4
Pagpasakop kamo sang Tohan
1 Na adon, makapantag sang pagtanam aw paglalis mayo, ono kadi yang pyagasikunan sinyan? Di ba yagasikun yan sang kamayo maat na napso na yagasatsat sang dumduman mayo?
2 Kong aon mga butang na kallini mayo awgaid di mayo maangkun, na, karim da kamo magpatay ng otaw. Yagasilos kamo, awgaid kong di mayo amakamang yang kyakallinian mayo, managtanam kamo. Na, di mayo amangkun yang kyakallinian mayo kay wa kamo amangayo adto sang Tohan.
3 Aw maskin amangayo kamo, di oman kamo atagan kay dili ng madyaw yang niyat mayo. Kay yamangayo gaid kamo antak mayo makamang yang kallini mayo.
4 Astaga! Bibiyaan da mayo yang Tohan na magonawa ng bobay na yagabiya sang kanan bana kay yagaagad da sang tuna na usug. Wa ba mayo akatigami na kong palabiun mayo yang mga butang adi sining donya, mosopak kamo sang Tohan? Kay sino-sino yang yagapalabi sang kadodonya na mga kallini, kalaban yan ng Tohan.
5 Awgaid basin yagadumdum kamo na dili ng bunna yang pyagalaong sang Kitab na kita na manosiya abay gaid masina aw magpadaa sang kanatun napso.
6 Awgaid dakowa yang looy aw tabang ng Tohan kanatun kay aon oman yamakasorat sang Kitab na yagalaong,
“Kontra ng Tohan yang mga otaw na magpataas ng ginawa nilan,
awgaid akaloyan nan yang sino-sino na magpababa ng ginawa.”
7 Agaw, pagpasakop kamo sang Tohan. Labani mayo yang Saytan kay kong maynan, magapakawat yan kamayo.
8 Pagdood kamo sang Tohan kay modood yan kamayo. Kamo na mga baradosa, biyai mayo yang maat na mga inang mayo. Kamo oman na yagadowa-dowa, iklasa mayo yang pangatayan mayo adto sang Tohan.
9 Pagmaatay kamo aw pagtiyao sabap sang mga dosa mayo. Ayaw da kamo magkasowat kondi pagkarido kamo aw kambiyowi mayo ng pagtiyao yang pagikul mayo.
10 Pagpababa kamo ng ginawa mayo sang adapan ng Tagallang kay apataasun nan kamo.
Ayaw kamo Maghokom sang Kapagonawa mayo
11 Mga kalomonan ko, ayaw kamo maglaong ng maat makapantag sang matag-isa. Kay sino-sino yang yagasaway sang lomon nan atawa yagahokom kanan, syasaway oman nan yang Kasogowan ng Tohan. Na, kong sawayun mo yang Kasogowan, mana nan na wa kaw apangagad sinyan kondi ikaw da yang yagahokom daw wain yang madyaw.
12 Awgaid sambok da yang yamatag ng Kasogowan aw sambok da yang maghohokom, yang Tohan. Yan gaid yang amakalowas aw amakasapad sang manosiya. Awgaid ikaw, way kapatot mo maghokom sang kapagonawa mo.
Maat yang Pagpaambog
13 Adon, paningug kamo kanak, kamo na yagalaong, “Adon atawa kisuum makadto kami sang sambok na banwa. Magauya kami disidto ng sangka toig aw maganegosyo kami antak kami makasapi.”
14 Monono kamo makapaglaong sinyan na wa gani kamo akatigam daw ono yang amainang kisuum? Di kamo dait maglaong sinyan kay yang kamayo kinabowi ansining donya magonawa gaid ng ubul. Yang ubul ikitaun ng madari gaid, pagkatapos, waa da.
15 Agaw sa, yani gao yang dait mayo paglaong, “Kong kahanda ng Tohan aw bowi pa kami, yani atawa yan yang inangun nami.”
16 Awgaid ono yang ininang mayo? Yagapaambog aw yagapasibantog gaid kamo aw yan na ininang mayo maat.
17 Agaw, yang otaw na yamatigam ng madyaw na dait nan inangun awgaid di nan inangun, na, makadosa da yan.