe Ere ubuga,
29 Ereꞌe Iosua ubuga, Iosuaꞌe Eliezere ubuga,
Eliezereꞌe Iorima ubuga, Iorimaꞌe Matata ubuga,
Matataꞌe Levi ubuga,
30 Leviꞌe Simeona ubuga,
Simeonaꞌe Iuda ubuga, Iudaꞌe Iosefa ubuga,
Iosefaꞌe Ionama ubuga, Ionamaꞌe Eliakimi ubuga,
31 Eliakimiꞌe Melea ubuga, Meleaꞌe Mena ubuga,
Menaꞌe Matata ubuga, Matataꞌe Natana ubuga,
Natanaꞌe Davida ubuga,
32 Davidaꞌe Iese ubuga,
Ieseꞌe Obeda ubuga, Obedaꞌe Boazi ubuga,
Boaziꞌe Salamona ubuga, Salamonaꞌe Nasona ubuga,
33 Nasonaꞌe Aminadaba ubuga, Aminadabaꞌe Adamina ubuga,
Adaminaꞌe Areni ubuga, Areniꞌe Hezarona ubuga,
Hezaronaꞌe Pereze ubuga, Perezeꞌe Iuda ubuga,
34 Iudaꞌe Iakobo ubuga, Iakoboꞌe Isako ubuga,
Isakoꞌe Aberahamo ubuga, Aberahamoꞌe Tera ubuga,
Teraꞌe Nahoro ubuga,
35 Nahoroꞌe Seruga ubuga,
Serugaꞌe Reu ubuga, Reuꞌe Pelega ubuga,
Pelegaꞌe Ebere ubuga, Ebereꞌe Sela ubuga,
36 Selaꞌe Kainana ubuga, Kainanaꞌe Afasada ubuga,
Afasadaꞌe Semu ubuga, Semuꞌe Noa ubuga,
Noaꞌe Lameka ubuga,
37 Lamekaꞌe Metusela ubuga,
Metuselaꞌe Enoka ubuga, Enokaꞌe Iareda ubuga,
Iaredaꞌe Mahalalela ubuga, Mahalalelaꞌe Kainana ubuga,
38 Kainanaꞌe Enosi ubuga, Enosiꞌe Seta ubuga,
Setaꞌe Adamu ubuga, Adamuꞌe Badiꞌa ubuga.