7
Stefanoꞌa kanisoro azaḡa zamao ḡoeriro
1 Eꞌanoꞌo dibuꞌo hauꞌeteꞌe ḡihiꞌaḡaniꞌa ḡadiniro, raenaꞌa, “Zeḡeꞌa ḡae rana tiꞌeteꞌe ḡoeꞌaꞌe huga hehe?”
2 Stefanoꞌa naenaeniro, raenaꞌa, “Nego nabudi, eḡeꞌa ḡoeriteꞌe egonoꞌi! Agaḡa Boro Badiꞌaḡaniꞌa vouḡafe Aberahamo mazao fureraro, ani ꞌize Mesopotamia habaꞌano radiunuteꞌea. Aꞌaꞌe aneꞌa Harani neḡa ꞌizema onamogano.
3 Ebu Badiꞌaꞌa Aberahamo niro, raenaꞌa, 'Ḡae haba zu nabugo mode iḡunoꞌi! Ebu eḡeꞌa ihoꞌiteꞌe habaꞌa onamoꞌi!'
4 Eꞌanoꞌo aneꞌa Kaledea azaḡa haba modadu, Harani neḡa onamadu eꞌea radiunu. Ebu moganiꞌa eꞌea rudaroteꞌe enogano, Badiꞌaꞌa bare tuḡunadu, zaeꞌa izidi radiuꞌeteꞌe habaꞌa ꞌadi onairo.
5 Rehano eꞌe madaḡanoꞌe Badiꞌa ani haba tahiḡani zuni Aberahamo mene haro. Rehano Aberahamo ubugaꞌe ꞌizema furenogano, Badiꞌaꞌa ane mazao ḡoere rae tinaꞌa, ꞌahige reiro. 'Ḡa zu ḡae marigo, ḡarugoo onaiteꞌe azaḡaniꞌa haba ꞌadi meꞌuma.'
6 Ebu Badiꞌaꞌa ꞌahige rae niro, 'Ḡa marigoꞌe haba faḡano radiꞌuma, ebu muri maḡa ḡazaḡa (400) ḡutaroteꞌe teige tuḡure haḡaeꞌenaꞌa, gauiꞌuma, ebu tuḡuze sausauze ruziꞌuma.
7 Ebu marigo tuḡutuḡuziroteꞌe azaḡa, zeḡe haḡai sauꞌa naeḡa, eḡeꞌa haḡaiꞌuma. Eꞌe ḡaruganobuꞌu marigoꞌe eꞌe habaꞌa mode onaadu, haba ꞌadao eḡe mazao kuraꞌuma.
8 Ebu Badiꞌaꞌa Aberahamoꞌe ane mone reifine ane teite ḡoere rinede tiro. Ebu Badiꞌaꞌa ḡoere rinede tiroteꞌe rae furenoga radu, 'Ohoze ahiri rana iḡuri haḡaoꞌi' rae reiro. Eꞌanoꞌo ubuga Isakoꞌa furerarotene, mada fuꞌo zu uḡidu fare (8) meirotene, ahiꞌa rana iḡuri haḡairo. Ebu Isako ubugaꞌe Iakobo, ebu Iakobo ubugaꞌe vouḡafe gaubanana aheu fare (12). Ebu zeḡe mazaonoꞌo Iuda azaḡaniꞌa ḡehararo.
9 Iakobo ubuga duḡuruꞌe negoze Iosefa mazao ahiahi meiro ꞌahine, Iosefaꞌe vaze mazao seroniro, ebu hoitiroteꞌe vazeḡaniꞌa Izipi habaꞌa tutune onamiro, ḡutaroteꞌe teige tuḡure vazeḡa haḡaifine. Rehano Badiꞌaꞌe Iosefa teite radiudo,
10 ebu ani aduga hididoteꞌe zamaḡanonoꞌo mae vaḡinido. Badiꞌaꞌa edeḡa boro Iosefa haro ꞌahine, Izipi kiniḡa Faraoꞌa Iosefaꞌe manoḡa rae horoniro. Ebu Farao ani Izipi habaꞌa niduꞌa zu ane ḡau niduꞌa ḡianoga veize Iosefaꞌe Izipi ḡihiꞌaḡano mae ohoniro.
