8
A ururop na bulit
1 A Barman na Sipsip i papok ru a ururop na bulit tagun a wonom mawit na bulit, ra sapat una langit kalako ugaia elar nama tulu noino minit.
2 Ra a tama a wonom mawit na ensel ra det ser tur numugu tan o God, ma di pitar tar a wonom mawit nin tuwuru tandet.
3 Ara ensel bulung i wanpat i tur taru nisan a kabulu na tuntun etabor. I pam pas a kap na gol, ra di ser tun a insens uni, a paura ra a misino i sangnain wakak. Di pitar a labino insens tano, ma i tuni sur a etabor. I ubek tomo i nama kum niaring anun a taro rop anun o God una kabulu na tuntun etabor, ra di pami nama gol, sa numugu tan a kiskis na king.
4 In nimis ina insens tomo nama kum niaring anun a taro anun o God i wan gusun a laman a ensel usapat umatan o God.
5 Numur a ensel i ubukus melet pas a kap nama sungun tagun a kabulu na tuntun etabor, ra i woro pirso tari netes una rakrakon bual. A pungpugur, a rurung, in nememe ma a guri det wanpat.
A kum ensel det wup a kum tuwuru
6 Numur a wonom mawit na ensel ra det pam a wonom mawit nin tuwuru det waninar sur det in wup det.
7 A mugano ensel i wup anun in tuwuru, ra a bato na ais i wanpat tomo nama sungun ra di sa pam tomo tari nama gap, ma di woro pirso tari netes una rakrakon bual. Ara kukur tagun a tulu dino tagun a rakrakon bual i kunabor rop. Ara kukur tagun a tulu dino tagun a kum duwai i kunabor rop, ma a kum wuliso rop kai ra i lubung, i kunabor rop.
8 A manru na ensel i wup anun in tuwuru, ra ara utna i elar nama labino tangai ra i kunabor, di woro i usa utasi. Ara kukur tagun a tulu dino tagun a tasi i keles sur a gap.
9 Ara kukur tagun a tulu dino tagun a kum utna ra det laun sa utasi det mat, ma ara kukur tagun a tulu dino tagun a kum sip det iru.
10 A mantul na ensel i wup anun in tuwuru ra in labino nangnang ra i kunabor elar namin nusulu, i puku tagisapat una bakut. I puku netes un ara kukur tagun a tulu dino tagun a kum danim ma a kum matmatano danim.
11 A risan in nangnang ra i Mapak Laulau. Ma ara kukur tagun a tulu dino tagun a kum danim i mapak laulau. Ra a susut na taro ra det inum tagun a kum danim ra, det mat, uni a kum danim ra i mapak laulau.
12 A manwat na ensel i wup anun in tuwuru, ra di rapus ara kukur tagun a tulu dino tagun in matanas, a kalang ma a kum nangnang. Ra ara kukur tagun a tulu dino tagun det i dumirum. Ra kalako talapor un ara kukur tagun a tulu dino tagun arara bung na mirum ma arara bung na waspi kai.
13 Ra a tamtama, a longoro a manigulai ra i ro sapat una maino i kakabo namin labino walngano lena, “In laulau! In laulau! In laulau torom det ra det kis una rakrakon bual, kibino un asau ra milau in nanpat, ra a tulu ensel detul in wup anundetul a tulin tuwuru.”