8
8:1-3 Evevetu Mendeniimi, Iesu Nunda Ambo Jimbide Ava Tavo Edo Ghuseri.
1-2 Ainda amboda, Iesu ya reighi mendeni mendeni aminda, God da Bino Eveva ava vironu sedo ghusira. God nange nange nunda natofo+ kaifa eraira ava, osa sedo ghusira. Nunda ambo jimbi 12 ã evevetu mendeninde dabade, karona eoro ise, vironu sedo ghusira. Evevetu resena emo, mendeni kae budo iriari ã mendeni sukaruimi asugetero iriara ava, Iesu setiri jejebuguseri. Eni Magdara embo evetu javo Mary aikena, Iesu sukaru isambu 7 ava ondiri fera buvurutuseri.
3 Eni mo, Chuza noaro javo Joanna ri. Chuza resena emo, nu Kini (King) Herod da kambo ã gugua isambu ava kaifa edo ghusira. Evetu eninda javo mo Susanna ri. Evevetu eimi, evevetu mendeninde dabade, ne Iesu ã nunda ambo jimbide ava, sonembuse gugua ã bayau mutudo ghuseri.
8:4-8 Genembo Vare Govetira Ainda Kasiari.
(Matthew 13:1-9; Mark 4:1-9)
4 Sifo eninda, evetu genembo digari reighi mendeni mendeni aminda ghedo fera numokena totorugetero, Iesu tuturo edo kasia evia sisira,
5 “Genembo eni eredo, farava veka govari dae sedo, aira nunda vareda buvudo, tuturo edo veka giririghe budo, jife jafe getira. Etiri, veka mendeni begatada vosetira amo, evetu genemboi ise fuse ghuse, atai fati jaseteri, ã mendeni rikamanei ojighera minderi.
6 Veka mendeni mo, aroro etoda vose batuno edo gharasa etira. Gharasa etira da beká mo: aroro etoda vosetira ava sedo, uvu tefori.
7 Veka mendeni mo, vive titifaghae ainda jokáda vosedo, viveghae dabade vitira. Vitido, vivei gaetiri dadabetira.
8 Veka mendeni mo, enda eveva aminda vosedo, viti beká jighira. Beká jighira amo, 100 100 avavaga jighira,” kasia evia setiri dadabetiri, Iesu beka fainghedo sisira, “Kasia setena amo, dengoro jave ningi gogoghombevu!” aminge sisira.
8:9-15 Iesu Kasia Sisira Ainda Tuka Mo Eviri.
(Matthew 13:10-23; Mark 4:10-20)
9 Setiri, Iesu da ambo jimbi fera, numokena kasia da tuka aindae ategi useri.
10 Ategi etero, Iesu nemokena sisira, “God Afa kau nange nunda natofo+ kaifa eraira, ainda geka mendeni ava kivo usira. Ne nanda ambo jimbiri. Ava sedo, nu rea kivo usira ava, nemokena isagha saono ningi kasama aovo dae seraena. O natofo mendenikena, geka isambu kasiaimi ijugeraena. Aminge ijugeraena da beká mo: ne erama ditiimi gosuse gi gogoghombeore dae ã, kotugo dengoroi nininguse kasama eore dae sise, aminge seraena.”
11 Aminge sedo, sekago sisira, “Kasia da tuka mo eviri. Veka amo, God da Gekari.
12 Begatada vosetira amo, evetu genembo ará God da Geka ningeoro nenda ghamo jokáda voseraira ava, Satan foa saghimbe buraira avori. Satan amingeraira da beká mo: erá God da Geka tumonduse jebugeore dae sedo eraira.
13 Aroro etoda vosetira amo, evetu genembo ará God da Geka ivugaghae ningiraera avata, jo tumonde gogoghombae eraera avori. Sifo tufako tumondurureoro, Satan foa dereari goferaera.
14 Vive titifaghae ainda jokáda vosetira amo, evetu genembo ará God da Geka ningiraera avata, reighi da irari, enda da gugua, ã fisi da uju aimi God da Geka ava gajeari, nenda tumondari da beká jo sirorae eraira avori.
15 Enda eveva aminda vosetira amo, evetu genembo ará God da Geka ningido, jighi fetedo durumuguse dubo joká isambui muturaera avori. Amingeraera aimi, beká siroreraera,” Iesu aminge sisira.
8:16-18 Arivo Da Kasiari.
(Mark 4:21-25)
16 Aminge sise, Iesu sisira, “Namonde jo arivo injibedo, okia jokáda fitae eraera, o jo ghaitoi gajae eraera. Namonde arivo injibedo, isaghada roera gari dae jigheoro jaragheraira.