11 Ebu zahara boroꞌa Izipi zu Kanana habaꞌa niduꞌao furerarotene, eꞌe azaḡa ḡabonezeꞌa rirau ḡouriro. Aḡife Iakobo duḡuru zuni ogomuzeꞌa hauḡiro.
12 Ebu Iakobo ani, Izipi zamaḡano ogomuꞌeꞌe raꞌeteꞌe igirotene, ubuga duḡuru tuḡuziro, ogomu nu hoitoga veize. Aꞌe Izipi habaꞌa onamiroteꞌe ḡadaheḡa.
13 Ḡae aheuḡano tuḡuzirotene, Iosefaꞌa negoḡa duḡuru ihoziro, aniꞌe iniu. Ebu Farao zuni Iosefa negoḡa duḡuruꞌa onairoteꞌe hariḡa igiro.
14 Ebu Iosefa ani moga Iakobo zu nabuga niduꞌa onaoga veize ḡoere tuḡuriro. Negoḡa, nabuga niduꞌaꞌe ḡae fuꞌo zu aheu fare gaubanana zu fuꞌo fare (75).
15 Eꞌanoꞌo Iakobo ani Izipi habaꞌa onamiro, ebu ane zu ubuga niduꞌaꞌe eꞌea rudaro.
16 Ahirizeꞌe Sekemu habaꞌa odohe onairo, ebu Aberahamoꞌa hoitiroteꞌe iduḡano ḡuriro. Aꞌe Aberahamoꞌa Hamoro ubuga duḡuru mazaonoꞌo Sekemu habaꞌano moni hina hoitiroteꞌe habaꞌa.
17 Ebu Badiꞌaꞌa irina Aberahamo niroteꞌe ḡoeꞌaniꞌa hudaꞌuma madaḡaniꞌa hanitirotene, Isaraela azaḡaꞌe Izipi habaꞌano ḡehararo.
18 U kini ꞌahoga, Iosefa hariḡa aḡuꞌa vazeḡaniꞌa Izipi kiniḡa reiro.
19 Aniꞌe goro ḡoeꞌa sauꞌa ohonadu, aḡife duḡuru sausauze ruziro, ebu 'Eneze guraḡa mae modoꞌi, zeḡe rudanoga veize!' rae tuḡutuḡuziro.
20 Eꞌe zamaḡano Moseꞌa fureraro. Aniꞌe Badiꞌa ubumao ene manoḡa tauḡi. Ebu bato uḡidu aniꞌe Mose ane moga neo ḡubuniro.
21 Mose ani enoneo ti modirotene, Farao aboḡaniꞌa horone madu, ane ubuga raenaꞌa ḡubune borofiro.
22 Ebu Moseꞌe Izipi azaḡa edeḡa niduꞌa maꞌenaꞌa bororaro, ebu inaraḡeta ḡoerido zu haḡaiḡa haḡaido.
23 Mose ani muriḡa ḡae ḡazaḡa gaubanana (40) reirotene, ane nabuga Isaraela azaḡa ḡiaziꞌ onamihi reiro.
24 Aneꞌa ḡiaziꞌ onamiroteꞌe zamaḡano, Izipi vazeḡa ꞌahoganiꞌa Isaraela vazeḡa ꞌahoga sausauneꞌenogano horoniro. Eꞌanoꞌo aniꞌa dananeꞌenaꞌa, eꞌe naeḡa haḡaihi radu Izipi vazeḡa mau runiro.
25 Mose ani ꞌahige rae zamariro, nabuga duḡuruꞌe ederiꞌuma, aniꞌe zeḡe danazoga veize Badiꞌaꞌa tuḡuneha. Rehano ze ꞌouge mene zamariro.
