15
Iesu i tur ta ra mata i Pilato
(Mat 27:2,11-14; Luk 23:1-5; Ioa 18:28-38)
1 Ba ra malana, a umana tena tinabar ngalangala ma ra umana tena tutumu ma ra kivung par, dia tata guvai, dia vi Iesu, ma dia kap ia, ma dia tul tar ia tai Pilato.
2 Pilato i tir ia: U laka ra King kai ra Iudaia? Ma i tatike bali ia dari: U iat, u tar tatike.
3 Ma ra lavur tena tinabar ngalangala dia takun ia ma ta mangoro na mangamangana.
4 Pilato i tir ia mulai, dari: Vakir kaum ta tinata na balbali? Una valongore, aivia go ra mangamangana dia takun u me?
5 Iesu pa i vue ta ik a tinata; ma Pilato i kaian tana.
Di varkurai ba Iesu na mat
(Mat 27:15-26; Luk 23:13-25; Ioa 18:39–19:16)
6 Ta ra lukara i palapala vue tana tadav diat tikai ta diat, di ga banubat diat, nina iat dia vatang upi ia.
7 Ma tikai, a iangina Barabas, di ga vi ia varurung ma diat, dia ga tut na vinarubu na varpiam, ma dia ga vardodoko ta ra vinarubu.
8 A kor na tarai dia vana pirana, ma dia lul ia, ba na pait nam ra magit i papait vatikene.
9 Pilato i tir diat: Ava mainge laka ba ina pala tar ra King kai ra Iudaia ta vavat?
10 Tago i nunure ba ra lavur tena tinabar ngalangala dia tar vi tar ia ta ra varngu ka.
11 Ma ra lavur tena tinabar ngalangala dia ununue ra kor na tarai upi da pala tar Barabas tadav diat.
12 Pilato i tir mule diat: Ava ina pait ia tai nina ava vatang ia ba ra King kai ra Iudaia?
13 Ma dia oraoro mulai dari: Da ot ia ta ra bolo.
14 Pilato i tir mule diat: Dave, ava ra varpiam i tar pait ia? Ma dia oraoro mat dari: Da ot ia ta ra bolo.
15 Pilato i mainge na vamaram ra tarai, ma i pala vue Barabas tadav diat, ma ba i tar virit kapi Iesu, i tul tar ia upi da ot ia ta ra bolo.
A tarai na vinarubu dia kulume Iesu
(Mat 27:27-31; Ioa 19:2-3)
16 Ma ra umana tena vinarubu dia ben tar ia ta ra ngungu pal kai ra tena varkurai na gunan, ma dia oro varurue kadia loko na tarai par.
17 Ma dia ule tar ra mal meme tana, ma dia vipuar ia ma ra kait dia ga vir ia;
18 ma dia vatatabai pa ia dari: U nam? U ra King kai ra Iudaia?
19 Ma dia kita ra uluna ma ra vuvur ma dia nami ia, ma dia va timtibum, dia lotu tadav ia.
20 Ba dia tar kulume pa ia, dia. pala vue ra mal meme, ma dia ule tar mule kana umana mal. Ma dia ben vairop ia upi da ot ia ta ra bolo.
Di ot Iesu ta ra bolo
(Mat 27:32-44; Luk 23:26-43; Ioa 19:17-27)
21 Tikai i vanavana pakit, a iangina Simon, a te Kirene, i vana maro ra gunan na uma, tama i dir Alekandro ma Rupus, ma dia vo pa ia pi diat, upi na puak kana bolo.
