2
Masapuɏʼn Tumuttuwa Takuʼn Mamati
1 Sikaʼn alakku, pakoscheɏom chi pammatim kan Apudyus ti amod chi kachegula kan chitaku gapu si litimpuyugen taku kan Jesu Kristu.
2 Cha losan un chingngeɏm kan sakon un intudtuchuk si sangwalan cha achuʼn tagu, siya ipiyeɏm si taguʼn mantegochem un makwaʼn mantudtuchu kan cha uchum.
3 Alusam ulay siluʼn ligat un gumatong kan sika ti siya mipachas chi ustuʼn mansimbi kan Jesu Kristu un isun chi suɏchachu.
4 Ha ustuʼn suɏchachu, achipun makwaʼn mitimbuɏuy chi kawachila si kawachin cha sibinyan, ti masapuɏʼn koola mas-oman chi ap-apula un lanchutuk kan siya.
5 Ha osa boʼn miyaligen chi mansimbi kan Jesu Kristu, isun chi taguʼn makatodtodchak ti achipun magunggulaan lu achipunla tungpaɏon chi lintog chi todtodchak.
6 Isun chi mamayaw un mallagpot un mangkawachi, siya umun-ulaʼn man-apit.
7 Ammam somsomkon cha allaʼn ibyegbyegak, ti tuɏungan chika kan Apudyus ta maawatam losan.
8 Somsomkom si Jesu Kristu un ummuli latagu, un galak David. Siya bibiɏuʼn chameg un pin-ak ibyegbyega.
9 Gapu si mangibyegbyeg-ak si bibiɏuʼn chameg, mapaligatalak ya labyaɏuchak un isun chi kapapatoy. Ngim achipun makwaʼn matipod chi ugud Apudyus.
10 Ked maattomak cha losan, gapu kan cha taguʼn chilutukan Apudyus ta matatagucha mipagapu kan Jesu Kristu ya mallalayun un michayawan.
11 Tuttuwa mibyegbyega un,
“Lu lakakatoy taku kan Jesu Kristu,
makatagu taku bo kan siya.
12 Lu maattoman taku cha ligat,
makaturay taku bo kan siya.
Ngim lu puklitan taku siya,
puklitala bo chitaku.
13 Lu achipun taku mantegochen,
sissiyan mantegochen si Apudyus ti
achipunla makwaʼn puklitan chi long-egla.”
Ha Ustuʼn Mansimbi Un Mas-oman Apudyus
(1Ti. 4:6-16; 6:3-10; Tit. 3:8-11)
14 Ipasomsomoklu cha alla kan cha mamati utlat, ya byegbyegaam chicha si sangwalan Apudyus ta achicha pin-a mansisillongbyat mipanggop si ugud un lappun simsimbila, ti yumamyam-an si somsomok cha manchongeɏ.
15 Ked sika, ipapatim un mangwa si mas-oman Apudyus. Ya achim ibiin chi kawachim ya allechem ta achi mikawas chi mantutudtuchum si ugudlaʼn katuttuwaan.
16 Achika mikama kan cha lappun simbila un ug-uggud cha tagu ti siya mampaachayu si somsomok cha tagu kan Apudyus.
17 Ti ha itudtuchucha, isun chi sakit un mallasu umiklapala ya manyam-alala si long-eg. Kamatchi itudtuchun cha Himeneus kan Philetus,
18 ti bilay-ancha katuttuwaan ya gilulucha pammatin cha uchum, ti kalancha lagamput kalu ummuli cha tagu latagu.
19 Ngim achipun masukatan chi katuttuwaan ti mampakchot ya achipun miyug-on chi lisaachen chi pilaud Apudyus. Ked awed chi liigili un kalala, “Ammun Apudyus lu silu cha tagula,” ya “Ulay siluʼn mangibyega un mamati kan Apu, masapuɏʼn man-awichela cha losan un lawwing.”
20 Ha chakeɏ un byeɏoy, wechewed cha ochonla un lapotog ya pampaliwa. Alla kan bilalituk ya mangkangila cha uchum. Awed bo cha kilayu ya pilita. Ked lapotog chi mauseɏan cha uchum ya pampaliwa mauseɏan bo cha uchum.
21 Siya bo si tagu, lu chuɏsala long-egla si lawwing, lapotog chi manguseɏan Apudyus kan siya, lichatun ya lakasagala un mansimbi si losan un panggop Apudyus.
22 Achim ipalubus un iturayan chika si lawwing un pipion chi long-eg cha bumaru, ked ipapatim un mangwa si bibiɏu. Ya pakoscheɏom chi pammatim kan Apudyus ya ayatlu si asintatagum. Makatimpuyugka kan cha mangkochew si tuɏung kan Apudyus un mampeɏkas chi somsomokcha.
23 Achika makaisi-isik kan cha lappun simbila, ti ammum un ha mambyalagen cha kamatchi ked susubog.
24 Ked ha mansimbi kan Apudyus, achipun makwa un makasubog, ngim masapuɏʼn lalaing, maalus kan cha losan un tagu ya kabyeeɏalaʼn mantudtuchu ya laattom.
25 Ta lu ammala leman un mantudtuchu kan cha sumupling si tuttuwa, idchen lin Apudyus chicha si wayachaʼn mambyabyawi ya maammuwancha katuttuwaan.
26 Ked hachi malomsomkancha ya maseɏaklibyencha si sikap Satalas un langawis kan chicha un mangwa si piola.