13
Hari manoḡa harame ragavoga veize Banabasi zu Saulo meiro
1 Antioka ekalesiaḡa zamaḡanoꞌe peroveta azaḡa zu ihore azaḡa ꞌeꞌe. Nizeꞌe Banabasi, Simeona, niḡa ꞌahogaꞌe Niḡera, ebu Kurene vazeḡa, niḡa Lukio, Manaena, aniꞌe Kini Heroda Antipasi teite tibano bororaroteꞌe vazeḡa, ebu Saulo.
2 Mada ꞌahogano ze ogomu moneo zaḡozaḡeꞌenaꞌa Zuhiꞌa Boro mazao kurau radiunu. Eꞌe zamaḡano Vine Zaḡoḡaniꞌa ziro, raenaꞌa, “E Banabasi zu Sauloꞌe eḡe gau veize meirobobo, eḡe veize avo ohozoꞌi!”
3 Eꞌanoꞌo ze zaḡozaḡiro zu kuraroteꞌe enogano, ꞌevoreze Banabasi zu Saulo rana teadu kuraro, ebu tuḡuze onamiro.
Pauloꞌa ibite harame ragaviroteꞌe
Kupro ꞌumuḡano haramiro
4 Paulo zu Banabasi zeꞌe, Vine Zaḡoḡaniꞌa tuḡuzeꞌenaꞌa, Seleukia toḡatoḡaḡa ovoiro, ebu eꞌeanoꞌo ḡasi hina Kupro ꞌumuḡa ruhau fariro.
5 Ebu Salami neḡano feurirotene, Iuda azaḡa kuru neḡa neḡa diuḡadu Badiꞌa ḡoere haramiro. Ioane, niḡa ꞌahogaꞌe Mareko zuni eꞌea, zeḡe danazoga veize ḡatiziro.
6 Ze eꞌe ꞌumuḡa niduꞌa ne ꞌahoga ꞌahoga onamo Pafo neḡano feuriro. Ebu Iuda vazeḡa ꞌahoga hidiro. Aniꞌe nabone zu ḡuriro peroveta vazeḡa, niḡa Bari-Iesu.
7 Ani eꞌe ꞌumuḡa gavanaḡa teite vazetite radiunu. Gavana vazeḡa niḡaꞌe Seregio Paulo. Ani vadiga manoḡa, faifairu zamareꞌeteꞌe vazeḡa. Ani Badiꞌa ḡoere igihi reiro. Eꞌanoꞌo vaze tuḡunadu, Banabasi zu Saulo ane ne huze onairo.
8 Rehano nabone vazeḡa eꞌe, niḡa ꞌahogaꞌe Eluma. Aꞌe Giriki ḡoeꞌa. Ḡoere eꞌe hugaꞌe nabone. Aneꞌa zeḡe ḡoere ꞌueꞌenaꞌa taꞌiro ziniro. Ebu gavanaꞌa Iesu mazao mene fioga veize ḡunuḡununiro.
9 U Saulo, niḡa ꞌahogaꞌe Paulo, ani Vine Zaḡoḡaniꞌa irivaꞌonadu, Eluma ḡiane runiro, ebu raenaꞌa,
10 “Ḡaꞌe Satani ubuga. Haḡai duduḡa niduꞌa agireniꞌeteꞌe vazeḡa. Ḡuriro zu soꞌosoꞌo haḡaiḡaniꞌa ḡae zama iriꞌavonoga. Ebu Zuhiꞌa Boro ibi duduḡa ḡunuḡununeꞌeteꞌe haḡaiḡa mene modeꞌohe.
11 Ḡianoꞌi! Zuhiꞌa Boro gigiꞌaꞌa ḡae rana raha. Ḡaꞌe ubumaḡoꞌa kuraꞌuma, ebu mada nu agaḡa horonoga mene idaraꞌuma.”
Ebu ḡoze zu uzaboꞌa ubumaḡa zogone ꞌuiro, ebu tufatufeꞌenaꞌa ꞌevoꞌano abinoga veize vaze vaḡiro.
12 Ebu gavana vazeḡaꞌe fureraroteꞌe haḡaiḡa horonirotene, Iesu mazao fiiro. Zu Zuhiꞌa Boro haḡai ederadu, zaguzagaro.
Pauloꞌa Pisidia habaꞌano Antioka neḡano haramiro
13 Paulo zu ane teite onamiroteꞌe azaḡaꞌe Pafo neḡanonoꞌo iḡunadu, Pamufulia habaꞌano Perega neḡa ḡasi hina ruhau onamiro. Eꞌeabuꞌu Ioane ani, Paulo duḡuru muhizadu, Ierusalema neḡa bare onamiro.
