72
[Psalm lal Solomon]
Sie Pre Ke Tokosra
1 O God, luti nu sin tokosra tuh elan nununku ke suwohs lom.
Sang nu sel suwoswos lom
2 Tuh el fah kol mwet lom ke nununku suwohs,
Ac kasru mwet akkeokyeyuk ke suwoswos.
3 Lela tuh acn uh in engankin kapkapak,
Ac in pulakin suwoswos.
4 Lela tuh tokosra in oru nununku suwohs nu sin mwet sukasrup;
Lela elan kasru mwet enenu
Ac kutangulosla su akkeokyalos.
5 Lela tuh mwet lom in alu nu sum ke lusenna pacl faht uh tolak,
Ac ke lusenna pacl malem uh ase kalem la, in fwil nukewa fahsru.
6 Lela tuh tokosra elan oana af nu fin acn uh,
Oana aunyaf ma aksroksrokye ima uh.
7 Lela tuh moul suwoswos in kapkapak ke pacl el tokosra,
Ac mwe akinsewowo sin God me in yokyokelik ke lusenna pacl malem uh kalem.
8 Tokosrai lal ac fah sasla liki sie meoa nu ke sie pac meoa,
Ac liki Infacl Euphrates nu ke saflaiyen faclu.
9 Mwet su muta yen mwesis uh fah tuku ac epasr nu sel,
Ac mwet lokoalok lal elos fah faksufi ye mutal.
10 Tokosra Spain, oayapa tokosra ke tuka srisrik we, elos fah sang mwe sang lalos nu sel;
Tokosra lun acn Sheba ac acn Seba elos fah wi pac use mwe lung lalos.
11 Tokosra nukewa ac fah epasr nu sel,
Ac mutunfacl nukewa fah kulansap nu sel.
12 El molela mwet sukasrup su pang nu sel,
Ac oayapa elos su enenu ac pilesreyuk.
13 El pakomutalos su munas ac sukasrup,
El molela moul lalos su enenu.
14 El molelosla liki inpoun mwet su akkeokyalos ac su oru ma sulallal nu selos;
Moul lalos saok sel.
15 Lela in loes moul lun tokosra!
Lela tuh gold lun Sheba in itukyang nu sel,
Ac mwet uh in pre kacl pacl e nukewa;
Lela tuh mwe insewowo lun God in oan facl pacl e nukewa.
16 Finsrak tuh in pukanten wheat fin acn uh;
Ac inging uh in afla ke fokinsak,
Oana ma kapak fin inging Lebanon.
Lela tuh siti nukewa in nwanala ke mwet
Oana mah in ima uh.
17 Lela tuh inen tokosra in tiana mulkinyukla,
Ac pwengpeng lal in oan paht oana faht uh.
Lela tuh mutanfahl nukewa in siyuk tuh God Elan akinsewowoyalos
Oana ke El akinsewowoyal tokosra.
18 Kaksakin LEUM GOD, God lun Israel!
Tuh El mukena ku in oru ma wolana inge.
19 Kaksakin Ine wolana lal ma pahtpat!
Lela tuh wolana lal in nwakla faclu nufon.
Amen! Amen!
20 Pa inge saflaiyen pre lal David, wen natul Jesse.