26 Irarirotene, bare onamiro, ebu Isaraela vazeḡa aheuꞌa utiteꞌenogano horoziro. Ani utizeꞌa hauḡoga veize ꞌahige rae ziro, raenaꞌa, 'Nougaꞌahi ḡa negoḡota sausautiteꞌohe?'
27 Rehano nabuga sausauneꞌeteꞌe vazeḡaniꞌa Mose duine vaḡinadu ꞌahige reiro, raenaꞌa, 'Ḡaꞌe iniuꞌa emeḡe zuhiꞌafiꞌuma zu kotafiꞌuma vazeḡano ohoꞌiro? Ḡaꞌa mene zuhiꞌafiꞌuma.
28 Ḡaꞌe ohoḡore Izipi vazeḡa mau runateꞌe teige eḡe zuni uḡuhihi raꞌe hehe?'
29 Moseꞌa ḡoere eꞌe igirotene, ani Midiana habaꞌa ferau onamiro, ebu ani gariḡa rehano eꞌea radiudo, ebu hahuradu ubuga aheu reiro.
30 Muri ḡae ḡazaḡa gaubanana (40) enogano Sinai maḡa uhiḡano haba bohaꞌano butuꞌa duhuru radiuꞌeteꞌe zamaḡanonoꞌo, tuḡure vigaꞌa Mose mazao fureraro.
31 Mose ani butuꞌa kode duhuruꞌenogano horonirotene, 'ꞌOmoꞌe nagini?' rae zamariro. Ani fairu ḡianoga radu uhiḡa onamirotene, Zuhiꞌa Boro ago igiro.
32 'Eꞌe vouḡaḡo Badiꞌa. Aberahamo, Isako, Iakobo duḡuru Badiꞌa.' Mose ani eꞌe igirotene, rihanadu rereraro, ebu ehamanoga zu mene idararo.
33 Ebu Zuhiꞌa Boroꞌa ninaꞌa, 'Tamaka mae vaḡinoꞌi, mazaḡa ḡaeꞌa edauꞌeteꞌe habaꞌaꞌe zaḡoḡa.
34 E hubehune Izipi habaꞌano Isaraela azaḡa sausauzeꞌeteꞌe horozeha, zu ḡaniḡanauꞌeteꞌe egeha. Eꞌanoꞌo aduganonoꞌo mae vaḡizoga veize ovaeha. Izidi ḡaꞌe Izipi habaꞌa bare tuḡuꞌe onamiꞌuma.'
35 Mose ꞌadiꞌe Isaraela azaḡaniꞌa heꞌeheꞌeneꞌenaꞌa, ꞌahige niroteꞌe vazeḡa. 'Ḡaꞌe emeḡe zuhiꞌafiꞌuma zu kotafiꞌuma vazeḡano iniuꞌa ohoꞌiro? Ḡaꞌa mene zuhiꞌafiꞌuma.' Rehano Mose aniꞌe Isaraela azaḡa zuhiꞌaziteꞌe zu aduganonoꞌo mae vaḡiziteꞌe veize Badiꞌa aneꞌa tuḡuniro. Aꞌe butuꞌa kode duhuruꞌeteꞌe zamaḡano tuḡure vigaꞌa Mose mazao fureranadu, ḡoere eꞌe haro.
36 Ebu Mose ani Isaraela azaḡa Izipi habaꞌanonoꞌo tutuze vaḡiziro. Eꞌe zamaḡano zaguzagaꞌuma haḡaiḡa zu Badiꞌa tahi gigiꞌa haḡaiḡa haḡaido. Ebu Izipi habaꞌano zu Davara Kanaḡa raꞌeteꞌea, ebu haba bohaꞌano muri ḡae ḡazaḡa gaubanana (40) ꞌouge haḡaido.
