89
God Teria Bekáda Fakina Inono Beká Ainda Gekari. Natofo Da Bouvu Mema Sifoda Yaru Divari
1 Arie Bajari, ni evovodae na dubo buraesa aindae, nimokena yaru didivuse irarena.
Ninda beká gajari namokena isambu eraesa aindae, osa sarena.
2 Na kasama erena ninda dubo bari evovodae irira.
A ninda sari bekava nembori jo dombu eni ae arira, kau utu fakinaé fetirira aminga ava evovodae irarira.
3 Ni sisesi, “Na genembo eni gategedo nangae tofo tofo beka gagojuseri.
Nanda saramana kato David kena beka gagojuse eminge siseni,
4 ‘Ninda imendi gamendiimi evovodae kini nene edo gharera.
Na evovodae nine kini edo irari da vasa ava kaifa ururono irarira jo eniimi bae arera’ ”.
5 Tano fakina ghae garigo beká eraesa aindae ninda natofo aneya utuda irera aimi yaru divuraera.
Bajari, ninda sari isambu kaifa udo refesa aindae, ninda aneya kakarago osa sise yaru divuraera.
6 Bajari, mave utuda irera amo, jo nimongo iraeri. Aneya mane utuda irera á jo nemonde fitoro inono ari iraeri.
7 Aneya da giti jighari kakato totorugedo irera isambu, nindae oju eraera.
A mave ni jimbe birurughe fetirágheraera aimi, isambu nindae oju eraera.
8 Bajari, God Fakina Isambu da Tofo, ninda fakina ava jo enií ghae inono arigo iraeri.
Evovodae ni reava seraesa ava aminge eoso siroreraira.
9 Karaje fakina kato emo ninda sari ningariri. Eva anje foa gheraira, nine seaso binono eraira.
10 Ni eva da gambauva nombua teria ava nine deteso ambududurusira.
Ninda fakina aimi gitofu de atai duboda fafotusesi.
11 Utu a enda amo ninda tofori. Utu gambari utu gambari aminda reju irera ava, nine eteso sirorusira.
12 Reighi utu gambari utu isambu ninda fitariri.
Doriri Tabor nengae Hermon ghae ivuga use nimokena yaru divuraera.
13 Ni fakinago bekári! Ninda fakina mo, tomanako bekári!.
14 Ni geka bekáda bekáda sise ari bekáda bekáda use irágheraesa aindae,
ninda avo anumba fete gogoghombedo irira.
Ni rea eraesa aimi ijugeraira, dubo bari kato nimori, a kotugo ni rea seraesa ava eoso beká siroreraira.
15 Evetu genembo mave ninda dombuda usasa jokáda deinghuse,
nindae yaru divu fumbu aruguse tumonde baingheraera, ne ivuga use irarera.
16 Nindae sise ne sifo ghousa evia ivuga eraera. Ninda kavevera aindae sakai sise ninda javo jighioro ereraira.
17 Tataya sifoda namane sonembeoso gitofo de atai fati feteraera.
Ninda dubo bari tomanako bekáimi namane sonembeaso gitofu fakinago ava dedo gaedo gherera.
18 Arie Bajari, namane kaifa arida genembo ava, nine gategusesi.
Namane Israel emboda God kakara nimori. Namane da kini (king) ava nine gatege futusesi.
God Rea David Kena Ari dae Sise, Beka Gagojusira, Amo Eviri.
19 Anakora beka saramana kakato ninda sari ava edo ghusera aikena, eminge sisesi,
“Na isoro embo binonde eni Israel embo jokáda ghe gatege sonembuse, numo kini are dae siseni.”
20 Nanda saramana kato David ava, usu kakarai jijighuse eteno, kini (king) usira.
21 Nanda fakina evovodae numokena irarira, nanda fakina aimi sonembururari nu fakina edo fetarira.
22 Gitofu numo dari dae arera amo, nu jo dae arera.
Ari ekoko embo nemonde tataya arera amo nu jo dedo atai fati fetae arera.
23 Nunda gitofu nane daono sirivo e tefo arera, a mave nu imboe eraera, ábarago daono amomonje garera.
24 Na nu dubo ruruse, rea nundae sisena ava, jo kotae edo gharena.
Amingururono, nu evovo dae sosighi use, fati fetedo gharira.
25 Nunda enda mutarena amo, eva Mediteranian seraera,
aminda ghe ya, uvu tomanako Eupharates seraera, aminda tano arira.
