Kalagan Roma 10

1 Mga kalomonan ko, dakowa yang karim ko na yang mga kapagonawa ko na Yahodi amalowas aw amasorga. Aw yan sagaw yang pyapangayo ko sang Tohan. 2 Makapangimunna ako na baraibada silan, awgaid yang pagpangagad nilan sang Tohan wa magasobay sang insakto na pamaagi. 3 Kay wa silan akatigam daw ono yang pamaagi ng Tohan na amponon aw atarimaun nan yang manosiya na matorid. Sabap sinyan ininang nilan yang sarili nilan na pamaagi, aw wa silan apangagad sang pamaagi ng Tohan. 4 Wa silan akasabot na sabap sang Almasi yamatoman aw yamatapos da yang Hokoman.* Agaw, sino-sino yang yamangintoo kanan amponon ng Tohan aw atarimaun nan na matorid.

Yang Kalowasan para sang Kariko ng Manosiya

5 Maynini yang syosorat ni Nabi Mosa makapantag sang mga otaw na amainang ng matorid sabap sang pagpangagad sang Hokoman, laong nan, “Sino-sino yang motoman sang kariko ng mga sogowan sang Hokoman, amabowi.†” 6 Awgaid maynini yang yamakasorat sang Kitab makapantag sang mga otaw na amainang ng matorid sabap sang pagpangintoo, laong nan, “Ayaw kamo magdumdum na kinaanglan na aon komadto sang sorga,” mana nan antak pakaniun yang Almasi. 7 “Ayaw oman kamo magdumdum na kinaanglan na aon komawas adto sang saad ng lopa,” mana nan antak kamangun yang Almasi sikun sang mga patay. 8 Kay yamakasorat sang Kitab, “Yang Pyaglaongan ng Tohan masaid kanmo kay iyan yan sang baba mo aw sang pangatayan mo.”‡ Na, yan na pyaglaongan yang makapantag sang pagpangintoo kang Isa Almasi, aw idto yang pyagaosiyat nami. 9 Kong magalaong kaw na si Isa yang Tagallang, yang Dato na Labi na Mabarakat, aw iklas yang pagpangintoo mo na byobowi oman yan ng Tohan, amalowas kaw sikun sang mga dosa mo aw amasorga kaw. 10 Kay amponon aw atarimaun ng Tohan na matorid yang sino-sino na iklas yang pagpangintoo nilan. Aw sabap sang paglaong nilan na yamangintoo silan, amalowas silan. 11 Kay yagalaong yang Kitab, “Sino-sino yang yamangintoo kanan, di akasipugan.”§ 12 Yani na pasad para sang kariko ng manosiya, Yahodi aw dili ng Yahodi, kay way pyagabidaan nilan sang adapan ng Tohan. Sambok gaid yang Tagallang ng kariko aw yamatag yan ng kadyawan sang maskin sino na yamangayo-ayo kanan. 13 Kay yagalaong oman yang Kitab, “Sino-sino yang yagasampit sang Tagallang, amalowas.”*

14 Awgaid monono da yang pagsampit nilan sang Tagallang kong wa silan apangintoo kanan? Aw monono da yang pagpangintoo nilan kanan kong wa silan makadungug ng makapantag kanan? Aw monono da yang pagkadungug nilan kong way magapayapat kanilan? 15 Aw monono da yang pagpayapat ng mga otaw kong way syosogo? Awgaid aon mga syosogo ng Tohan kay aon yamakasorat sang Kitab na yagalaong, “Madyaw yang pagdatung ng mga yagapayapat ng Madyaw na Gogodanun.”†

16 Awgaid dili ng kariko ng mga otaw yadawat sang Madyaw na Gogodanun. Kay yagalaong si Nabi Isayas sangaon, “Ya Tohan, tagbi gaid yang mga otaw na yamangintoo sang pyapayapat nami.”‡ 17 Awgaid maskin maynan, makapaglaong kita na amangintoo yang mga otaw kong madungug nilan yang Madyaw na Gogodanun. Aw antak madungug nilan yang Madyaw na Gogodanun kinaanglan na aon yagapayapat kanilan ng makapantag sang Almasi.

18 Na, aon pagaosip ko kamayo. Yang mga bangsa Israil na wa apangintoo sang Almasi, wa silan makadungug ng makapantag kanan? Yakadungug silan! Kay aon yamakasorat sang Kitab na yagalaong,

“Yang sowara ng mga magpapayapatay yamadungug sang kariko ng mga banwa.

Yang pyaglaongan ng Tohan pyapayapat sang tibok donya.”§

19 Magaosip oman ako, “Basin wa silan makasabot sang dyudungug nilan? Na, di mapakay na wa silan makasabot! Kay aon syosorat ni Nabi Mosa na pyaglaongan ng Tohan makapantag kanilan, laong nan,

“Amasina kamo sang mga otaw na dili ng sakop ko.

Amadaman kamo sabap ng apakita ko yang looy ko sang mga dili ng Yahodi na wa ikilaa kanak.”*

20 Aw wa oman akalluk si Nabi Isayas maglaong daw ono yang pyaglaongan ng Tohan makapantag sang mga dili ng Yahodi, laong nan,

“Kinita da ako ng mga otaw na wa amanganap kanak.

Aw maskin wa silan magaosip makapantag kanak, pyapakatigam ko kanilan daw sino ako.’ ”†

21 Awgaid makapantag sang mga bangsa Israil yani yang pyaglaongan ng Tohan na syosorat ni Nabi Isayas,

“Sang kadogay ng panahon yagatagad ako na modood silan kanak.

Awgaid matigas yang oo nilan aw wa silan apangagad kanak.’ ”‡

* 10:4 10:4 Yang mana sini na pyaglaongan na sabap sang Almasi yamatoman aw yamatapos yang Hokoman na disti sang pagdatung ng Almasi aw sabap sang pagkamatay nan para sang dosa ng manosiya, yamaklaro na yang pagpangagad sang Hokoman dili ng pamaagi antak tarimaun ng Tohan yang manosiya na matorid. † 10:5 10:5 Yani na ayatan yamakasorat sang Kitab Tawrat, Pangibada 18:5. ‡ 10:8 10:8 Yani yang yamakasorat sang Kitab Tawrat, Pangagama 30:14. § 10:11 10:11 Yani yang yamakasorat sang Kitab Tawrat, Nabi Isayas 28:16. * 10:13 10:13 Yani yang yamakasorat sang Kitab Tawrat, Nabi Yowil 2:32. † 10:15 10:15 Yani yang yamakasorat sang Kitab Tawrat, Nabi Isayas 52:7. ‡ 10:16 10:16 Yani yang yamakasorat sang Kitab Tawrat, Nabi Isayas 53:1. § 10:18 10:18 Yani na ayatan yamakasorat sang Kitab Jabor 19:4. * 10:19 10:19 Yani yang yamakasorat sang Kitab Tawrat, Pangagama 32:21. † 10:20 10:20 Yani yang yamakasorat sang Kitab Tawrat, Nabi Isayas 65:1. ‡ 10:21 10:21 Yani yang yamakasorat sang Kitab Tawrat, Nabi Isayas 65:2.