18
Yaga-osiyat si Paulus adto sa Korinto
1 Pagkatapos sinyan pyomanaw si Paulus sikun sa Atin aw kyomadto sang syodad ng Korinto.
2 Ansidto aon kinita nan na Yahodi na taga Pontos na pyagangaanan kang Akilas aw yang kanan asawa na si Pirisila. Baya pa silan yadatung sikun sa Italya kay syogo ni Soltan Klaudiyo na yang kariko ng mga Yahodi apapanawon sikun sa Roma na kapitolyo ng Italya. Ansinyan yagabisita si Paulus adto kanilan.
3 Aw sabap ng mag-onawa silan na tig-inang ng tolda, adto da kanilan paga-uya si Paulus aw yagaka-upud silan sang gawbuk.
4 Na, matag Allaw ng Pagpatana yakadto si Paulus sang pagsasambayangan ng mga Yahodi aw yapagbaaw sang mga otaw ansan. Yapaglalis yan sang mga Yahodi kipat yang mga dili ng Yahodi kay untak silan mangintoo kang Isa.
5 Adon, pagdatung ni Silas aw si Timotiyo sikun sa Makidoniya, waa day lain na ininang ni Paulus yatabiya mag-osiyat ng pyaglaongan ng Tohan aw yagapangimunna yan adto sang mga Yahodi na si Isa agaw yang Almasi.
6 Awgaid syopak nilan si Paulus aw ininsolto pa nilan yan. Agaw tyakdag da ni Paulus yang abog sang kanan dagom silbi tanda na waa day labot nan kanilan aw laong nan, “Kamo da yang bahala kong asiksaun kamo ng Tohan! Awgaid ako, waa day labot ko kamayo. Aw sikun adon yang mga dili ng Yahodi yang paga-osiyatan ko.”
7 Ansinyan pyanawan nan silan aw adto da yan paga-uya sang baay ni Titos Yostos. Yan na otaw dili ng Yahodi awgaid yagasambayang yan sang Tohan. Yang kanan baay masaid sang pagsasambayangan ng mga Yahodi.
8 Na, yang pangoo ng pagsasambayangan na si Krispos yagapangintoo kang Isa kipat yang kariko ng mga otaw na sakop ng kanan baay. Aw madaig pa yang mga taga Korinto na yakadungug sang pyaga-osiyat ni Paulus na yagapangintoo aw yagapasogbo.
9 Na, sanggabi sinyan yagapakita si Tagallang Isa kang Paulus sang pagpananaw nan aw yagalaong yan kanan, “Ayaw pagkalluk awgaid padayona yang pag-osiyat mo. Ayaw pag-ondangi yang pag-indo mo
10 kay ako da yang matabang kammo aw way maskin sino na makapangilabot kammo. Kay madaig pa yang mga otaw adi sini na syodad na ma-inang ng mga sakop ko.”
11 Idto sagaw yaga-uya si Paulus adto sa Korinto sa suud ng sangka toig aw tunga aw yaga-indo yan ng pyaglaongan ng Tohan sang mga otaw.
12 Na, sang wakto na si Galiyo da yang gobirnador sang probinsya ng Akaya, yanagka-oyon yang mga Yahodi sang pagdakup kang Paulus. Pagdakup kanan, dyaa nilan yan adto sang hokomanan aw
13 yagasombong silan kanan adto kang Galiyo, laong nilan, “Yani na otaw yaga-indo sang mga otaw na magsambayang silan sang Tohan sang pama-agi na sopak sang kanatun kasogowan.”
14 Na, magalaong da gao si Paulus, awgaid yagalaong da si Galiyo sang mga Yahodi, “Kamo na mga Yahodi, kong yang pyagasombong mayo adi kanak makapantag sang maat na ininang atawa yang dakowa na dosa, amaningug gao ako kamayo.
15 Awgaid sabap ng yang pyagalalisan mayo makapantag gaid sang mga pyaglaongan, mga ngaan ng mga otaw aw yang sogowan ng agama mayo, kamo da yang bahala san. Di ako magahokom sang mayninyan na mga butang.”
