Efúlii ya eti pakati Israyel ti mah ma miti Esipt
Pakati Esipt kaakallan ka kiteyii pakati Israyel
Ⅰ Ehe ucaw epuuk pikampaani pa pakati Israyel, aŋa nkasok a lompo Jakob, keekaaye ka neyoo Esipt, an óo an niŋ miin ma miteyoo: Ⅱ Ruben, Simeyon, Lewi, Juda, Ⅲ Isakaal, Sepulun, Benjamin, Ⅳ Dan, Nafatali, Gad niŋ Asel. Ⅴ Epuuk ya pakati Jakob niŋ keesokoo púlooŋ maamaa kayema pakan áwii éhaaciil niŋ ŋaasuwan (70).* Tempo Josef Esipt.
Ⅵ Po hátikin, Josef niŋ ñúnuwoo niŋ atuwoo niŋ ekaay ya eteyii púlooŋ nkaket. Ⅶ Fiye pakati Israyel nkapukool nkameeŋ fo muus nkataak sempe, nkámeeŋii pan óo pan ti mah ma.
Ⅷ Sitiil seemeeŋe sipimuus, intaako Esipt amansa éeyeeni éemiit kiti Josef. Ⅸ Naasok pakanoo: “Pakanam, nisincan, pakati Israyel kameeŋaameeŋ nkataak sempe apan kahaŋa unaa. Ⅹ Níkey uwenaa neyii niŋ ecohato, niŋ ekina tom efikahaŋ toko nkameeŋe. Niŋ hikam hitaakiyaa efikananf ti pikamool unaa nkátaakoolan unaa nkakatan mah ma.” Ⅺ Fiye pakati Esipt nkacok pakati Israyel pimiikan, nkamamal pufaasa payenka efikafaasii, nkawufanii páhin peeseeñe kati kakallanii, nkasokii kasiiŋan sisaatee súsupak, Pitom niŋ Ramses, kati siyeno ñileefaan ña ñiti amansa ya. Ⅻ Pale fa nkahaŋ fa nkakancoole neyii fo nkahaŋ nkameeŋe nkahancoolo, eehuu nihiwun pakati Esipt nkahaŋ nkafeye pakati Israyel. ⅩⅢ Nkakallan pakati Israyel nkawufanii páhin peeseeñe: ⅩⅣ páhin óo páhin piti kulut niŋ piti ukit wa. Niŋ oom páhin piti sempe nkakancoole niŋ pakati Israyel nkáhin eloŋ ya eteyii epiyeno eloŋ eti kúnuul.
Amansa ya ati Esipt hisoku ha hiteyoo kamukal miñii mikampaani ma miti Israyel
ⅩⅤ Ti oom caanak, intaak puloŋana pakaal pákasupak pakati Pihiburu pa payenka nkasok Sifula niŋ Puwa. Amansa ya naasokii: ⅩⅥ “Niŋ niyeniyaa kaloŋan pakaal Pihiburu pa, innisincan pinap añii ya. Iyyema cikampaani innimuk co, pale iyyema címaacul innikat co cipiloŋ.” ⅩⅦ Pale puloŋana pakaal paka nkafe Pútuun pa, káhinut eeha amansa ya ati Esipt naasokii ha, nkakat mikampaani ma mupuloŋ. ⅩⅧ Fiye amansa ya naayonkalii naacakanii: “Weyme uwune ínnihin eehe, innikat mikampaani ma mupuloŋ?” ⅩⅨ Puloŋana pa nkañahan amansa ya: “Pakaal paka pakati Pihiburu pa kacukut nii pakaal Esipt. Kataakaataak sempe, nkapukpuk le niŋ efuucol kati uloŋanii.”
ⅩⅩ Fiyuu, pakati Israyel nkahaŋe nkámeeŋii nkataak sempe meemak. Pútuun pa mpíhin heenape ti puloŋana pa. ⅩⅪ Kamma nkafeye Pútuun pa, ekina ewune mpuwunii epuuk. ⅩⅫ Fiye amansa ya naawufan hilim pakanoo púlooŋ: “Niŋ pakati Israyel káfulaa toko, iyyema címaacul, nikat co cipiloŋ, pale iyyema cikampaani inniwant co ti musuu ma miti Nil.”
* Ⅰ:Ⅴ Niŋ ekina tom: “áwii éhaaciil niŋ kaat (75)” samat nii fa inkiicee fa ti Páhin pa piti Pupoñapoñ pa 7:14.