37 Mose ꞌadaꞌa Isaraela azaḡa ꞌahige rae ziro, raenaꞌa, 'Badiꞌaꞌa zae boꞌaḡanonoꞌo peroveta vazeḡa ꞌahoga eḡe heuḡa tuḡuniꞌuma.'
38 Mose ani haba bohaꞌano vouḡafe nuꞌonuꞌo zamaḡano radiro. Ebu vouḡafe zu tuḡure viga nemaḡano edaunu. Ebu Sinai maḡano tuḡure vigaꞌa Mose teite ḡoeradu, ḡabone ḡoeꞌa haro, ebu emeḡe mazao zuni riꞌiniro.
39 Rehano vouḡafeꞌe Mose ḡoere egoga mene urato haro. Ebu Mose heꞌeheꞌenadu, zamaze hena, Izipi habaꞌa bare onamihi reiro,
40 ebu Aroni ninaꞌa, 'Emeḡe ibitofoga veize badiꞌa nuḡo haḡaofoꞌi! Mose ani Izipi habaꞌanonoꞌo tutufe vaḡifiro rehano, izidi ani mazao naginiꞌa fureranataꞌaꞌe eme aḡuꞌa.'
41 Eꞌanoꞌo ze ḡuriro badiꞌaḡa boromakau ubuga iraḡano haḡairo. Ebu ze ani dibuꞌo hanadu, ꞌevoreze hina haḡairoteꞌe badiꞌaḡa niguneꞌenaꞌa eꞌe matuꞌuḡa haḡairo.
42 Eꞌanoꞌo Badiꞌaꞌa ḡaruni ziniro, ebu zeḡeꞌa mada, bato zu buzuva mazao kuranoga rae reꞌoreꞌoze modiro. Haḡai aꞌaꞌe peroveta azaḡaniꞌa buka zaḡoḡa zamaḡano tiro, raenaꞌa,
'Isaraela azaḡa, zaꞌe haba bohaꞌano
muri ḡae ḡazaḡa gaubanana (40)
eḡe, mene dibuꞌoniro zu ḡahunoniro.
43 Zaꞌe badiꞌa ꞌahoga, niḡa Moroko,
ane kuru neḡa taruhaḡa,
zu badiꞌa rae huneꞌeteꞌe
buzuvaḡa ꞌahoga, niḡa Refani,
zaeꞌa kurano hanoga radu
haḡairoteꞌe badiꞌaḡa herate ragavinu.
Eꞌanoꞌo zaꞌe, eḡeꞌa Babulonia habaꞌa roꞌane,
haba faḡano tuḡuze modiꞌuma.' (Amos 5:25-27)”
44 Stefanoꞌa bare ꞌaune ḡoereꞌenaꞌa, “Vouḡafeꞌa haba bohaꞌano radiudoteꞌe madaḡano, zeḡe mazaoꞌe Mose goro ḡoeꞌa tiꞌeteꞌe taruhaḡa ꞌeꞌe. Aꞌe Badiꞌaꞌa Mose neadu, nouge nouge horoniroteꞌe ḡauḡa idane haḡairo.
45 Muri nu enogano vouḡafeꞌa moze mazao taruha eꞌe mae ꞌauniro. Ebu Badiꞌaꞌa Iuda mene azaḡa haba ꞌadaonoꞌo hegoze vaḡizadu, Iosuaꞌa vouḡafe ibito ziniꞌenaꞌa haba ꞌadi meiro. Ebu taruha eꞌe odohe diuḡadu, eꞌea ohoniro, onamo Davidaꞌa fureraro.
46 Davidaꞌe Badiꞌaꞌa urato haro. Ebu aniꞌa Badiꞌa umineꞌenaꞌa, vouḡafe Iakoboꞌa kurano haudoteꞌe Badiꞌaḡaniꞌa radiꞌuma neḡa ogoratihi reiro.
