5
Yang Pagpakadyaw ng Kanatun Relasyon adto sang Tohan
1 Agaw adon, tyatarima da kita-kamo ng Tohan na matorid sabap sang kanatun pagpangintoo aw pyapakadyaw yang kanatun relasyon adto kanan sabap sang ininang ni Isa Almasi na kanatun Tagallang.
2 Sabap kanan yakadood kita adto sang Tohan, aw sabap sang kanatun pagpangintoo yakadawat kita sang looy ng Tohan aw matorid da kita sang pagtanaw nan. Agaw, dakowa da yang kasowat ta kay aon kanatun kasigorowan na amakasawit kita sang kabantog ng Tohan adto sang sorga.
3 Awgaid yamasowat oman kita kong adatungan kita ng mga kasikotan kay sabap sang mga kasikotan matigam kita magsabar.
4 Na, kong matigam da kita magsabar, idto yang tanda na matigsun yang kanatun pagpangintoo. Aw kong matigsun da yang kanatun pagpangintoo, makasigoro kita na amakasawit kita sang kadyawan ng Tohan adto sang sorga.
5 Yamakasigoro sagaw kita na amadawat natun yang tyatagadan ta na kadyawan kay sabap sang Nyawa ng Tohan na yatag nan kanatun kyakatigaman natun sa suud ng pangatayan ta na yamalooy yang Tohan kanatun.
6 Dumduma da gaid mayo daw ono yang kadakowa ng looy ng Tohan kanatun. Kay sangaon way amainang ta antak malowas kita sikun sang mga dosa natun. Awgaid sang wakto na pyagakahanda ng Tohan yagapakamatay yang Almasi para kanatun na mga baradosa.
7 Mairap da gani magpakamatay para sang otaw na matorid. Awgaid para sang otaw na madyaw, basin aon otaw na andam magpakamatay.
8 Awgaid yang Almasi yagapakamatay para kanatun-mayo sang wakto na baradosa pa kita. Aw sang mayninyan na pamaagi pyapakita ng Tohan daw ono yang kadakowa ng looy nan kanatun.
9 Na adon, kay tyatarima da kita-kamo ng Tohan na matorid sabap sang dogo ni Isa Almasi na yoboos sang pagkamatay nan, makasigoro kita na amalowas kita sikun sang kadaman ng Tohan sang Allaw na Maori sabap kang Isa Almasi.
10 Kay sangaon na mga kalaban pa kita ng Tohan pyapakadyaw yang kanatun relasyon adto kanan sabap sang pagkamatay ni Isa Almasi na kanan Anak. Aw adon, sabap ng madyaw da yang kanatun relasyon adto kanan, makasigoro sagaw kita na amalowas kita sikun sang madatung na siksa sabap ng yamabowi oman si Isa Almasi.
11 Aw dili gaid inyan, awgaid yamasowat oman kita kay maskin adon kyakaonan da kita ng madyaw na relasyon adto sang Tohan sabap sang ininang ni Isa Almasi na kanatun Tagallang.
Si Nabi Adam aw si Isa Almasi
12 Sangaong ona yagpakadosa si Nabi Adam, aw idto yang pagsogod ng pagpakadosa ng manosiya. Aw yang pagpakadosa nan yagadaa oman ng kamatayun sang manosiya. Agaw sagaw, yang kariko ng manosiya adatungan ng kamatayun kay yang kariko nilan yagapakadosa.
13 Kay maskin sang panahon na wa pa atagan ng Tohan yang Hokoman yagapakadosa da yang manosiya. Awgaid yang dosa nilan di matawag na sopak kay waa pay Hokoman sidto na panahon.
14 Awgaid maskin maynan, yang kariko ng mga otaw yamangkamatay sikun sang panahon ni Nabi Adam sampay da sang panahon ni Nabi Mosa maskin yang dosa nilan dili ng magonawa sang dosa ni Nabi Adam na yosopak sang sogowan ng Tohan. Adon, si Nabi Adam aw yang Almasi na yosonod kanan domatung, aon pagkaonawa nilan kay yang ininang nilan aon resulta para sang kariko ng manosiya.
15 Awgaid dakowa yang pyagabidaan ng resulta sang ininang nilan. Kay yang kaamponan na atag ng Tohan dili ng magonawa sang dosa na ininang ni Nabi Adam. Kay kong adatungan ng kamatayun yang kariko ng manosiya sabap ng yosopak sang Tohan yang sambok na otaw na magonawa ni Nabi Adam, labaw pa sinyan na amadawat ng manosiya yang looy aw kaamponan ng Tohan sabap sang ininang ng sambok na otaw na magonawa ni Isa Almasi.
16 Na, aon oman isa na pyagabidaan sang atag ng Tohan aw yang dosa na ininang ni Nabi Adam. Kay sabap sang sambok gaid na dosa na ininang ni Nabi Adam pyagahokom da yang kariko ng manosiya na isiksaun. Awgaid tuna yang atag ng Tohan. Kay maskin madaig da yang mga dosa ng manosiya, amponon silan ng Tohan aw atarimaun nan silan na matorid.
17 Na, makita da natun na sabap sang dosa ng sambok na otaw na magonawa ni Nabi Adam yang kariko ng manosiya dait matay. Awgaid labaw pa sinyan yang resulta ng ininang ng sambok na otaw na magonawa ni Isa Almasi. Kay sabap kanan, sino-sino yang yatarima sang dakowa na looy ng Tohan aw sang kaamponan na atag nan, amabowi taman sa taman aw amakaupud kang Isa Almasi sang pagdato nan.
18 Idto sagaw, sabap sang dosa na ininang ng sambok na otaw na magonawa ni Nabi Adam yang kariko ng manosiya pyagahokom ng Tohan na isiksaun. Magonawa oman sinyan, sabap sang matorid na ininang ng sambok na otaw na magonawa ni Isa Almasi atarimaun ng Tohan yang manosiya na matorid aw atagan nan silan ng kinabowi na way kataposan.
19 Kay sabap ng yosopak sang pyaglaongan ng Tohan yang sambok na otaw na magonawa ni Nabi Adam, yang kariko ng manosiya yamainang ng baradosa. Magonawa oman sinyan, sabap ng yamangagad sang Tohan yang sambok na otaw na magonawa ni Isa Almasi, amponon ng Tohan yang manosiya aw atarimaun nan silan na matorid.
20 Adon, yatag ng Tohan yang Hokoman antak makita ng mga manosiya na yosopak silan kanan. Awgaid pagkatigam da nilan sang Hokoman, yagakadaig pa yang mga sopak nilan. Awgaid maskin yagakadaig yang dosa ng manosiya, labaw pa sinyan yang looy ng Tohan kanilan.
21 Idto sagaw, yang kariko ng manosiya yamasakop sang kamatayun sabap sang mga dosa nilan. Awgaid sabap sang looy ng Tohan atagan silan ng kinabowi na way kataposan kay amponon silan ng Tohan aw atarimaun nan silan na matorid sabap sang ininang ni Isa Almasi na kanatun Tagallang.