Magtubu to tumô to Pol li biɲ Tésalonisiɲêɲê
Kwôlo kôl kwôli magtubu to Pol li hen
Na kiriɲa *ôbi jé Pol ôriɲ kergare tori toɲ ulê béré to têê wôô hen aɲa ôbi ré henaɲ Pilip saɲ Tésalonik a. Ôbi ɗi tô églis kiriɲ bay ka hen niɲba, ôbi wôl ya gaɲ né, wôsa Jubɲê ka mô ya hen na, ka pôni ɗibri iyêre. Aɲ liri wo ôbi hena Tésalonik lew ô Béré (Jé lê bay jé 17: 1-10). Cêgê kiriɲa ôbi na Kworênt menba, megari ôbi jé Timoté era sa uwoɲni aɲ dôri kwôli Tésalonik. Na ôbi á, Pol ré liɲ magtubu tori to tumô biɲ Tésalonisiɲêɲê hen. Na Kworênt a a ôbi ré li magtubu hende to hen biji hen. Bay henê are kôl iyôŋ ba magtubu hende to hen ré na to ca tumô magtubu kêm to yi bô Magtubu Tôô toɲ Biɲare to Kôrbi a hen. Hende liɲ na elê tôre bay cêgi yê Jésu Krist a.
Sapitre 1: 1 - 3:13 na, kwôli Tésalonisiɲêɲê ka Timoté dôriɲ Pol hen na, biri yi derê damaŋ. Ôbi liɲ Emen dosé wôsa bay yi aŋgaɲ gelé biɲ ɓiɲé ka ɗaŋgi ka bô emê bi wo hen a men, ôbi kôl kwôli jé wo ôbi na li naɲ yiri perêrji a hen men, kwôli geyé wo ɗiré erê geléji hen men.
Sapitre 4: 1-12 na, ôbi dôbji ibiyare bôrji a bi bay ré lêŋnê mera ré, niɲba, bay ré ô tumô tumô tô geré ayê bôô woji a. Sapitre 4: 13-5: 11 a na, ôbi uwôlji kwôlê sa kwôlo bay eŋgereri gengiɲ sa jê sé wo ɓiɲé ka ma men, gengiɲ sa hera wo *Krist naɲ damɲare tori hen men. Sapitre 5: 12-28 hen na, ôbi duu kibi magtubu tori naɲ tôô to ôbi ay biji men, liɲji dosé a men.
Magtubu hende to hen na, a jalê bô ka aŋge kwôli aŋga a lê are gerɲé wulê hen. Derêri ba, na wo bay ayê bôô ré gel wo coré na gawrê ka kiriɲ ka peraŋgi aɲ kwo ré gengiɲ sa wulê wo kiyay ba, bay ré ɗi bôrji mega wo wulê bi wo hen ré sa niɲba, kwo tayriri ba, ré na kwôlê wôni ré. Aɲ wulê bi wo hen na, bay ré merê kwôy yôd naɲ Kelma (4: 17).
1
Dosé to Pol liɲ bay ayê bôô ka Tésalonik a
1 Nôbi, Pol naɲ Silas naɲ Timoté a lê magtubu hende to hen béŋge kenbay ɓiɲé ka Ibarna Emen naɲ ka Kelma wona Jésu Krist ka Tésalonik a. Nini lêŋge dosé. Bi bô derê naɲ bô jalê wo Emen baa naɲ ken.
Pol liɲ Emen dosé wô bay ayê bôô ka Tésalonik a
2 Nini liɲ Emen dosé kwôy kwôy wô sarŋge kêm men, kiriɲa nini mô wô uwôlêri ba, nini uwôli wô sarŋge a men.
3 Kiriɲa nini mô wô uwôlê Ibarna Emen ba, nini erem sa jé wo ken li wô kibi ayê bôô woŋge hen men, kwo ken li wô kibi peré wo ken periɲ Emen hen men, wô kibi ɓeré wo ken ɓu bôrŋge iyêre sa aŋga ken ɗi bôrŋge sara tô Kelma Jésu Krist hen a men.
4 Yênêrni, nini hôn wo Emen né peréŋge men, ré terêŋge kené yi kari a men.
5 Wôsa béré Kwôlo Dôri wo nini uwôl hen na, na nini uwôl naɲ kwôlo kibrini a hen mera ré, niɲba, na naɲ néé wo Tunu toɲ hendi bô bôrê. Men, na nini hôn wo béré kwôlo niné iyêl hen, ré na tu kwôlê men, ken hôn hal wo na nini môriɲ perêrŋge a hen a men. Na nini li hen iyôŋ na wô derê woŋge.
6 Men, kenbay ba, ken ay na sa têrni men, sa tê Kelma men. Bi wo ken geliɲ gusiɲ hen kôba, ken ay kwôlo Emen bôrŋge a naɲ yi derê wo Tunu toɲ hendi bô bôrê béŋge hen.
7 Na ôbi á, kené na ari gelé ka dôri ka bay ayê bôô ka Maséduwan a naɲ ka Akay a aɲ bi bay ré liɲ hen iyôŋ men hen.
8 Sa kebreŋge kenbay na, ɓiɲé toy kwôlo gengiɲ sa Kelma. Na sa iyé Maséduwan a naɲ Akay a mera ré, niɲba, kwôli bê bôô woŋge sa Emen a ôm naɲ kiriɲ kiriɲ aɲ kwôlo niɲa hô kelê gengiɲ sari ba, naɲ niɲ.
9 Wôsa bay naɲ kibriji woji dô kwôli ɓeré wo na ken ɓeréni yerŋge a wulê wo na nini ôriɲ iyére toŋge a hen men, kwôli ɗé wo ken ɗéɲ kamrê aɲ ken bul uɲé Emen woɲ tiri woɲ ôbi merê tu geɲ a men hen wô lê jé biri.
10 Men, kené môriɲ gemiɲ Kemari wo ré hena derômaraŋ a hera hen a men. Na Kemari Jésu wo ôbi biri ji si kamɲê hen ôbi a sa derêna bô bô tarê wo Emen wo a era hen.