47 Rehano eꞌe neḡaꞌe Davida ubuga, Solomonaꞌa Badiꞌa veize ogoraro.
48 Rehano Niḡa Hitaga Hune Badiꞌaḡaniꞌe vazeꞌa haḡaeꞌeteꞌe neḡano mene radiꞌuma. Eꞌe raenaꞌa, peroveta vazeḡa ꞌahoganiꞌa ꞌahige reiro.
49 'Zuhiꞌa Boroꞌa ꞌahige raꞌohe.
Adureꞌe eḡe ehoro habaꞌa,
zu rahaꞌe eḡe oda ohone tiꞌeteꞌe habaꞌa.
Eꞌanoꞌo zaꞌe eḡe ne ogoronouga
mene idaḡa,
zu eḡeꞌa radiꞌuma habaꞌa
ogoronouga mene idaḡa.
50 Adure zu raha ḡauḡa niduꞌa
eḡe ꞌevore hina haḡairo.' (Isaia 66:1-2)
51 Zaꞌe teḡa riḡa azaḡa! Zamazeꞌe tuḡa zu Badiꞌa ḡoere mene egohuꞌohe. Ebu Vine Zaḡoḡa iḡaiḡa hezaho hauꞌohe. Zae vouḡaꞌa haḡaidoteꞌe haḡaiḡa, zae zuni haḡaeꞌohe.
52 Peroveta azaḡa boꞌaḡano zae vouḡaꞌa mene sausaunidoteꞌe vazeḡa ꞌahoga ꞌeꞌe ga? Vaze Duduḡaniꞌa onaiteꞌe hariḡa irina rae fureniroteꞌe azaḡa zuni zeḡeꞌa zimi ruzido. Ebu izidi zaꞌe eꞌe vazeḡa onairotene, revo hanadu mau runiro.
53 Zaꞌe Badiꞌaꞌa tuḡure viga tuḡuzadu goro ḡoeꞌa meiro, rehano goro ḡoeꞌa aꞌaꞌe hezaho haro.”
Stefano hadi hina mau runiro
54 Stefano ḡoere igiroteꞌe azaḡaꞌe zamaze ḡugize ruziro, ebu ani mazao ḡononeze atitiro.
55 Rehano Stefanoꞌe Vine Zaḡoḡaniꞌa irivaꞌonadu, adure ḡohani ḡianeꞌegano, Badiꞌa agaḡaniꞌa borofe agaruꞌeteꞌe horoniro, zuni Iesuꞌa Badiꞌa edaꞌe moneo edanoga horoniro.
56 Ebu Stefanoꞌa raenaꞌa, “Ḡianoꞌi! E adureꞌa bohatanoga horoneꞌohe, ebu Vaze Ubuganiꞌa Badiꞌa edaꞌe moneo edauꞌeteꞌe horoneꞌohe.”
57 Eꞌe igirotene, ze ꞌevoreze hina teḡaze ꞌuiro, ebu huau borofeꞌenaꞌa, zeḡe niduꞌa ani uꞌa dure onamiro.
58 Ebu Ierusalema neḡanonoꞌo ahase onamadu, hadi hina mau sausauniro. Kota zamaḡano ḡuriro ḡoeꞌa Stefano rana riꞌiniroteꞌe azaḡaniꞌe dabuaze mae vaḡinadu, ene iziga ꞌahoga, niḡa Saulo oda babaḡano tiro.
59 Zeḡeꞌa hadi hina mauꞌeteꞌe zamaḡano, Stefano ani Badiꞌa mazao kurau radiro, raenaꞌa, “Zuhiꞌa Iesu, eḡe vine mae ḡihinoꞌi!”
60 Ebu obenaḡa hina tuḡadu huaro, raenaꞌa, “Zuhiꞌa Boro! Zeḡe haḡai sauꞌa ꞌadi naeḡa zeḡe rana ago toꞌi!” Ani ꞌouge reirotene, ꞌai iriga riꞌiro.