18
Detolo Mousis i vakita
1 Mousis botiyana Detolo tana Midian pilisina. Bi i vaiye te Maimaituwa mwali matabuna Mousis bi Islael lavedi aubaidi i voiyedi, laḡannemo Idipmo i kapotiyovodi.
5 Detolo bi natuna waivinina Mousis mwanena natunatuna oloolotodi labu vaitedi a nawa kalakalalelemo Mousis lisinemo, Maimaituwa ena oya pakanemo ḡome Islael lavedi a lau ḡalavu bi a miyamiya.
6 Detolo yaḡolo etamo bi Mousis ena giu i giukamaḡena gado, “Tagu botiyam Detolo, mwanem bi natunatumi labu vaitedi ka natonatona lisimmo.”
7 Mba ḡome Mousis i potiyovo te botiyana Detolo matanemo i laudune bi i waisuluve. Kamaina bi ḡome ai tala vivilana gado, “Tam yawayawasanim, ee?” Kamaina bi palai noponemo a sola nawa.
8 Bi Bada Islael lavedi waiyawasanidi aubaina bi baibaiḡa i voivoiyedina ḡalibona bi Idip lavedi lisidimo, bi kota etamo pilipili a banabanavidi bi Bada i waiyawasanidina taudidi botiyana i tainuwatau
9 Laḡannemo Detolo niga giudi i vaiyedi ba nuwana i visu te Islael lavedi ba Idip edi waibada dibunemo a miyamiyana Bada i kapotiyovodi.
10 Bi i giuna gado, “Bada ta kasaḡesaḡe banina Idip bi ḡalibona edi waibada gabulinemo Islael lavedi tana i kapotiyovodi.
11 Niganana kaka e sibe kauwe te Bada i ḡailisi gulata, mote mai maimaituwa ḡesaudi. Banina Idip lavedi a nuwa saḡasaḡa bi Islael a laulau kivigebogeboyedi bi tana i kapotiyovodi.”
Mousis taulauetala i vinedi
13 Bokina mainana Mousis etala gabunemo i miya saḡa, i lau etala bi lava edi pilipili i kaka didimanidi. Lava ḡome Mousis a moito wai kwaivivili olaolala te i nawa i aubiga.
14 Laḡannemo botiyana Detolo i kita te Mousis bai matabuna lava aubaidi i voivoiye ba i giuwena gado, “Bai aubaina te mba kauwina tam taumḡa lava aubaidi kwa voivoiye? Taumḡa kuna miya bi lava a moito kwaivivilem bi kuna waitalapiliyedina eete suwala i bulu?”
15 Bi Mousis botiyana i giuwena gado, “Niga mainana yà voivoiyena banina lava sa nato lisigumo te Maimaituwa ena ḡowana etana sa sibe kauwe.
16 Laḡannemo lava aimiyataulina ba sa natomedi lisigumo bi Maimaituwa ena waiḡake luvanemo yà kadidimanidi.”
17 Ḡome Detolo i giuwena gado, “Mba mainana kwa voivoiyena mote i visu, mba ya poka kauwem.
18 Niga noyana ba i vita kauwa te taumḡa kwa voivoiye male tam bi lava ya pokemi.
19 Mousis kwai beyavaiyegu bi bai yà giuwemna ba Maimaituwa ya sagum te mainana kwa voiye. I visu te tam lava aubaidi Maimaituwa matanemo kwa moito bi laḡannemo lava edi pilipili sa natomedina lisimmo ba pilipilidi tana kwa vite.
20 Maimaituwa ena waiḡake bi ena eta lava kwai lovelovedi te ena ḡowana luvanemo sa miya bi ena noya sa voiye.
21 Bi kwai laulau kita te olooloto Maimaituwa tauvivilena, nuwanuwauyeuyedi bi lava edi waikitamo ba tedi lava visuvisudi bi mote lava sima nato sima laukaḡesoluḡedi. Mba lavedidi kwa vinedi te lava wapedi 1,000, 100, 50 bi 10 sai badayedi.
22 Bi tedi lava tauetaledi sa tubuḡa bi lava waimiyataulidi edi pilipili sa kadidimanidi. Pilipili keikeilikidi tedi sa kadidimanidi bi nananakidi sa natomedi tam lisimmo. Niga mainana kaka tam sa sagum te em noya ya tekateka.
23 Bamoda niga mainana kwa voiyena ba Maimaituwa ya sagum te noya mote ima pokam. Temi lava edi pilipilimo ko sagudi te ma nuwavisudi sa nawa edi ani miyamo.”
24 Mousis botiyana kalinana i vaiye bi bai matabuna i giugiuwena mainana i voiye.
25 Tana Islael lavedi nopodimo lava nuwauyeuyedi i vinedi te lava edi babada. Tedi lava wapedi 1,000, 100, 50 bi 10 taukitawatedi.
26 Tedi laḡan matabuna lava edi pilipili a kaka didimanidi. Bi pilipili nananakidi ba a nawenawedi Mousis lisinemo bi keikeilikidi ba tedi a kaka didimanidi.
27 Detolo botiyana Mousis i wai ebo bi i munaḡa ena dobumo.