14 Zeꞌe Perega neḡanonoꞌo onamo, Pisidia habaꞌano Antioka neḡano feuriro. Ebu Bana Madaḡa madaḡano, Paulo zu Banabasiꞌa Iuda azaḡa kuru neḡa diuḡadu ehoriro.
15 Ebu goro ḡoeꞌa zu peroveta azaḡa ḡoere meꞌodiroteꞌe enogano, Iuda azaḡa kuru neḡa ḡianeꞌeteꞌe azaḡaniꞌa, Paulo duḡuru veize ḡoere tuḡuriro. “Negofe duḡuru, za emeḡe veize inara ḡoeꞌa eꞌe roꞌidene, haramine idaḡa hehe?”
16 Paulo ani iḡunadu ꞌevoꞌa mae ḡihiniro, zeḡeꞌa ḡoeꞌa ego hanoga veize. Ebu ḡoeꞌa ḡadaheniro, raenaꞌa, “Isaraela azaḡa, zu Iuda mene azaḡa Badiꞌa gubaneꞌeteꞌe, egoꞌi!
17 Isaraela azaḡa Badiꞌaꞌa, aḡife duḡuru meiro, ebu zeḡeꞌa Izipi habaꞌano radiunuteꞌea, Badiꞌaꞌa danazeꞌenaꞌa ḡehararo zu inariro. Ebu Badiꞌaꞌa ane gigiꞌa boro hina Izipi habaꞌanonoꞌo tutuze buziro.
18 Ebu muri ḡae ḡazaḡa gaubanana (40) haba bohaꞌano onamiroteꞌe zamaḡano, zeꞌe Badiꞌa ḡoere mene ego haunu rehano, Badiꞌaꞌa mene muhiziro.
19 Kanana habaꞌano haba fuꞌo zu aheu fare (7) azaḡaꞌe, Badiꞌaꞌa zimi hauḡadu, habazeꞌe Isaraela azaḡa ziniro.
20 Muri maḡa ḡazaḡa zu ḡae fuꞌo gaubanana (450) zamaḡano, ꞌouge haḡainu.
Eꞌebuꞌu Badiꞌa ani, Isaraela azaḡa boꞌaḡanonoꞌo Isaraela azaḡa ibito ziniꞌuma azaḡa tiba tiba ohoze onaminu. ꞌOuge haḡae onamo peroveta vazeḡa Samuelaꞌa fureraro.
21 Eꞌebuꞌu Isaraela azaḡaꞌe, kini ꞌahoganiꞌa ibito zenoga uratiro. Eꞌanoꞌo Badiꞌaꞌa Saulo ohoniro. Aniꞌe Kisa ubuga, Beniamini iduhu vazeḡa. Ani, muri ḡae ḡazaḡa gaubanana (40) Isaraela azaḡa ibito ziniro.
22 Rehano Badiꞌa ani, Sauloꞌe kini gauḡanonoꞌo mae vaḡinadu, Davida madu kini iḡuꞌano ohoniro. Aniꞌe Badiꞌaꞌa raenaꞌa, 'Iese ubuga Davidaꞌe, eḡe zamaꞌa urato hauꞌeteꞌe vazeḡa. Aniꞌe eḡeꞌa urateꞌeteꞌe gauḡa niduꞌa haḡaiꞌuma.' reiro.
23 Badiꞌa ani, ibite rae tiroteꞌe ibiḡano, Davida mariganonoꞌo vaze ḡaboziꞌuma vazeḡa fureno ziniro, ebu ani Isaraela azaḡa mazao tuḡuniro. Niḡaꞌe Iesu.
24 Ani ꞌizema onaogano, Ioane Babatisoꞌa Isaraela azaḡa niduꞌa mazao haramiro, raenaꞌa, “Sauꞌanonoꞌo ḡihuradu, bapatizo moꞌi!” reiro.
25 Ioaneꞌa ane gau hauḡeꞌenogano ꞌahige reiro, raenaꞌa, 'Zaeꞌa zamareꞌetene, eꞌe iniu? Eꞌe mene Keriso. Eꞌe vazeḡaꞌe ariga onaeꞌohe. Eꞌe ane tuḡure vazeḡa radu, tamakaḡa miniḡa fuhiꞌo hanoga zu mene idaḡa. Ani niꞌe eḡe ni vitinoga.' ”
26 Ebu hena Pauloꞌa ꞌaune ḡoereꞌenaꞌa, “Nego nabudi, Aberahamo iduhu mariga azaḡa, ebu Iuda mene azaḡa, Badiꞌa gubaneꞌeteꞌe! Emeḡe veize, Badiꞌa ani, vaze ḡaboziꞌuma ḡoeꞌa tuḡuriro.