22 Dia agure ta ra gunan, a iangina Golgota, a kukurai ra iang i nam ba: A pia na lor.
23 Ma dia tul tar ra vain tana di ga pota ma ra bira na davai, ma i vue ke.
24 Ma dia ot ia ta ra bolo, ma dia tibe kana umana mal ma dia ilailam upi diat, ba nuve tikatikai na kap ia.
25 I tar lavuvat na pakana bung, ba dia ot ia ta ra bolo.
26 Di tumu ra tinata na vartakun arama liu dari: Go Iesu ra King kai ra Iudaia.
27 Dia ot varurue dital ma ra ivu tena nilong tai ta ra ivu bolo, tikai ta ra limana tuna, ma ta ra tikai ta ra mairana. [
28 Ma dari di ga pait ot pa ra tutumu na Buk Tabu nina i biti: “Di ga luk guve ma ra umana tena varpiam.”]
29 Ma diat dia vanavana pakit ia, dia kulkulume baie, ma dia loe ra ulu i diat, ma dia tatike: U, u re vue ra pal na vartabar, ma una pait pa mule tai ta ra utul a bung uka,
30 go una valaun mule u, ma una irop kan ra bolo.
31 Damana bula ra umana tena tinabar ngalangala ma ra umana tena tutumu dia varkulumai tana, dia biti vargil ta diat: I tar valaun ra umana enana; pa i tale ba na valaun mule.
32 Boina ba ra Kristo, a King kai ra Israel, na irop kan ra bolo, upi dat a gire, ma dat a nurnur tana. Ma dir bula, di ga ot varurue dital tai ta ra ivu bolo, dir bor ia.
Iesu i mat
(Mat 27:45-56; Luk 23:44-49; Ioa 19:28-30)
33 Ba i tar keke tur, a gunagunan parika i bobotoi tuk ta ra utul a pakana bung.
34 Ma ta ra utul a pakana bung, Iesu i manga oro dari ma ra ngala na nilaina: Eloi, Eloi, lama sabaktani, a kukurai nam ra tinata: Kaugu God, kaugu God, dave u vana kan iau?
35 Ta umana ta diat dia tur maravai, ba dia valongore dia biti: Go i oro Elias.
36 Ma tikai i vutvut, i vabilim ra mamakai ma ra vain manmanin, ma i vung ia ta ra vuvur, ma i tulue tar ia upi na mome, ma i tatike: Tuka; dat a gire kan Elias na vut upi na puak vairop ia.
37 Ma Iesu i manga kukula, ma i vungue ra tulungeana.
38 Ma ra mal na rurua kutu ta ra pal na vartabar i tarada kakit, i tur pa ia arama liu ma i tuk ura ra pia.
39 Ba ra luluai na tarai na vinarubu, nina i tur pirana, i gire i vungue ra tulungeana damana, i tatike: A dovotina, go Natu i God.
40 Ta ra umana vavina bula dia giragire maro vailik, Maria Magdalene, ma Maria na i Iakobo ikilik ma Ioses, ma Salome bula diat;
41 go diat dia ga mur ia, ba i ki Galilaia, ma dia ga toratorom tana; ma mangoro na vavina bula, dia ga varagur me urama Ierusalem, diat.
Di vadiop Iesu ta ra babang na minat
(Mat 27:57-61; Luk 23:50-56; Ioa 19:38-42)
42 Ba i ravian, tago a Vaninara, a bung i vut lua ta ra Bung Sabat,
43 Iosep a te Arimataia, a luluai di manga ru ia, i nurnur bula upi ra varkurai kai God, i vana pire Pilato, ma i lul pa ra minat i Iesu.
44 Pilato i kaian ba i matoto ba i tar mat, ma i oro pa ra luluai i ra tarai na vinarubu, i tir ia ba i tar mat amana ba pata?
45 Ba i tar matoto pa tai go ra luluai, i tul tar ra minatina tai Iosep.
46 Ma i kap ra mal kumau, i puak vairop ia, ma i pulu ia ma ra mal kumau, ma i vadiop ia ta ra babang na minat, di ga kala ia ta ra papar a vat; ma i pul bat ra matana ma ra vat i ta.
47 Ma Maria Magdalene, ma Maria, na i Ioses, dir gire go di vadiop ia tana.