4
Satan i valar Iesu
(Mar 1:12-13; Luk 4:1-13)
1 Ma ra Tulungen i ga agure pa Iesu urama ra bil upi Satan na valar ia.
2 Ba i tar vevel a ivat na vinun na bung na keake ma ra ivat na vinun na bung na marum bula, i mulmulum nagam.
3 Ma ra tena vavagu i tadav ia, ma i biti tana: Ba u natu i God, una kure go ra umana vat upi diat a gem uka.
4 Ma i biti tana: Di ga tumu ia ba: “A tarai pa dia laun ta ra gem uka, dia laun ta ra pakapakana tinata par i arikai ta ra ngie i God.”
5 Ma Satan i agure ta ra gomgom na pia na pal, ma i vaki ia liu ta ra bur na pal na vartabar ma i biti tana:
6 Ba u natu i God, una pil ba; tago di ga tumu ia dari:
Na tul tar kana umana angelo upi diat a balaure u,
Ma diat a puak vatur u ma ra lima i diat,
Kan una tuke ra kaum ta ra vat.”
7 Ma Iesu i biti tana: Di ga tumu ia dari bula: “Koko una valar ra Luluai kaum God.”
8 Tikai mulai, Satan i agure ta ra luana ta i manga tuluai urama, ma i ve tar ia ra lavur kiki na varkurai ta ra gunagunan ra pia tana ma kadia minamar bula,
9 ma i biti tana: Nam parika ina tabar iu me, ona una va timtibum ma una lotu tadav iau.
10 Ma Iesu i biti tana: Satan, una vana ka, tago di ga tumu ia dari: “Una lotu tadav ra Luluai kaum God, ma una torom tana ka.”
11 Ma Satan i vana kan ia, ma ra umana angelo dia pot pirana, ma dia torom maravut ia.
Iesu i tur pa kana papalum aro Galilaia
(Mar 1:14-15; Luk 4:14-15)
12 Ba Iesu i valongore ba dia tar kinim varuk Ioanes ta ra pal na banubat, i vana mulai Galilaia;
13 ma i mareng mara Nasaret urama Kapernaum, a gunan ra valian livuan ta ra ura langun Sebulon ma Naptali, ma i ki tana,
14 Upi na ot ra tinata kai Iesaia ra propet dari:
15 “A gunan Sebulon ma ra gunan Naptali
Ma maravai ra valian, ma ta ra papar a Iordan maro iat,
Ma Galilaia bula kai ra umana Tematana,
16 A tarai nina dia ga ki ta ra bobotoi, dia ga gire ra ngala na kapa,
Ma ra kapa i ga vana rikai ta diat ta ra gunan na minat, ma ta diat bula ta ra malur na minat.”
17 Papa nam ra kilala Iesu i varvai tavuna, ma i biti: Avat a nukpuku, tago ra varkurai ra bala na bakut i maravai ka.
Iesu i oro pa ra ivat na tena vinoara
(Mar 1:16-20; Luk 5:1-11)
18 Ba i vaval Galilaia i gire ra ura barturana, Simon, a iangina bula Petero, ma Andreas, dir turana, dir vung ra ubene na ta, tago dir a ura tena vinoara.
19 Ma i biti ta dir: Amur a mur iau, ma ina mal pa amur upi amur a ura tena vinoara na tarai.
20 Ma dir tut vuavuai kan ra ubene ma dir mur ia.
21 Ba i vana pa mulai, ta ra ivu barturana bula, Iakobo natu i Sebedaio, ma Ioanes, dital ma Sebedaio tama i dir, dital ki ra mon, dital uma ra ubene, ma i oro pa dir;
22 ma dir tut vuavuai kan ra mon ma tama i dir, ma dir mur ia.
Iesu i varvartovo, i varvai, ma i valagar ra tarai
(Luk 6:17-19)
23 Ma Iesu i vana vurvurbit Galilaia parika ma i varvartovo ta kadia umana pal na lotu, ma i varveai ta ra bo na varvai ure ra varkurai, ma i valagar ra tarai ta ra lavur enana ngunungut ma ra lavur enana minait bula.
24 Ma ra varvai ure i vana uraure Siria parika; ma dia kap diat parika dia mait tadav ia, diat ba ra lavur mangana minait ma ra ngunungut i tup diat, ma diat ba ra tabaran i ovai ta diat ma ra umana lunga, ma ra umana kakak bula, ma i valaun diat par.
25 Ma ra kor na tarai maro Galilaia ma Dekapolis, ma Ierusalem, ma Iudaia ma ta ra papar a Iordan dia mur ia.