5
Na Pannilu Ya Sachi Naruruut Wi Papil
1 Ad iningkaw akon innilà wi naruruut wi papil wi inoognan na sachi tumutùchu ta chiwawani imana. Ad na sachi papil, namfinisà naug-isan ya nangampitun taodna.
2 Ad iningkaw akon innilà wi osay oschorani anghel wi chinakornan kinganay mangwanani, “Sinun awad karobfonganay mangobfad ya mangukrad ta annayay naruut wi papil?”
3 Ngim maid pu nginlobfong mangukrad ta sachi naruruut wi papil, uray ta chachi ingkaw ad langit ya ad asnay luta, ya uray akon losani nan-ootoy.
4 Ad nalluruwaà tan maid pu nàchasan à nginlobfong.
5 Ngim anan na osa ta chachi mangipangpangu an saon, “Akay, achia malluwa, tan anchiyan naawakan à Layon wi siyan nangatuy kanà David, wi kanà ako Juda. Ad inafaknà Satan ad siyan nginlobfong wi mangib-at ta sachi papil wi nangampitun taodna, siyan ukrachona ad fasaona.”
6 Sachi ad innilà na Pannilu wi summisiad ta nangkawaan na chachi mangipangpangu ya uùchuwan Ali wi linìwos na chachi opati parsuwa. Ad na sachi Pannilu, mamàilan pilat ta natayana. Nasàkuchan à pitu ya pitu kon atana wi chichan miyalikan na pituy karobfongan na Ispiritun Apudyus wi nifaun ta losani lukar ad asnay luta.
7 Sachi ad ummachanin sachi Pannilu ta sachi tumutùchuy Ali wi nangara ta naruruuti papil wi inoognana ta chiwawani imana.
8 Ad innarana pun na papil, nampalintumong losan chachi opati parsuwa ya chachi chuwampuru ya opati mangipangpangu ta sangwananay manayaw an siya. Ad losan chachi mangipangpangu nanangchon à isù kitara ya chuyug wi falituk wi nanapnù fangfanguy insenso, wi miyalikan na luwarun na losani takun Apudyus.
9 Ad kinantachan faruy kanta wi anancha,
“Sia kan afusi nginlobfong wi mangara ta naruruut
wi papil wi nangampitun taodna,
ya sia kan annan karobfonganay mangib-at ya mamasa,
tan sian napatoy wi nifùfù na charam.
Ad sachin imfayadnu ta taku
ta mafalini mantakun Apudyus chicha.
Ad losan chachi sinubfutnu,
narpucha ta losani aapuapuun na taku
ta ailiili ta arutaruta
ya awad akon narpu ta losani
mansabsafali wi ug-ugkud.
10 Ad intapim ako chicha ta manturayam,
ya namfalinom ako chichà
pachi wi mansilfin Apudyus.
Siyan chichan manturay ad asnay lutà
tapin na padcha.”
11 Ad nantollongà pun, chingngor-un kingan na ad-adchuwani aangheles wi achi pu mafilang tan alifulifucha, wi naag-agsad wi linìwoscha chachi opati parsuwa ya chachi mangipangpangu ya sachi tumutùchuwan Ali.
12 Ad chinakorchay mangkankanta wi anancha,
“Na annayay Pannilu wi napatoy,
siyan afusi annan karobfonganay mipangatu ya machayaw,
ya maid pu miyisuwan na kinafaknangna ya kinaraingna
ya uray mannakafalinna ya kinafaruna.”
13 Sachi ad chingngor-u kon nangkankantaan na losani parsuwa, wi ingkaw ad langit ya asnay luta, ya losani ingkaw ta fayfay, ya losan akoy ingkaw ta awachan na nan-ootoy. Ad losancha makakankanta wi anancha,
“À siyay tumutùchuy Ali ya sachi Pannilu,
machaychayawchà ing-ingkana ya mifakafakan
kinafarucha ya kinangatucha
ya mannakafalinchà ing-ingkana.”
14 Ad anan chachi opati parsuwa, “Amen!” Ad nampalintumong chachi mangipangpangu wi manayaw.