9
A kisapi na lotu ra i mur a mugano kunubus
1 Una mugano kunubus, a kum warkurai na lotu ma a rumu na sel ra di lotu uni nin upiso.
2 Di utur a rumu na sel ra. A mugano kukur rumu di watungi a nubual ra i Tabu. Kura uni, a turtur ina lam, ma a kabulu, ma a beret ra di etabor nami torom o God.
3 Ma numur tan a manru nin namalu na minabat kutus, ara kukur rumu bulung ra di watungi a nubual ra i Tabu Sakit.
4 Kura una kukur rumu ra, a kabulu ra di pami nama gol, ra di ser tun a paura ra a misino i sangnain wakak, ra di watungi nama insens. Kura kai una kukur rumu ra, a boks na kunubus ra di sa upitapo tar a gol una kum papaporino rop. Ma kura ubalan a boks ra, a kap di pami nama gol, ra a mana i kis tiro ubalano, ma in nubuku anun o Aron ra i sa sibul pat, ma aru wat ra o God i tumus tar a kum Warkurai uni.
5 A wopop bat ina boks ra, a kum tene etabor torom o God det ser lamir a gap sapat uni, sur o God in unus ru a sakino petutna anun a taro. Aru toktok ina ru ukukis kura der netes una boks ra, ra der upuaso a minamarin o God. A kum mebender i rakup bat a boks ra. Ikut uniri awu sur a du bung sur din papalos una kum utna rop ri.
6 Ra di sa waninar rop tar a kum utna una rumu na sel, a kum tene etabor det rukruk ma det pirpirso una kum bung rop una mugano kukur rumu, sur det in pam anundet a pinapam.
7 Ikut ara dino kut una arara kilalo, a mugumugu na tene etabor torom o God, i sot kut, i ser ruk una manru na kukur rumu ra kura urumu. Ken ruk oros, in losi ut a gap, sur in etabor nami torom o God, sur o God in unus ru anun a kum sakino petutna, ma a kum sakino petutna kai anun a taro ra det sa pampam tari ma ka det tasmani.
8 Una kum utna ri a Tokodos na Nion i upuaso i lena, ra a mugano rumu na sel i tur utmakai, a kisapi na rukruk una nubual ra i Tabu Sakit ke papos utmakai.
9 Iri a malalar sur a kum kilalo ri. I kukuraino lena a kum etabor ra ka di tuni ma a kum etabor kai ra di ser tuni, ra di etabor torom o God nami, ka det in gos lar pas in balan taio ra i etabor nami sur in talapor umatan o God.
10 A kum warkurai ri tagun a inangon ma a ininum ma a kum pinapam na gos talapor a taro umatan o God. Det a kum warkurai kut tagun a pinindat. Det tur kut, tuk una bung ra o God i umatok a kum utna.
A gapin o Karisito i gos talapor a taro
11 Ikut o Karisito i sa wanpat. I a mugumugu na tene etabor torom o God ra i warkurai sur a kum wakak na utna ra kuri det mo. I ruk una rumu na sel ra i wakak sakit taun a mugano rumu na sel. Awu sur a taro det pami, ra i talapor lena awu sur tagun a kum ukukis ri una rakrakon bual.
12 Ara dino kut o Iesu i ruk una nubual ra i Tabu Sakit ma ken pam meleti mo. Awu sur i ruk nama gapin a kum meme ma a kum barman na bulumakau sur in etabor nami. I ruk nama gapino ut, ra i kul langolango pas dat. Ma anun a pinapam na kunukul ra, in tur tukum.
13 Di ser lamir a taro nama gapin a meme ma a bulumakau ma a kubus ina toraro na bulumakau, ra di sa tun tari. Di lamir det ra det dur umatan o God, sur det in talapor. A pinapam ra, i elar nama Warkurai anun o Moses, ikut i utalapor a pinindet kut, ma awu sur anundet a nilaun.