17 Rea jungarida aresa amo, amboda foa isagha ari kasama arera. Rea kivo aresa amo, amboda isaghada vironu sari ningarera.
18 God da Geka resena evia, kote gogoghombuse irivu! Ainda beká mo: mave God da Geka ningido tumonderaira amo, God sonembururari nunda tumondari aimi beká mokogo sirorarira. Avata mave God da Geka jo ningae eraira amo, amboda nunda eveva itako irariá koteraira amo manjarira,” aminge sisira.
8:19-21 Iesu Da Ai Ghasovu ã Nano Namendi Mavejori?
(Matthew 12:46-50; Mark 3:31-35)
19 Iesu noi ã nunda jamenade dabade fera, natofo digariimi vasa kosegetero gido, se ningari buniseri.
20 Bunero, enii eredo ira Iesu kena sisira, “Nei ninda jamenade isaghada fetirise, nimo gari dae uju erera,” aminge setiri,
21 Iesu evetu genembo isambukena sisira, “Mave God da Geka ningido, nunda uju ava eraera amo, nanda aya ã nanda jamena mo, nemori,” aminge sisira.
8:22-25 Iesu Setiri, Eva Yaura Tukughedo Binono Usira.
(Matthew 8:23-27; Mark 4:35-41)
22 Sifo eninda, Iesu nunda ambo jimbide dabade, ghakada+ vosedo sisira, “Namonde sembiya betu soveni ominda darore!”
23 Setiri sembise, Iesu fase avíri, yaura vovogo sufusira. Sufuse, ghaje vose ghaka+ rosari dae usira.
24 Amingiri, Iesu da ambo jimbi era dederuse koko siseri, “Ijuga Kato, Ijuga Kato, namonde sirivo ari dae ererata!” aminge setero, Iesu eredo kovionoghae setiri, eva yaura tukughedo binono usira.
25 Etiri, Iesu nemokena sisira, “Ne tumonderaeva amo, redari?” Aminge setiri, ne dudukughedo oju use, tofo tofo se nininguseri, “Arie! Genembo emo kau mavegorai, setiri eva yaura nunda geka ningi? Ari emo, jo evetu genemboi ari da kaugo iraeri!” aminge siseri.
8:26-39 Genembo Sukarui Asugetiri Ireira Ava, Iesu Setiri Jebugusira.
(Matthew 8:28-34; Mark 5:1-20)
26 Ne Galilee Uvu Teria aminda sembera, sovenikena frovensi eni Gerasa ondi da reighi, aminda tere dadoruseri.
27 Darido, Iesu nu ghakada+ ghe vivitiri, genembo eni fira numokena buvurutusira. Genembo amo, sukaruimi asugetero, nati dodo, boka tefo emboroda deinghuse, bekuda irá ghedo ghusira. (Beku resena emo, ambari embo da ofofori.)
28-29 Genemboá Iesu fuge gido, koko sise nunda dombuda dudurusira. Duriri, Iesu sukaru foa buvoro dae setiri, genembo nu sukaru da fakinaimi beka mindafu fuge koko sisira, “Iesu, ni God Teria Beká ainda Mandiri. Se ningore? Ni redae namanekena refesi? Namane nimokena benunu resera: erá namanekena mema muteose!” aminge siseri.
Genembo omo, ungo ata seiniimi (chains) bundedo kaifa urureoro iria ghusira. Avata sukaru da fakinaimi eari seini (chains) bununungheari, nu sumbudo ya reighi uvu irae da vasa aminda iria ghedo ghusira.
30 Avori, Iesu nu sukarukena ategi usira, “Ne mavejori? Sevu ningone!” setiri, sukaru Iesu kena siseri, “Namanenda javo mo Digari ri,” aminge siseri. Ainda beká mo: sukaru digari fera, numokena asugetero irei.
31 Sukaruimi aminge sedo, sekago siseri, “Erama namane dirigeóso ari ekoko mino mutari vasada tereóro dae sise resera,” aminge siseri.
32 Aminge sise fuge, fuka digarigoimi bayau rise fana betuda ya foa ghero gosuseri. Gido, sukaru ne Iesu kena benunu siseri, nemoá sari sumbu fuka jokáda terari dae siseri. Setero, nu ‘avori’ sisira.
33 Setiri, ne genemboá darige vosedo era, fukamanekena tere asugetero, fuka isambu sumbu fuse kenana sedo era, fananda ghasaghe vosedo, uvuda mindi sirivo useri.
34 Amingetero, fuka kaifa kakato ava gido sumbu era, reighi bogu ã reighi mendeni mendeni aminda buvudo, rea gosusera ava, osa setero evetu genembo nininguseri.
