45
LEUM GOD El Srisrngilya Cyrus
1 LEUM GOD El sulella Cyrus elan tokosra.
El srisrngilya in kutangla mutunfacl pus;
El supwalla in eisla wal in tokosra lukelos.
LEUM GOD El ac ikasla mutunpot lun siti uh nu sel.
Ac El fahk nu sel Cyrus,
2 “Nga sifacna fah akoela inkanek lom,
Ac akfwelyela eol uh ac inging uh.
Nga fah fukulya mutunpot bronze
Ac koteya osra ma sang laki.
3 Nga fah sot nu sum wek saok ma oan in acn lohsr ac lukma;
Na kom fah etu lah nga pa LEUM GOD
Ac lah God lun Israel El pangon kom ke inem.
4 Nga srisrngikomi in kasrel Israel, mwet kulansap luk,
Mutanfahl se su nga sulela.
Nga ac fah sot nu sum sunak lulap
Kom finne tia eteyu.
5 “Nga LEUM GOD; wangin sie pac god sayuk.
Nga fah sot nu sum ku ma kom enenu an
Kom finne tia eteyu.
6 Nga oru ma inge tuh mwet nukewa faclu —
Kutulap lac nwe roto —
Fah etu lah nga LEUM GOD,
Ac lah wangin pac sie god saya.
7 Nga oralana kewa kalem ac lohsr;
Ac nga use na kewa mwe insewowo ac mwe ongoiya.
Nga, LEUM GOD, oru ma inge nukewa.
8 Nga fah oru tuh suwoswos in putati inkusrao me oana af;
Faclu ac fah ikakla in eis,
Na ac fah farengla ke sukosok ac nununku suwohs.
Nga, LEUM GOD, fah oru ma inge in sikyak.”
God Lun Ma Orekla Ac Oakwuk Lal Nu Kac
9 Ya sie tup kle ku in akukuin nu sin mwet se ma oralla uh —
Tup se ma oana tup nukewa saya uh?
Ya kle uh ku in siyuk sin mwet orek tup se lah mea el oru uh?
Ya tup sac ku in torkaskas mu mwet se oralla uh wangin etu lal?
10 Ya oasr mwet ku in fahk nu sin papa tumal ac nina kial,
“Efu ku komtal oreyula ange?”
11 LEUM GOD, God mutal lun Israel,
El su lumahla pacl fahsru, El fahk:
“Wangin suwohs lom in kusen siyuk sik ke tulik nutik,
Ku in fahk nu sik ma nga in oru!
12 Nga pa orala faclu
Ac orala mwet uh in muta fac.
Ke ku luk, nga asroelik kusrao;
Nga pa nununku faht, malem, ac itu uh.
13 Nga sifacna pa purakulak Cyrus elan mukuila
In akfahsrye pwapa luk, ac in aksuwosyela ma tafongla.
Nga fah aksuwosyela inkanek nukewa el fahsr we.
El ac sifilpa musai Jerusalem, siti luk,
Ac aksukosokyela mwet luk su muta in sruoh.
Wangin mwet molel ku sang molin eyeinse elan oru ma inge.”
LEUM GOD Kulana pa fahk ma inge.
14 LEUM GOD El fahk nu sin Israel,
“Mwe kasrup lun Egypt ac Ethiopia ac fah ma lom,
Ac mwet loeska in Seba ac fah mwet kohs lom.
Elos ac fah kapir ke sein ac fahsr tukum.
Elos ac fah pasrla nu sum ac sifacna fahk,
‘God El oasr yurum — El mukena God.
15 God lun Israel, su molela mwet lal,
El sie God su sifacna okanulla.
16 Elos nukewa su orala ma sruloala fah mwekin;
Elos nukewa ac fah akmwekinyeyuk.
17 Tusruktu Israel el moliyukla sin LEUM GOD,
Ac kutangla lal oan ma pahtpat;
Mwet lal ac fah tiana akmwekinyeyuk.’ ”
18 LEUM GOD El orala kusrao —
El na pa God!
El lumahla ac orala faclu —
El orala in okak ac kawil.
El tia orala tuh in sie acn mwesis,
A sie acn mwet uh ku in muta we.
El pa fahk, “Nga pa LEUM GOD
Ac wangin pac sie god sayuk.
19 Nga tia kaskas in lukma,
Ku okanla sripa luk.
Nga tia sapkin mwet Israel
In sukyu in sie acn mwesis.
Nga pa LEUM GOD, ac nga fahk ma pwaye.
Nga oru in kalem ma su suwohs.”
LEUM GOD Lun Faclu Ac Ma Sruloala Lun Babylon
20 LEUM GOD El fahk,
“Fahsreni nu sie, kowos nukewa su
Kaingla liki kais sie mutunfacl suwos.
Fahsru utyak nu ke pacl in nununku!
Mwet su fahsr inkanek uh ac kolak ma sruloala kihl lalos,
Ac pre nu sin god ma tia ku in molelosla —
Mwet ingan wangin na pwaye etu lalos!
21 Fahsru ac akkalemye sripa lowos ye mutun mwet nununku.
Lela mwet su suk kasru in alolngoki sie sin sie.
Su tuh palyeak in pacl somla ma ac sikyak uh?
Ya tia nga, LEUM GOD, su molela mwet lal?
Wangin god saya.
22 “Mwet faclu nufon,
Forma nu sik, tuh kowos in moliyukla.
Nga mukena pa God — wangin pac sie saya.
23 Wulela luk uh pwaye —
Ac fah tiana ekla.
Nga fulahk nu suwos ke Inek sifacna:
Mwet nukewa fah tuku ac sikukmutunte ye mutuk,
Ac wulela ku tuh elos ac pwayena nu sik.
24 “Elos ac fah fahk lah suwoswos ac ku
Koneyukyak yuruk mukena;
A elos nukewa su srungayu fah arulana mwekin.
25 Nga, LEUM GOD, fah molela fwilin tulik natul Jacob nukewa,
Ac elos fah kaksakinyu.