27 Ierusalema azaḡa zu zeḡe ibito ziniꞌeteꞌe azaḡa, zeꞌe Iesuꞌe Keriso rae mene zamarinu, zu Bana Madaḡa Madaḡa niduꞌa, peroveta azaḡa ḡoere meꞌodidoteꞌe, eꞌe hugaꞌe mene ederinu. Rehano zeḡeꞌa Iesu kotanadu runeo tuḡunirotene, eꞌe ḡoeꞌa haḡae huniro.
28 Zeꞌe Iesu runeo tuḡuniteꞌe mazaḡa mene horoniro rehano, satauroneadu rudanoga veize Pirato uminiro.
29 Ebu buka zaḡoḡano tiroteꞌe ḡoeꞌa niduꞌa ane mazao haḡae hauḡirotene, satauroonoꞌo mae bunadu, idu zamaḡano tiro.
30 Rehano Badiꞌaꞌa runeonoꞌo bare ḡaboniro.
31 Ebu Iesu ani ibite Galilea habaꞌanonoꞌo ane teite Ierusalema neḡa itiroteꞌe azaḡa mazao mada ḡehaḡa zamaḡano fureraudo. Ebu ze izidi ꞌize Isaraela azaḡa mazao eꞌe hariḡa meꞌode fureneꞌohe.
32 Eme izidi, ꞌada hari manoḡa rae fureneꞌohe: Badiꞌaꞌa amahi vouḡafe mazao rae tiroteꞌe ḡoeꞌaꞌe,
33 vouḡafe mariga emeḡe mazao aneꞌa haḡae huneha. Eꞌe haḡaiḡaꞌe Iesu runeonoꞌo bare ḡaboniro. ꞌAdiꞌe Salamo aheuḡa (second) zamaḡano Iesu hariḡa tiroteꞌeꞌa hudaneha, raenaꞌa, 'Ḡaꞌe eḡe Ubude. Izidi eꞌe, ḡa Mogo raha.' (Salamo 2:7)
34 Badiꞌaꞌa Iesu runeonoꞌo bare ḡaboniro, zu ahiꞌaꞌe mene ruhuraꞌuma reiroteꞌe haḡaiḡaꞌe buka zaḡoḡano ꞌahige touga.
Badiꞌaꞌa raenaꞌa,
'Eꞌe, Davida mazao ziniꞌuma rae tiroteꞌe
ḡahugoneḡa manoḡa zae ziniꞌuma.
Eꞌe ḡahugoneḡaꞌe zaḡoḡa,
zu eꞌe ḡoeꞌaꞌe hudau huniꞌuma.' (Isaia 55:3)
35 Ebu Salamo ꞌahogano zuni ꞌahige tiro.
Davidaꞌa Badiꞌa ninaꞌa,
'Ḡaꞌe, ḡae Vaze Zaḡoḡa ahiꞌaniꞌa
ruhuranoga veize
iduo mene modiꞌuma.' (Salamo 16:10)
36 Ḡoere ꞌadiꞌe Davida hariḡa mene tiro, mazaḡa Davida aniꞌe, ane radone madaḡano Badiꞌa ura gauḡa haḡae hauḡirotene, rudaro. Ebu ane zuni vouḡaḡa idu habaꞌano ḡuriro, ebu ahiꞌaꞌe ruhuraro.
37 U Badiꞌaꞌa runeonoꞌo bare ḡaboniroteꞌe vazeḡaꞌe ꞌahiꞌa mene ruhuraro.
38 Eꞌanoꞌo nego nabudi, ꞌadi ederoꞌi! Emeꞌe, Badiꞌaꞌa zae haḡai sauꞌa aḡutu modiꞌuma ḡoeꞌaꞌe, Iesuꞌa nagini haḡaofiroteꞌeanoꞌo zae mazao harameꞌohe.
39 Mose goro ḡoeꞌa haḡaeꞌeteꞌeanoꞌo, za Badiꞌaꞌa za ane ubumao duduḡa rouga mene idararo, mazaḡa vaze haḡaiꞌe sauꞌa daꞌo ꞌahine. Rehano vaze haḡaiḡa sauꞌa eꞌe niduꞌaꞌe, iniuꞌa Iesu mazao fiine, Iesuꞌa nagini haḡaofiroteꞌeanoꞌo Badiꞌaꞌa aḡutu modadu, eꞌe sauꞌaḡanonoꞌo mae vaḡiziꞌuma.
