13
Ha Kaog-ogyat Un Ayam Un Leɏpu Si Byeybyey
1 Ot awed bo intullongkuʼn lummoswa si byeybyey un kaog-ogyat un ayam. Pitu uɏula ya simpuɏu sakgudla. Ked losan un sakgudla, alla koronala, ked cha kichey cha uɏula, lagiliyan si tuntulliʼn ngachen Apudyus.
2 Hachiʼn kaog-ogyat un ayam, isun chi atap un kusa un ngadloncha leopardo. Ked ha ikila, isun chi ikin chi bear ya ha tupokla, isun chi tupok chi layun. Ot illidchon chi dragon si hachiʼn ayam chi pallakabyelinla ya manturayala ya chakeɏʼn kalobbongala.
3 Ha osaʼn uɏun chi hachiʼn kaog-ogyat un ayam, awed chi sugatla un makwaʼn ikatoyla, ngim lapilatan ot kasin latagu. Ked hachi laschaawan cha losan un tagu utla pita ot hachi losancha litun-uchen kan siya.
4 Ot chilaychayaw cha losan un tagu hachiʼn dragon gapu si langidchela si kalobbongala si hachiʼn kaog-ogyat un ayam. Ya chilaychayawcha bo hachiʼn kaog-ogyat un ayam un kalancha, “Lappun miyisuwan chi halat un ayam! Lappun makabyeeɏ un makagubyat kan siya!”
5 Ot lapalubusan chi hachiʼn kaog-ogyat un ayam un sumukin ya masayaw un mangibyega si lawwingon Apudyus, lapalubusan bo un manturay si ulog chi opatpuɏu ya chuwan buɏan.
6 Ot illugilan mangam-amsiw kan Apudyus, ulay chi ngachenla ya ha inggewalaʼd langit ya cha losan un inggew udchi.
7 Ya lapalubusan bo un mangubyat kan cha tagun Apudyus ya abyakola chicha, ya laidchen bo si kalobbongan un mangituray si losan un kilapuun cha tagu si kaili-ili si allaʼn lubung un lappun malausan kan cha losan un mangkalakalasiʼn ugud.
8 Ked losan un tagu utla pita chayawoncha siya, lalaksig kan cha taguʼn lilista ngachencha si hachiʼn libluʼn chi Keɏlilu un lapatoy. Ti lalipud si chamchamun cha losan, lagamput lilista si liblu ngachen cha losan un laidchen si mallalayun un makataguwan kan Apudyus.
9 Masapuɏʼn chongɏonyu cha alla, lu laingaan kayu!
10 Cha taguʼn singgasat un mabyaɏud, mabyaɏudcha! Ked cha singgasat un mapatoy si sabli, mapatoycha bo si sabli! Ked chitakuʼn tagun Apudyus, masapuɏʼn pakoscheɏon taku pammati taku ya alu-alusan taku cha losan un makwa kan chitaku.
Ha Kaog-ogyat Un Ayam Un Lummoswa Si Pita
11 Ot awed bo intullongku un osaʼn kaog-ogyat un ayam un lummoswa si pita. Chuwa sakgudla un isun chi sakgud chi Keɏlilu, ngim ha gingala, kaog-ogyat un isun chi gingan chi dragon.
12 Ked losan un kalobbongan chi hachiʼn ummulaʼn ayam, wechewedcha si hachiʼn mikadwa, ti siya isun chi pilakalong-egla. Ked ipatutla pachayaw kan cha losan un tagu utla pita hachiʼn osaʼn ummulan ayam un lapilatan chi sugatla.
13 Ked ha mikadwaʼn ayam, impailala mampataeg un lakaskaschaaw, ti ipaodchegla apuy un meɏpuʼd langit ta itutullong cha losan un tagu.
14 Ya ilallilawla cha losan un tagu utla pita si langwaala si kaskaschaaw gapu si kalobbongan chi hachiʼn ummun-ulan ayam. Ot lampakwa kan cha tagu si silan-ayam un isun chi hachiʼn ummun-ulan ayam un lasugatan si sabli ngim latagu.
15 Ot impalubus bo Apudyus un angosan chi hachiʼn mikadwaʼn ayam chi hachiʼn silan-ayam ta makwaʼn makaginga ya makwa boʼn otoyola cha losan un achipun malayaw kan siya.
16 Ked osa bo, hachiʼn mikadwaʼn ayam, impatutla pameɏka si meɏkan chi hachiʼn ummulaʼn ayam chi kichey ya chuwalan un iman cha losan un tagu, awed man saedcha willu lappun, awed cha byabyaklang ya kakapus, ulay musassu willu achipun.
17 Taplu cha hachiʼn achipun lameɏkaan si ngachen chi hachiʼn ummun-ulan ayam, willu ha lambyen chi ngachenla, achipun makwa un mallaku ya mangngila si byaɏanglaʼn mangin-an.
18 Abus cha laangsan un tagu makaawat si allaya. Ked lu silu lalaing, maawatancha miyaligen chi hachiʼn lambyen chi ummun-ulan ayam, ti hachiʼn lambye, siyad piolaʼn kalan chi ngachen chi osaʼn tagu, un ha lambyela ked 666.