26 Nu nandae eminge sarira, “Nanda God a afa mo, nimori.
Ni nanda gagara a sonembari katori.”
27 Nu nanda mandi bego dae barena. Kini mane nanjogo irera, einda jokáda kini tomanakogo beká nune arira.
28 Na numokena beka gagojusena ava evovodae ava udo yarena, a nanda agho dari reava usena,
amo evovo dae irarira.
29 Nunda sasingu reighié nene kaifa udo yarera.
Utu evovodae irá gheraira aminga ava, nunda imendi gamendi nene kini udo yarera.
30 “Avata, nunda imendi gamendi nanda agho dari imboe use, nanda agho dari jo amboda amboda ae arera.
31 A nanda ijuga gukai mutudo, nanda agho dari jo kaifa ae arera amo,
32 avori, nenda ari eko dae na ne daono ghamo barera, a nenda kosasadae bouvu mutono, nene barera.
33 Avata nanda dubo bari David kena jo nanjigo tano ae arira. A na beka rea ava gagojusena amo jo bejae arena.
34 Na agho reava nangae dabade sise dorusera, ainda geka da mendó eni jo kote doyae arena.
Na beka gagojuse rea sisena, ainda geka eni jo kosasaghaono durae arira.
35 Nanda javo kakaragoimi javono tofo gatise, beka gajeteno fetedo evovodae irarira.
Na jo sifo nanjigo aminda David kena gungubo sae arena.
36 Nunda imendi gamendi evovodae sirorudo yarera.
Nunda natofo kaifa ururono, iji janimbuse irá gheraira aminga ava ne kini udo yarera.
37 Tambuno evovodae irira amingudo yarira. Utu evovodae irira, aminga ava kini (king) udo yarera.”
Nenda Kini Gitofuimi De Atai Duboda fafotusera, Aindae God Da Dombuda Sorara Useri.
38 Avata ninda kini gategusesa aikena dubo ekoko edo, nu imboe use, gukai muteso, nusuka fetetira.
39 Ninda saramana kato ghae rea ava tofo tofo beka gagojuseva ava, nine bejedo,
nunda kini (king) da gogho kekesa avavaga bu fugeteso, fororoda du fasetira.
40 Nunda bogu begaya furu dighi birurughusera ava, ninda fakina aimi de bejisesi.
Nunda isoro embo da jungari vasa isambu barago nine de bejeteso, bununughuseri.
41 Amingetiri, aminda mave ya fa gheraera aimi nunda gugua bagia eraera,
a oro mendeni tinguda iritirera, aimi nundae gegha jiraera.
42 Ni sonembeteso, gitofui nu dedo atai duboda fafotuseri. Amingeteso, ne isambu ivuga useri.
43 Nine eteso, nunda ambi goroba mendo baumba usira.
Ni ungo sokinimbeteso, gitofuimi isoroda nu de duboda atai fafotuseri.
44 Aminguse, nunda kini da kotofu ungo jighari, kefata avavaga ava saghimbe bu babaregusesi.
Nunda kini da avo anumba barago jighi rokombeteso du fasusira.
45 Nine bouvu futeso, nu genembo seka ava, nunda sifo jo buvae iriri totoi embako usira.
Amingedo, meka gosuse irira.
God Ne Nange Sonembaetira, Aindae Banungusira.
46 Arie Bajari, ni redae evovodae na gi gagaerego eraesi? Junge iraresa ai?
Ninda dubo ekoko ghousa mavega ava avaraka avariguse irari? Gi gagaerego eraesi.
47 Nanda jebuga tufako beka erira, ava kotaetesi!
Namane endada evetu genembo isambu nine eteso siroruseri, ava kotaso dae resena!
48 Mave jo ambae jebuga irari? Namane evetu genembo eni jo uje da fakina darigae arera.
49 Arie Bajari, ni giti namane dubo budo ghusesa da beká oroko redari?
A ni David kena beka gagojuse sonembari sisesa, ábarago redari?
50 Ninda saramana kato namori. Nandae jijivu sisera ava, erá kotae eose!
Gitofui nandae jijivu sisera ava na gambu tainghuse irena.
51 Arie Bajari, ninda gitofui kini nine gategusesa, aindae jijivu sise “nimoá” seraera.
Nu reda ya foa gheraira aminda, ne aminge seraera.
52 Bajari da javo evovodae jighoro erarira! Ai bekári, Ai bekári.