40 Eꞌanoꞌo peroveta azaḡaniꞌa reiroteꞌe haḡaiḡa zae mazao mene fureranoga veize ḡianoꞌi!
41 ꞌAhige touga, raenaꞌa,
'Ḡianoꞌi!
Zaꞌe, Badiꞌa ḡoere heꞌeheꞌene
ḡoereꞌeteꞌe azaḡa,
zaguzaganoꞌi, ebu rudanoꞌi!
Mazaḡa eꞌe, zae radone madaḡano
haḡai ꞌahoga fureniꞌuma.
Vazeꞌa, naginiꞌa fureraꞌuma rae,
zae ihozine zuni,
“ꞌUguḡa haḡaiḡaꞌe
mene fureraꞌuma.” radu,
eꞌe ḡoeꞌa mene mae ḡihiniꞌuma.'” (Habakuku 1:5)
42 Paulo ani Banabasine, Iuda azaḡa kuru neḡanonoꞌo buauꞌenogano, eꞌea kuraroteꞌe azaḡaniꞌa umiziro, zeḡe moḡa Madaḡa Zaḡoḡano zuni ḡoere eꞌe ꞌaune bare haramoga.
43 Vaze ꞌai rururu ḡourirotene, Iuda azaḡa, zu Iuda mene azaḡa, Badiꞌa mone ḡihuriroteꞌe ḡehaḡaniꞌa Paulo zu Banabasi hegotiro, ebu Paulo zu Banabasiꞌa iraduḡuziro, raenaꞌa, “Badiꞌa ḡahunoneḡa manoḡa zamaḡano fie gigaru onamoꞌi!”
44 Bana Madaḡa Madaḡa bare meirotene, ne eꞌe azaḡaꞌe nariga niduꞌa Zuhiꞌa Boro ḡoere egoga veize nuꞌoraro.
45 Rehano Iuda azaḡaniꞌa, vaze ḡehaḡaniꞌa nuꞌoraroteꞌe horonirotene, ze ahiahi meiro, ebu ḡoere sauꞌa hina, Pauloꞌa haramiroteꞌe ḡoeꞌa ꞌueꞌenaꞌa taꞌiro haro.
46 Paulo zu Banabasiꞌe ḡoere figareꞌenaꞌa, “Eme, ibite zae Iuda azaḡa veize Badiꞌa ḡoere rae fureneha. Rehano izidi zaꞌe Badiꞌa ḡoere hezaho hanadu, zaeꞌa zae bare ḡabone tuḡutuḡu mene meꞌuma azaḡa rae raha. Eꞌanoꞌo eme izidionoꞌo Iuda mene azaḡa veize harame onameꞌeꞌuma.
47 Mazaḡa Zuhiꞌa Boroꞌa eme ꞌahige rae ifiro.
'E, Iuda mene azaḡa mazao
eḡe ḡoere rae fureniteꞌe agaḡa
rouga veize ḡa ohoꞌiro,
ḡaeꞌa haba niduꞌa zamaḡano
Zuhiꞌa Boroꞌa vaze ḡaboziꞌuma
hariḡa ihozoga veize.' (Isaia 49:6)
48 Iuda mene azaḡaniꞌa eꞌe igirotene, zeꞌe matuꞌiro, ebu Zuhiꞌa Boro ḡoere niguniro. Ebu ḡabone tuḡutuḡu mouga veize, Badiꞌaꞌa ohotiroteꞌe azaḡaꞌe niduꞌa ane ḡoere mae ḡihiniro.
49 Ebu Zuhiꞌa Boro ḡoereꞌe eꞌe habaꞌa niduꞌa zamaḡano ḡehararo.
50 Rehano Iuda azaḡaꞌe, Iuda roḡae nize boro azaḡa Badiꞌa gubaneꞌeteꞌe zu eꞌe neḡa ibito ziniꞌeteꞌe azaḡa tutuzadu, Paulo zu Banabasi sausauzoga rae haraharaziro. Ebu eꞌe habaꞌanonoꞌo hegoze vaḡiziro.
51 Eꞌanoꞌo ze, eꞌe moneo ḡoeriꞌuma heuḡa, odaze huꞌuruḡa fode rurunadu, Ikonio neḡa onamiro.
52 Ebu Zuhiꞌa Boro tahiꞌa tahiꞌaꞌe matuꞌe rudaro, zu Vine Zaḡoḡaniꞌa iriꞌavoziro.