18
Ha Mayam-alan Chi Iliʼd Babylon
1 Lagamput ked cha hachi, intullongku osaʼn anghel un lan-osog un lampeɏpuʼd langit. Chakeɏ kalobbongala ya malilangan chi pita si silingla.
2 Ot impokawlaʼn kalala,
“Lachusa ya losan layam-an chi machamchameg un iliʼd Babylon!
Ked siya lambyalin un ummiliyan cha aɏan ya cha losan un lawwing un Ispiritu,
ya lalukbutan bo cha losan un kaisaw un sissiwit un lawwikon taku.
3 Ti hachiʼn ili, ilawisla cha losan un tagu si kaili-ili utla pita un sumuɏut si
kilalawwingla, ti isun chi impailumla mampiit un byeyasla
kan cha losan un tagu ta mabuukcha.
Ked cha losan un ari si lubung, isun chi lakachegchegascha kan siya
ti siluɏutcha kachawiyala.
Ya cha losan un mallalaku utla pita, bummaklangcha
gapu si lalabos un gumalasanchaʼn lawwing!”
4 Ot awed bo ginga un chingngeɏk un lampeɏpuʼd langit, un kalala,
“Chikayuʼn taguk, telanyu halat un ili
ta achi kayu mipati makabyasuy si byasuɏla
ya achi kayu bo mipati si machusaala!
5 Ti ha byasuɏla, ked isun chi kangatun chi langit
chi laponpolancha.
Ked achipun Apudyus maliwatan
chi kilalawwing cha pin-ala killingwa.
6 Ked ha makwa kan siya,
machubli losan un killingkingwalaʼn lawwing
kan cha uchum un subyalit cha killingwala.
Ked hachiʼn mampiit un impailumla kan cha uchum,
machubli bo kilapiitla un mipailum kan siya.
7 Ti patunged cha lallam-ayala
ya langichayawala si long-egla,
ked siya bo isun cha malligatala ya malomchomala.
“Ti kalala si somsomokla,
‘Isuk chi byebyaiʼn pangat un achipun labyaɏu,
ya lappun makwa kan sakon
un isun chi ligat chi labyaɏu!’
8 Ked gapu si hachi, michisan un makwa
cha mangkangkalasi un ligat kan siya,
ti masakit, malomchom ya mauɏat,
ya masgob bo, ti si Apudyus chi malusa kan siya,
un mallakabyelin un Apu.”
9 Ked losan un ari si allaʼn lubung un lakachegchegas ya lakalamlam-ay si hachiʼn ili un liyalig si puta, ibilancha ya ichomchomcha lu itullongcha asuk chi masgobyela.
10 Ked bumebyettawacha ti umogyatcha un mipati si machusaala. Ked kalancha,
“Kenga! Kadchegu hachiʼn lachamchameg un iliʼn Babylon!
Sin-uras chi lachusaala ot lappun!”
11 Ya ulay bo cha mallalaku si lubung, ibilancha ya ichomchomcha hachiʼn ili, ti lappun mangngila si lakucha.
12 Lappun mangngila si lakuchaʼn byalituk, pilak ya mangkangilaʼn byetu ya perlas. Ya lappun bo mangngila kan cha mangkangilaʼn kilalasin cha luput un mangkacheɏaeg, mangkaputilak ya mangkasiling. Lappun bo mangngila si mangkabyaɏu ya mangkabyanguʼn kayu, ya cha losan un lakuʼn lakwa si saung chi elepante, mangkangilaʼn kayu, gambyang, kaga ya mangkakabyaɏun byetu.
13 Ya lappun bo mangngila si lakuchaʼn mangkalakalasi un mampabyangu si makan ya cha byangbyanglu un insenso, mirra ya uchum. Lappun bod mangngila si lakuchaʼn byeyas, lalog, arina, pagoy ya cha byaka, keɏlilu, kabyayu ya kalisa. Ya lappun bod mangngila si ilakuchaʼn tagu ta mammusassu.
14 Ked kalan cha mallalaku si hachiʼn ili, “Losan cha bibiɏuʼn makmakwa un potpotgom un siya mallamlam-ayam, laumascha. Ya losan un kilabyaklanglu ya kilabiɏum, laumascha bo. Ked ulay lu silu koom, achipunka makaiyulin si ing-inggala!”
15 Ked cha mallalaku un bummaklang si hachiʼn ili, bumebyettawacha ti umogyatcha un mitakuɏung si kachusaala. Sin-iibincha ya malochomchomcha un kalancha,
16 “Kenga! Kadchegu hachiʼn lachamchameg un ili,
ti isun chi byebyai un lansilup si kangilaan un luput un
mangkasiling ya mancheɏaeg un latayutayun cha byalituk,
perlas ya mangkangilaʼn byetu!
17 Ngim sin-uras abus ked laumas cha losan un kilabyaklangla!”
Ulay cha chalibyen chi bapur ya cha mangkawachi si bapur ya ulay losan un mangkawachi si byeybyey, ya cha mallulugen un pin-a mallaku si bapur, ked bumebyettawacha losan
18 un mangoottap si asuk chi lasgobyela. Ot impokawcha, “Lappun miyisuwan chi halat un ili!”
19 Ot chilabuwancha uɏucha gapu si amod un mansomsomokcha si hachiʼn ili, ot lan-ibincha ya lalomchomcha un kalancha,
“Kenga! Kadchegu hachiʼn machamchameg un ili, ti ha kilabyaklangla,
siya bummaklangan cha losan un alla bapurla!
Sin-uras abus ot laumas losan cha kilabyaklangla!”
20 Ngim chikayuʼn awed ud langit, gumalas kayu si layam-alala!
Ya ulay chikayuʼn tagun Apudyus, apostolesla ya propetala,
gumalas kayu bo losan ti imbyaɏos Apudyus cha
killingwala kan chikayu si lalusaala si halat un ili!
21 Ot awed chi osaʼn mangkoscheɏʼn anghel un lan-itang-oyla si chakeɏʼn byetu ot ingkop-eɏla si byeybyey, ot kalala,
“Kamatchi makwa si machamchameg un iliʼn Babylon si mayam-alala.
Ked lappun kasinla tumokweɏan si ing-inggala.
22 Ya hachiʼn ili, lappun kasin madngeɏ si mangkankanta,
mantuktukeɏ si arpa, malungali,
malaggeypu ya malangguyub!
Lappun bo cha mamboseɏ ya mallaga,
ya lappun kasin madngeɏ si gingan cha gigillingan!
23 Ya lappun kasin maila si padchan chi silaw
ya lappun bo kasin madngeɏ si gingan cha
mallaglagsak un mangkaseɏ.
Ti ulay cha mallalaku si hachiʼn ili, un chicha kabyaklangan si allaʼn pita,
hachi bo lachusaancha!
Ya hachi bo lachusaan cha losan un isun cha mansansalamangka
ti ilallilawcha cha losan un nasyun si allaʼn pita!”
24 Lachusa hachiʼn ili un Babylon ti siya lamatoyancha kan cha propetan
Apudyus ya uchum un tagula,
ya ulay cha losan un taguʼn lapatoy si allaʼn pita,
lapatoycha losan si hachiʼn ili.