14 Ra i lingmulus lena di gos talapor a taro lenra, i lingmulus sakit ra a gapin o Karisito i gos talapor dat! Una dekdekin a Tokodos na Nion ra i kis tukum, o Karisito i pitar tar anun a nilaun torom o God. Anun a nilaun katu dur uni. Ra a gapino i gos talapor anundat a nilaun gusun a kum minat na pinapam ra dat in iru uni, sur dat in papam torom o God ra i laun.
15 I mo ra o Karisito i tur epotor tan o God ma a taro, ra i pam tar a matok na kunubus, sur in dat tomo tar det. I pami sur det, ra o God i sa kabo pas det, det in dan tukum elar nam anun a liliman. O Karisito i mat ra i kul pas det nama gapino. Anun a minat i ulangolango pas det gusun anundet a kum sakino petutna ra det ser pami utuntudu ina mugano kunubus.
16 Ra taio i nemi sur in inanos puaso un osi ra in rakon pas anun a kum ututna ra in mat, in tumus tari un tu dono pepa. Ikut a dono pepa ra, ken gas un tu utna, tuk ra din upuaso i lena a musano ra i sa mat.
17 Katutaio in papam nami ra a musano ra i laun utmakai. Ikut, ra i sa mat, taio in pet lar pasi maragom sur in rakon a kum utna kura una kunubus una dono pepa ra.
18 Lenutra una mugano kunubus di etabor nama gap sur din upuaso i lena a wewegua i mat.
19 Ra o Moses i sa watung rop tar a kum Warkurai tan a taro rop, i los pas a gapin a kum barman na bulumakau ma a kum meme, ra i ubek tomo pasi nama danim. I los pas a kano duwai lik ra di watungi namin isop, ra di sa ker wat tari nama merek na iwu ina sipsip. I puk pasi una gap, ra i lamir a buk na Warkurai ma a taro rop nami.
20 Ma i watungi lena, “Iri a gap, a kunubus ra i dat tomo a taro nam o God, ra o God i kuro tari lena mot in muri.” Kis 24:8
21 Lenkutkai ra, i lamir a rumu na sel nama gap. Ma i lamiri kai a kum utna rop ra det ser papam nami una lotu.
22 A lingmulus, a Warkurai anun o Moses i watungi lena, milau a kum utna rop, din gos talapori nama gap. Ra a gap ken tilingis, o God ken unus ru a kum sakino petutna.
A etabor anun o Iesu i unus ru anundat a kum sakino petutna
23 Din pam soti ut sur din gos talapor a rumu na sel ma a kum utna kura uni, nama gapin a kum wewegua, uni det a malalarin a kum utna kusapat una langit. Ikut a kum utna kusapat una langit, din gos talapor det nama etabor ra i wakak sakit taun a kum etabor taginin upiso.
24 Uni o Karisito ke ruk una nubual ra i Tabu Sakit, ra a taro det pami, awu. A nubual ra, a malalar kut tagun a nubual mulus ra i Tabu Sakit. I ruk usapat ut una langit ma uniri i ser tur umatan o God sur in warut dat.
25 I ruk usapat una langit sur in pitar tari ut sur i a etabor torom o God ara dino kut. Awu sur i ruk lako susut na dino, elar nama mugumugu na tene etabor, ra i ser ruk una nubual ra i Tabu Sakit una kum kilalo rop nama gap ra awu sur a gapino, a gapin a wewegua kut.
26 Ra gunuk o Karisito in pitar tari ut sur i a etabor torom o God una kum kilalo rop, in iru a susut na dino, turpasi ut una turturkibin ina rakrakon bual. Ikut una kum ururop na bung i wanpat ara dino kut. I pitar tari ut sur i a etabor torom o God sur in kamar ru a kum sakino petutna, ma ken pam meleti mo.
27 A taro rop det in mat ara dino kut, ra numur det in tur una warkurai anun o God.
28 Lenkutkai ra o Karisito i pitar tari ut sur i a etabor torom o God ara dino kut, sur in los gisen ru a kum sakino petutna anun a susut na taro. Ma in nanpat melet a manru na dino. Awu mo sur in los gisen ru a kum sakino petutna, awu. In nanpat sur in ulaun pas det ra det kis langlang suri.