16 Ansinyan pyalogwa nan silan sikun sang hokomanan.
17 Na, adto sa logwa dyakup ng mga otaw si Sostinis na sambok oman na pangoo ng pagsasambayangan aw byonalan nilan yan sa atobangan ng hokomanan. Awgaid maskin maynan yang ininang nilan, pyasagdan gaid silan ni Galiyo.
Byomarik si Paulus adto sa Antiyok
18 Na, si Paulus, yagapabilin pa yan ng pilang allaw adto sang mga yagapangintoo kang Isa sa Korinto. Pagkatapos kyomadto yan sang longsod ng Kinkiriya na yamagad kanan yang magasawa na si Akilas aw si Pirisila. Ansidto yagapakalbo si Paulus kay aon pyasad nan sang Tohan aw idto yang tanda na yatoman da nan yang pyasad nan. Ansinyan syomakay silan sang dakowa na bangka na magapaduug sa Siriya.
19 Na, pagdonggo nilan sang syodad ng Ipisos, biniyaan ni Paulus si Akilas aw si Pirisila kay magapabilin silan adto sa Ipisos. Awgaid si Paulus, kyomadto yan sang pagsasambayangan aw yapagbaaw yan sang mga Yahodi.
20 Ansinyan yangyo yan ng mga Yahodi na magapabilin pa adto kanilan ng pilang allaw, awgaid wa asogot si Paulus.
21 Awgaid pagpanaw nan, yagalaong yan kanilan, “Kong pagbuut ng Tohan, magabarik oman ako adi kamayo.” Ansinyan syomakay yan sang bangka aw lyomayag da yan sikun sa Ipisos.
22 Pagdatung ni Paulus sa Kisariya, pyomanaos yan adto sa Awrosalam untak mangomosta sang jamaa ansan. Pagkatapos, kyomadto yan sa Antiyok sang probinsya ng Siriya.
23 Nang yadogay da si Paulus adto sa Antiyok, pyomanaw da oman yan. Byomarik yan adto sang yagakatuna-tuna na mga banwa sang probinsya ng Galatiya aw Pirigiya kay untak pabagsugun nan yang pangatayan ng mga yagapangintoo kang Isa.
Si Apolos adto sa Ipisos aw sa Akaya
24 Na, sidto na wakto aon sambok na Yahodi na taga Iskandariya na yadatung sa Ipisos. Yang ngaan nan si Apolos. Madyaw yan mag-indo aw maum yang pagpangadi nan sang Kitab.
25 Yani si Apolos, aon yaga-indo kanan makapantag kang Tagallang Isa. Awgaid yang kyatigaman nan taman gaid sang pyaga-indo ni Yahiya na yang mga otaw dait magtawbat aw magpasogbo. Awgaid maskin maynan, iklas yang pagpayapat ni Apolos makapantag kang Isa aw bunna yang pyaga-indo nan.
26 Yagasogod da yan mag-indo adto sang pagsasambayangan na wa yan akalluk. Adon, pagdungug ni Akilas aw si Pirisila sang pyaga-indo nan, pyaga-agad nilan yan adto sang kanilan baay aw pyatigam nilan kanan yang wa pa nan akatigami makapantag kang Isa aw monono yang pama-agi ng Tohan sang paglowas ng manosiya.
27 Ansinyan nang yamallini si Apolos pomanaos adto sa Akaya, tyabangan yan ng mga yagapangintoo kang Isa adto sa Ipisos. Syoratan nilan yang mga yagapangintoo adto sa Akaya untak tarimaun nilan si Apolos ng madyaw. Na, pagdatung ni Apolos adto, dakowa yang tabang nan sang mga otaw na yagapangintoo kang Isa sabap sang looy ng Tohan.
28 Yakatabang sagaw yan kanilan kay sang papaglalis nan sang mga Yahodi sa atobangan ng kadaigan na mga otaw yatalo nan silan. Kay pyangimunnaan nan kanilan sikun sang yakasorat sang Kitab na si Isa agaw yang Almasi na pyasad ng Tohan.