4
A tamon na mana anun a taro anun o God
1 A liliman ra o God i uliliman taru nami kuri utmakai, sur dat in ruk una nun a tamon na mana. I mo ra dat in tumarong, sako tu pasamot ken ruk lar pas uni.
2 Uni dat kai dat sa longoro tar a Wakak na Wasiso elar nama kum tumtubun dat tagun numugu. Det longoro tari ut, ikut ke warut det, uni ka det nurnur uni.
3 Dat ra dat sa nurnur, dat in ruk una tamon na mana. Ikut a kum tumtubun dat tagun numugu, ra ka det nurnur, o God i sa watung tari un det lena,
“A kankan ma a liliman lena,
‘Ka det in ruk una nung a tamon na mana.’ ” Sng 95:11
I watungi lenra, ikut i lingmulus, numugu utmakai o God i urop anun a pinapam ra i ukis a rakrakon bual, ra i mana.
4 I sa talapor lenri, uni un ara dino una Buk Tabu i watungi una ururop na bung tagun a wik lena, “A wonom na bung o God i papam, ma una bung numur tano, i mana gusun anun a kum pinapam rop.” Stat 2:2
5 Ma una Buk Tabu ra dat sa luk tari munung, o God i watungi lena, “Ka det in ruk una nung a tamon na mana.” Sng 95:11
6 Det ra det sa longoro tar a Wakak na Wasiso numugu, ka det ruk una nun a tamon na mana, uni ka det mur a wasiso anunu. Ikut a kisapi i papos utmakai, sur lako taro gisen det in ruk una nun a tamon na mana.
7 I talapor lenri, uni a susut na kilalo numur tandet ra ka det mur a wasiso anun o God, o God i wasiso utmakai una nun a tamon na mana. I wasiso una wan o Dewid lena,
“Uniri, ra mot longoro in nalngano,
gong mot udekdek bat a balamot.” Sng 95:7-8
Ra o God i watungi lena “uniri,” i kukuraino lena i sa kubus tar ara bung melet sur a taro det in ruk una nun a tamon na mana.
8 Ra gunuk o Josua i sa pitar tar a mana torom a kum tumtubun dat, ra det ruk una tamon Kenan, o God ken wasiso melet taru un tu bung gisen sur a taro det in ruk una nun a tamon na mana.
9 Lenra, a taro anun o God anundet a mana kura utmakai, elar nama bung na mana anun o God.
10 Uni osi ra in ruk una tamon na mana anun o God, i sa mana gusun anun a kum pinapam, elar nam o God i mana gusun anun a kum pinapam.
11 I mo ra dat in dekdek sur dat in ruk una tamon na mana ra, sur gong taio tandat i puku elar nama taro ra ka det mur a wasiso anun o God.
12 Uni a wasiso anun o God i laun ma i papam. I wangon doko taun in totok na inaim ra aru paporino der wangon. I ruk ra i totok tuk una nubual ra a niondat ma a balandat der etorom iai, ma tuk una nubual ra a kum sur det tugus tomo iai. Ma i kuro a kum nuknuk ma a kum nemnem nin ubalandat.
13 Ra katu utna ra o God i sa ukis tari i parau umatano. A kum utna rop i tur talapor umatano ma katu utna i bakit. Ma numur dat in tur umatano ma dat in watung puaso a kum utna rop ra dat sa pam tatari.
O Iesu anundat a labino mugumugu na tene etabor torom o God
14 Dat in tur dekdek una kum etowo ra dat nurnur uni ma dat ser wasiso puaso uni. Uni anundat a labino mugumugu na tene etabor torom o God, ra i wan usapat una langit, i ra o Iesu, a Nutun o God.
15 I tasmani lena katu dekdekin dat sur dat in winim pas a sakino, ma i maris pas dat. Uni di sa lar mugu tari nama wur ngas na ululam rop lenkutkai ra di ser lar dat nami, ikut ke pam tu sakino petutna.
16 I mo ra dat in nan torom o God, anundat a King, a tene marmaris, ma gong dat ngara. Dat in nan toromi sur dat in utur ukai anun a marmaris, ra in warut dat una nundat a kum mamaut.