35 Ningido ne eredo, geka sisera ainda beká ava gari dae sedo, fera Iesu kena buvurutuseri. Buvudo, genemboá sukaru darigetero, genembo beká edo boka ujudo anumbiriri gido oju useri.
36 Iesu nange nange setiri sukaru vose darigetero genembo jebugusira ava, natofo gosusera aimi osa setero, evetu genembo isambu nininguseri.
37-39 Ningido, Iesu ne dodo jovereghe yare dae siseri. Ainda susu mo: ne oju beká ava useri. Avata genembo jebugusira aimi Iesu kena benunu sisira, “Na nangae yaore!” setiri, Iesu numokena sisira, “Tefo, ni jo namonde yae arera. Ni jovereghedo kamboda yasi! God kau nange nange ni sonembetiri jebugetesa ava, osa saso evetu genembo ningore!” aminge sedo nu ghakada+ vosedo, nunda ambo jimbide sembiseri.
Genembo amo, jovereghe reighida ise, Iesu kau nange nange sonembetiri jebugusira ava, osa sido isira.
8:40-56 Iesu Setiri Evetu Eni Jebugusira, ã Gagara Eni Ambarida Ghe Jebuge Erorusira.
(Matthew 9:18-26; Mark 5:21-43)
40 Evetu genembo Iesu kaifa use irero, sembera ghaka+ darido vivitero nati joká doruseri.
41-42 Nati joká dorero, genembo javo Jairus fira, Iesu kena buvudo endada du fasedo, nunda ghamo joká isambuimi Iesu kena futuse, nunda kamboda yare dae benunu sisira. Ainda beká mo: nunda gagara dabako tainako, ghaeko 12 ava, kae budo ambari dae urogho usira. Jairus mo nu, Jusi embo da dengoro indari kambo+ aminda ireira, ainda bajari eniri. Iesu evetu genembo da jokáda gotatara udo iseri.
43 Ero ainda jokáda, evetu eni fusira. Evetu resena emo, tambuno gosusira ava, ororo jo tukughae iriri, ghaeko 12 dadabetiri, ava irei. Numokena moni mavego ireira ava, isambu nunda jebuga dae sedo dogeta (doctor) manekena mutu tefo usira. Avata nu itako jo jebugaeri.
44 Evetu aimi, Iesu da amboda fira nunda tamo asugari tinguda jijighiri ainghae dabade, ororo tukughusira.
45 Iesu ava itatamedo ategi usira, “Na mave sire jighi?” setiri, evetu genembo isambu ighagha useri.
Amingero, Peter Iesu kena sisira, “Bajari, namonde natofo jokáda gotatara udo refera. Ni redae aminge resesi?” aminge setiri,
46 Iesu sisira, “Avata mave na sire jighira amo, nanda fakina numokena sefiri na itatameteni,” aminge sisira.
47 Iesu nu kasama usira ava gido, evetu amo ungo ata dadaragaruse, fira nunda dombuda du fasusira. Du fasedo, nu redae Iesu sire jijighusira ã, nange nange jebugusira ava, natofo da dombuda osa sisira.
48 Setiri dadabetiri, Iesu numokena sisira, “Nanda gagara, ninda tumondariimi ni jebugetesi. Ava sedo, dubo jamaghae yasi!” aminge sisira.
49 Siri, aghi kato eni Jairus da kamboda ghe fira Jairus kena sisira, “Ninda gagara anakora ambira. Ava sedo, ijuga kato erá tefo fuse janjagu eure dae sise resena!” aminge sisira.
50 Avata Iesu ava ningido, Jairus kena sisira, “Erama oju eose! Tumondaresa amo, nu jebugarira,” aminge sedo,
51-52 era kamboda buvu fetedo, natofo aminda isambu, gagara aindae dimbia sorara ero gido, Iesu nu Peter, James, John, ã gagara ainda noi numamo ava nembo budo, evetu genembo mendeni erama kamboda tereore dae buregusira. Bureguse sisira, “Erá sorara eove! Gagara mo jo ambaeri; nu ravira,” aminge setiri,
53 ne Iesu ava dere jiseri. Ainda susu mo: ne kasama useri, gagara amo anakora ambududurusira.
54 Avata Iesu nu gagara ava ungoda jighido sisira, “Nanda gagara, ere!”
55 Aminge siri ainghae dabade, gagara jebugedo erorusira. Eretiri, Iesu gagaraá bayau mutoro mindare dae sisira.
56 Noi numamoghae ava gi dudukughedo buniseri. Bunero, Iesu nu rea usira ava, osa seóro dae sise buregusira.