1  2  3  4  5  6  7  8  9  10  11  12  13  14  15  16  17 Naisaad din Tolda ay Panpappailaan Diyos sin pitsa 1 di damo ay bowan sin maikadwa ay tawen manipod sin kinmaanan da ed Egipto. 18 Idi insaad Moses din Tolda, tinood na din posti et pag nan ikapet din bagbag ya din odom ay manbabag ay amag na. In-amag na din kaosod ya lagat, 19 et pag nan iakbong din Tolda ay lalat di animal ay say maiatep ya maibobong. Tinongpal na amin din inbilin Diyos ay iyat na ay mangiamag sin Tolda.

20 Inkosnong na sin Baol din dowa ay bato ay naisolatan di sinpo ay bilin, pag nan iamag din kaiw ay pangiegnan. Makdeng pay di, in-amag na din kaleb di Baol. 21 Inpasgep na din Baol sin Tolda, pag nan iamag din kurtina ay manasalin sin kowarto ay kad-an di Baol, tan say inbilin Diyos. 22 Inpasgep na abe din lamisaan sin Tolda et inpeey na sin naibanda si amyanan sin lasin di kurtina. 23 Inpatang na sin lamisaan ay sana din tinapay ay maidaton en Diyos, tan siya din inbilina.

24 Inpasgep na din patangan di silaw sin Tolda sin naibandas abagatan, sin sagang di lamisaan, 25 et pag nan iamag din silaw sin sangoanan Diyos ay kaman met laeng din inbilin Diyos en sisya.

26 In-amag Moses din balitok ay altar sin Tolda sin sangoanan di kurtina 27 et nan-ipoo si nabanglo ay insinso, tan say inbilin Diyos. 28 In-amag na abe di kurtina sin segpan di Tolda, 29 pag man-amag sin lasin di kurtina si altar ay pan-idatonan si mapooan. Say pangipooan da si datdaton ay animal ya lames di inani da.

30 Inpeey na din palanggana sin nan-gawaan di Tolda ya altar et piney-ana si danom ay pan-owasan, 31 ta say pan-owasan Moses ya da Aaron sin an-ak na sin takkay ya siki da. 32 Inbilin Diyos ay man-owas da mo senggep da sin Tolda ono somag-en da sin altar. 33 Makdeng pay di, in-amag Moses din kurtina ay nanliked sin Tolda ya altar ay kaman say alad na, pag nan ibitin di kurtina sin segpan di alad ay sana et say nakdengan din obla ay kaisaadan di Tolda.

34 Idi makdeng di, nilikmot din liboo din Tolda et napno sin somili ay kinadiyos en Yahweh, 35 isonga adi nakasgep si Moses. 36-37 Sin am-in ay nan-etaetanan di Israelita, nantetee da si esa ay lugar enggana ay komayang din liboo sin Tolda. Mo komayang, asi da manlobwat ay man-etan. 38 Sin kaagawan, maila da din liboo ay kaipailaan di kawadan Diyos sin ngaton di Tolda. Sin labi pay, maila da di apoy sin kad-an di liboo. Nailan di Israelita din liboo ya apoy ay sana sin am-in ay nandad-anan da.