3
Mousis pilisi Detolo vaitena a miyamiya te natuna waivinina Sepula i naḡi.
Maimaituwa Mousis lisinemo i giu
1 Laḡan ḡemota Mousis botiyana Detolo ena ḡamoḡamo i labelabedi, Detolo ba Midian edi pilisi. Mousis ḡamoḡamo i wai dolidi a nawanawa kalakalaleleḡa eete oya isana Olebimo a tava, Maimaituwa ena oyamo.
2 Ḡome Bada ena aneya i laumaḡata maibena kai vavanina kai tombolunemo. Mousis i kita te kai tomboluna i vavavana bi geḡa te mote kai tomboluna i kalakalati.
3 Mousis noponemo i wainoḡotana gado, “Yà nawa te niga kauwina mote ani tubuḡa bi i tubuḡa, yà kita. Bai aubaina mote kai tomboluna ima kalakalati?”
4 Bada i kita te Mousis i vavanawanawa taunana aubaina Maimaituwa kai vavanina noponemo i giuna gado, “Mousis, Mousis.”
Kamaina bi Mousis i giuna gado, “Oe, tagu niga.”
5 Bi ḡome Maimaituwa i giuwena gado, “Kuma vava natonato, em kaḡesuma kwa kaikamaḡe banina niga doḡa waiyawa dabanemo kwa moimoito.
6 Tagu taunana em magumagula Eiblaḡam, Aisik bi Deikap edi Maimaituwa.” Laḡannemo Mousis niga mai giuna i vaivaiye ba i naila bi matana i wai govegove te mote Maimaituwa ima kita.
7 Ḡome Bada i giuna gado, “Tagu e kita te Idip lavedi egu lava Islael sa laulau kivigebogeboyedi. Tedi edi lau aiyoi e vaiye bi edi wai nuwatoi kaikana e sibe, te bainewa maso taupaula edi babada edi ḡailisimo maso ei yawasanidi.
8 Taunana aubaina tagu e yovo te Idip edi waibadamo yài yawasanidi bi yà nawedi dobu dididiginemo. Bi dobuna ba visuvisuna bi maumaulina yà vitedi. Mba dobuna taunana Keinan, niganana Ḡiti, Amoli, Pelisait, Ḡivait bi Debus lavedi sa miyamiyana.
9 Bi niganana Islael edi ḡaba e vaiye bi Idip lavedi edi laukivigebogebo kaikana e kita.
10 Taunana aubaina niganana yà giugiu kamaḡem, kwa nawa ḡalibona lisinemo bi egu lava Islael lavedi Idip dobunemo kwa kapotiyovodi.”
11 Bi geḡa te Mousis Maimaituwa i giuwena gado, “Bai! Tagu mote bai yà sibe, te maso yà nawa ḡalibona lisinemo bi Islael lavedi Idipmo yà kapotiyovodi.”
12 Bi kota Maimaituwa i giuwena gado, “Tagu vaitem ta nawa. Bi laḡannemo Islael lavedi Idipmo kwa kapotiyovodina, ba temi niga oyanemo ko lauduneyegu. Ḡome kaka kwa sibe kauwe te tagu taunana e giukamaḡem.”
13 Bi Mousis Maimaituwa i giuwena gado, “Laḡannemo yà nawa Islael lavedi lisidimo bi yà giuwedina gado, ‘Emi magumagula edi Maimaituwa i giukamaḡegu lisimimo.’ Bi simai talayegu gado, ‘Tana bainewa isana?’ Te tagu bainewa yà giuwedi?”
14 Bi Maimaituwa Mousis i giuwena gado, “Niga mainana kwa giuwedi, tagu mai miyamiyagu.”
15 Bi kota Maimaituwa Mousis i giuwena gado, “Islael lavedi kwa giuwedi te tagu Bada edi magumagula Eiblaḡam, Aisik bi Deikap edi Maimaituwa, yà giugiukamaḡem lisidimo. Niga taunana tagu isagu ya kena nonoḡa bi tubulelesa matabuna sa noḡotiwata bi sa giuwata.”
Mba taunana mulinemo Mousis i munaḡa nawa Midian, ḡome kaka i nawana Idip.
Idip ḡalibonana Mousis i giuwena gado, “Tagu mote ḡemoḡemotina te bai kwa giugiuwena yà voiye. Tedi kamaina te mai sa noyanoya.”
Taunana aubaina Maimaituwa Idip lisidimo kauwa gebogebodi wapawapa i voiyedi.