9
Cha Taguʼn Chilutukan Apudyus
(Rom. 2:28-29; Gal. 4:21-31)
1 Susulud, tuttuwa cha allaʼn ibyegak ya achipulak mantuntulli gapu si pammatik kan Jesu Kristu. Ked takcheɏan chi Ispiritun Apudyus chi somsomokku un katuttuwaan cha allaʼn ibyegak.
2 Ibyegak kan chikayu un amod sigeb chi somsomokku un achipulak makaskasmok.
3 Gapu kan cha kailiyak ya kachaɏaak un Judio, lu makwa otyan, ulay sakon chi maisila kan Kristu ya machusa kan Apudyus ta chicha matagu.
4 Ti chicha mismuʼn galak Israel un chilutukan Apudyus un man-alakla ya chicha bo langipain-ala si kila-Apudyusla. Lakatuɏeg kan chicha ya illidchola lintogla. Awed kan chicha chi ustuʼn palagchaychayaw ya chicha malawid si ingkarila.
5 Chicha bo galak cha mangkapotog un taguʼn Apudyus si awi. Ya chicha bo Judio un liyalakan Jesu Kristu. Si Apudyus un mangituray si losan. Machaychayaw otyan Siya si ing-inggala! Amen.
6 Ngim achipunku kalan un lappun lambyalagen chi ingkarin Apudyus kan chikamiʼn Judio. Ti chakampun un losan un galak Israel ked chilutukan Apudyus un tagula.
7 Isun Abraham, chakampun un losan un galak Abraham ked aalak Apudyus. Ti kalan Apudyus kan Abraham, “Cha aalak Isaac cha maibilang un galaklu.”
8 Ked ha piolaʼn uguchon chakampun un losan un aalak Abraham ked maibilangcha un aalak Apudyus. Ti abus cha liyalak si lakwaan chi ingkarin Apudyus cha maibilang un galak Abraham.
9 Ti ha ingkarin Apudyus kan Abraham, kalala, “Kamatlaʼn timpu umaliyak kasin si umaliʼn tawon, ked iyalak Sarah un asawam chi leɏaki.”
10 Chakampun un abus hachi, ti cha chuwaʼn alak Rebekah ossaan amacha, un si Isaac un Apu taku.
11-12 Si chaampuncha miyalakan cha hachiʼn chuwa ya chaampun cha pay laing mangwa si bibiɏu willu lawwing, kalan Apudyus kan Rebekah, “Ha panguɏu mansimbi si uchichi.”
13 Ti ha liigiliʼn ugud Apudyus, kalala, “Pipiok si Jacob, ngim lawingok si Esau.”
14 Himma mibyega taku lù? Ha mallaksig kamman si Apudyus? Chakampun!
15 Ti imbyegala kan Moses,
“Kacheguwak cha piok un kacheguwan ya kaasiyak cha piok un kaasiyan.”
16 Ked kaawatan un ha manchutukan Apudyus si tagu, chakampun un gapu si pion chi tagu willu koon chi tagu, ngim gapu si kachegun Apudyus.
17 Ti kalan chi ugud Apudyus kan Pharaoh ud Egypt, “Lan-ariyok sika ta sika mangipaila si kilabyelinku ya mangipakaammu si ngachenku si intilun chi lubung.”
18 Ked kaawatan un kacheguwan Apudyus cha piolaʼn kacheguwan ya patangkilola somsomok cha piolaʼn patangkilon.
Ha Sangan Apudyus Ya Kachegula
19 Lu awed mangibyega kan chikayu un, “Lu kamatlat, puggey un pabyasuɏon Apudyus chitaku, lappun mit makatipod si piola?”
20 Ngim silukaman un sumongbyat kan Apudyus? Chakampun un kalan chi lachiwin un byanga si lanchiwin un, “Puggey un killingwam sakon un katchi?”
21 Achipun makwa, ti ha manchichiwin si byanga alla kalobbongala un manguseɏ si pita si piolaʼn manguseɏan. Manchiwin si chuwaʼn byanga si man-isu un pita, ha osa gettok chi mauseɏala ked ha osa bo cha lainsiguchen cha mauseɏala.
22 Ked isula bo si killingwan Apudyus. Ti piolaʼn ipaila sangala ya ipakaammu kilabyelinla kan cha taguʼn mampasanga kan siya. Ngim ilalu-alusala chicha ulay lu machuchusacha.
23 Ti piolaʼn ipaila kilachayawla un lappun miyisuwala, ot kilacheguwala cha taguʼn chilutukala un inyaallala chicha un mipati si machayawala.
24 Ked chitakuʼn chilutukala, chakampun un abus cha Judio ngim ulay cha Gentil.
25 Ti katla kalan Apudyus si liblun Hosea,
“Cha taguʼn chakampun un taguk si awi, chicha chilutukak un mantaguk si sala.
Ked cha achipunku ilay-ayat si awi, chicha ay-ayatok si sala.”
26 “Ked si mismu un lugeɏ un langibyeg-ala kan chicha, ‘Chakampun un taguk chikayu,’ ked udchi maawagencha un aalak chi matataguʼn Apudyus.”
27 Ked ha illipkaw propeta Isaiah mipanggop kan cha galak Israel, kalala,
“Ulay lu achu cha galak Israel un isun chi kilaachun cha legen si byeybyey,
akkiyut cha taguwon Apudyus kan chicha.
28 Ti mampogos chi malusaan Apudyus kan cha losan un tagu utla pita.”
29 Isun chi imbyegan Isaiah,
“Lu si Apudyus un mallakabyelin un Ap-apun cha losan ked lappun bilun-ala,
lambyalin taku isun cha taguʼd Sodom ya Gomorrah.”
Achipun Cha Judio Tuttuwaon Chi Bibiɏuʼn Chameg
30 Ked himma mibyega taku lù? Cha Gentil lappun lamlamachaʼn ibilang Apudyus chicha lalintog, laibilangchaʼn lalintog gapu si pammaticha kan Jesu Kristu.
31 Ngim cha Judio un langipapati un laluɏut si lintog un mangibilangan Apudyus kan chicha lalintog, lappun lambyalagencha.
32 Puggey? Gapu ta siyad suɏutoncha lintog un mangibilangan Apudyus kan chicha lalintog, chakampun un gapu si pammaticha kan Jesus, ngim gapu si killingwacha. Ked lisabyangtucha si byetu un misabyangtuwan cha tagu.
33 Ti imbyegan chi liigili un ugud Apudyus, miyalig si Jesu Kristu byetu, un kalala,
“Ilanyu, ti isaedku ud Zion chi byetu un misabyangtuwan cha tagu ya maodchagencha.
Ngim lu silu mamati kan siya, achipun mabibìilan, ti matagu.”