53
Mave God Ighagha Arira Aikena Mo, Kotari Tefori.
1 Mave “God tefo” kotarira amo, nu gogovara ai sari garira.
Evetu genembo avavaga nenda dubo joká bebeta edo irera.
Nenda ari isambu foká da kaugori. Eniimi jo ari eveva ae eraira.
2 God utuda irise, evetu genembo fuge gosuse, evetu genembo dubo kotise,
numoa tumonde baingheraera ava, tava eraira.
3 Avata ne isasambu emboro kosasaghedo ari ekoko eraera.
Ne totofo bebeta edo irera.
Jo dabakoimi ari eveva ae eraira,
eniko tefo bekári.
4 God resira, “Ari ekoko embokena kotari tefori.
Ne nanda natofokena bagia use, namokena jo banungae eraera.”
5 Giti ne jo oju ae, avata ne amboda ghamo takegha arera.
Giti amingo ava jo itatama aeri.
Ai resira amo, God nunda natofo Israel embo da gitofu ava dari sirivu aoro,
nenda etu bu mainge mainge arira.
Bajari anakora ne imboe use,
gukai futusira, ágido, Israel embo eredo,
ne de atai fati fetarera.
6 Arie, jebuga Saion ghedo foa Israel embo kena sirorare!
God nenda ati ghayafa sekago mutari barera amo,
Jacob da imemesiri, Israel embo, isasambu ivuga use irarera.