135
God Dae Sakai Sari Yaru Eniri.
1-2 Bajari dae sakai saore! Bajari da saramana embo nunda kambo jokáda fetireva,
nunda Tafaroro Kamboda dendegu aminda ireva, nendae resena. Bajari da javo jighivu, erare!
3 Bajari kavevera kato, ágido nundae sakai saore! Numo evevagori, ava sedo nunda javo jighoro erare!
4 Ai resira, Bajari Jacob ava gategusira. Natofo Israel embo ava nunda tofo aoro dae rurusira.
5 Na kasama erena, Bajari namonde tumonde baingheraera, nu teriari. Eini numongo tefori.
6 Nu nusuka nunda uju rea koteraira, utuda kotugo endada, eva jokáda kotugo kafuru duru bekáda ava eraira.
7 Nune eari, utu gambari utu gambari aminda borija da foroga dariraira, nune eari, biria tarighuse, borija diraira.
Kotugo nune yaura nunda serukuda afigeari buvu ya foa gheraira.
8 Egypt aminda bebego sirorusera ava, evetu genembo kotugo sino fukade dabade, isasambu detiri sirivuseri.
9 Kotugo, Egypt aminda nenda kini nunda kokotofude ari ghamo baore dae use,
nunda tano kotugo ari gae gitida ava, ijugedo ghusira.
10 Nune oro mendeni mendeni titighedo, kotugo nenda kini fakina kakato detiri sirivuseri.
11 Sihon, Amorite embo da kini, Og, Bashan da kini,
kotugo Kainan embo da kini mane iritiriara isambu detiri sirivuseri.
12 Nune kini mane einda enda isambu nunda natofokena futusira, nunda natofo Israel embokena futusira.
13 Arie Bajari, ninda binó evovodae irarira, ninda binó evovodae sise irarera.
Evetu genembo sifo amboda sirorudo yarera, ni jo bunae arera.
14 Ai resira, Bajari, nunda natofo sonembuse, nenda vara nune jifegarira. Nunda saramana embodae joka arira.
15 Oro mendeni mendenida god mane ove nu genembori, siliva (silver) kotugo goldi (gold) imi ariri.
Evetu genemboimi ungoi eraera.
16 Ne beka ghaeri, avata beka jo sae eraera. Ne diti ghaeri, avata jo gae eraera.
17 Ne dengoro ghaeri, avata jo ningae eraera. Ne janje itatako jo asegae eraera.
18 Nanda uju evetu genembo mave god gungubo ove mane eraera,
kotugo evetu genembo mave nenda tumondari ove god gungubo aikena fitiraera amo,
ove god gungubo ainda kakaugo aminga ava aeteri.
19 Bajari dae sakai sevu! Israel embo nundae sakai sevu! God da fristi mane, nébarago nundae sakai sevu!
20 Ne Levi ondi, Bajari dae sakai sevu! Mave nundae igheghi use,
numoa tumonde baingheraeva barago, nundae sakai sevu!
21 Bajari dae sakai sevu! Ne mave Saion ireva, nunda irari vasa Jerusalem aminda ireva, nemokena resena.
Bajari dae sakai sevu!